2 Ebyomubiha 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obunabbi bwa Semaya

¹ Omutuki Rehobboamu niyoola mu Yerusalemu, yalaanga abanamaye bahiramo elifu emia ndala neende amahumi munaane (180,000) ohutula mu nono cha Bbenjamini neende Yuda. Yali naadaha ohuchia ohulwaana ebiita ohwekobosera obunyala mu nono cha Yisiraeli ch'emukulu.

² Nae Omwaami yaboolera omunabbi Semaya

³ ohutuumbula emboosi chino eyiri Omutuki Rehobboamu haandi neende eyiri abaandu boosi ab'enono chia Yuda neende echia Bbenjamini ati:

⁴ “Ewe otateemaho ohuseeta abeeho bao beene abo. Mweekobolereyo engo weeng'we mweesi. Olwohuba esikwiireo sino syeemere hu hudaha hwaange ese omweene.” Abo babeere sa nibali ohwooseresaanga amalako k'Omwaami, mani baahaya ohuchia ohulwaania Yerobboamu daawe.

Yerobboamu asitirira ebiko byae

⁵ Rehobboamu yadoong'a mu Yerusalemu mani niyoombaha ebisitirira ebiko bya Yuda neende Bbenjamini bino:

⁶ Bbetilehemu, Etaamu, Tekoa,

⁷ Bbetisuuri, Sooko, Adulaami,

⁸ Gaati, Maresa, Siifu,

⁹ Adoraimu, Lakisi, Aseka,

¹⁰ Soora, Aijalooni, neende Hebburoni

¹¹ Yabisita neende amaani mani yadoola omuhoongo wa buli situla, haandi mu buli situla yatechaanga ebyohulya, amafuta k'enaasi, neende efiini,

¹² haandi neende engabo neende amafumo. Mu ngira yino yanyala ohuliindiramo Yuda neende Bbenjamini byaaba mu bunyala bwae.

Abalaamisi neende Abaleefi beecha Buyudaaya

¹³ Ohutula mu syaalo syoosi esya Yisiraeli, abalaamisi neende abaleefi batulaanga emwaalo nibeecha mu Yuda.

¹⁴ Abaleefi balehaanga enjayiro chaabwe alala neende amaloba kaabwe mani nibachia mu Yuda neende mu Yerusalemu, olwohuba Omutuki Yerobboamu wa Yisiraeli neende abamuloondaho beene haba sibabakanyaanga bahalaabana koti abalaamisi b'Omwaami daawe.

¹⁵ Yerobboamu yadoola abalaamisi bae beene ohuba nibo abahalaabanaanga abuundu ataali obunadiini, haandi ebyeenamiraanga emisaambwa haandi neende ebiloongaloongwe bi yali niyaholaanga ebifwaana koti esurusi njere.

¹⁶ Ohutula mu nono choosi cha Yisiraeli, abaandu bali nibekoombera elalira ohwiinamiraanga Omwaami, Nasaae wa Yisiraeli, nibo abalondaanga Abaleefi nibachia mu Yerusalemu hu banyaleenge ohuyanaanga ebiyaanwa eyiri Omwaami, Nasaae wa bakuukaang'ene.

¹⁷ Sino syakera obwaami bwa Yuda bwomiira, mani hu mbaka y'emyaaka kidatu emilaamba, bali nibahoonyaanga sa Rehobboamu omwaana wa Solomooni mani baamenyaanga koti lu banyala aasi w'obutuki bw'Omutuki Daudi haandi neende Omutuki Solomooni.

Edaala lya Rehobboamu

¹⁸ Rehobboamu yadeehya Mahalati, yi laatang'ene yali Yerimooti omwaana wa Daudi, haandi yi ng'ina yali Abbihaili, owali omuhaana wa Eliabbu owali omwiichuhulu wa Yese.

¹⁹ Beebula abaana basyaani badatu, Yeusi, Semaria, neende Sahaamu.

²⁰ Luunyuma haandi yadeehya Maaka, owali omuhaana wa Abbusalomu, mani yeebula nae abaana basyaani bane: Abbija, Atai, Sisa, neende Selomiiti.

²¹ Alala, Rehobboamu yali neende abahasi ehumi neende bataanu-na-badatu, haandi neende abahasi b'erwaanyi, amahumi kasaasaba, mani yeebula abaana basyaani amahumi kabiri neende bataanu-na-badatu, neende abaana bahaana amahumi kasaasaba. Mu bahasi b'erwaanyi bae abo boosi, yali niyaheera Maaka ohuhiramo,

²² mani haandi Rehobboamu yadaha Abbija omwaana wae ohuhira abaana baandi boosi, yamudoola ohuba oyo ochia ohumukaluha mu makulu koti omutuki.

²³ Rehobboamu mu bukesi bwae yatumaanga obunyala abaana bae, mani yabatekehaanga mu Yuda neende mu Bbenjamini mu biko byae byasitwa. Yabakabaanga ebiindu neende omwooyo mulala, haandi yaabanyoleraanga abahasi baangi.