2 Ebyomubiha 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enono ch'emukulu chiheengao ohweekabula

¹ Rehobboamu yachia mu Sekemu, yi baandu ba Yisiraeli y'emukulu boosi bali nibebuusiire ohumwiihasa abe omutuki.

² Yerobboamu omwaana wa Nebbati, owali n'achiire Misiri ohwiiruha hu Mutuki Solomooni, niyawulira hu mboosi chino, yakobola bwaangu engo.

³ Abaandu b'enono ch'emukulu bamulaanga, mani boosi bachiira alala eyiri Rehobboamu mani nibaboola bati,

⁴ “Lataao yatudwiiha ebidinyu biingi muno. Nikali mbwe ewe naawe ochia ohwaanguya hooho obusito buno, mani haandi waahola obulamu bwatwanguyira hooho, efwe huba huchia ohuba abasuumba bao bawulisi.”

⁵ Rehobboamu nae yakobolamo ati, “Eng'we mu mberese hooho endaalo chidatu choong'ene mbaaseho hu siindu esyo. Mani muchia ohukobola yiindi haandi.” Mani abaandu basiingira bawaao.

⁶ Omutuki Rehobboamu wuno yacha mani yeteeba hu basaacha bahuluundu abali nibaholaanga koti abakeraki ba Solomooni laatang'ene ati, “Siina syeene si mudaha ese ngaluhe mu baandu bano?”

⁷ Nabo bamukobolamo bati, “Ewe nikali mbwe ochia ohubonera abaandu bano esisa mani oteemeho ohubasaangaasa n'obakabobolamo bulai, baba bachia ohuhuhalaabaniraanga neende obutiiririrwa.”

⁸ Nae yalekeeresa sa engeraka y'abasaacha bahuluundu abo mani naachia eyiri abaraaga bali amase kae haandi abahula nae abali nibali bulaanu koti abakeraki bae.

⁹ Yabateeba ati, “Siina syeene si eng'we mungeraka ohuhola? Ese njie mboolere abaandu bali ohusabaanga mbaanguyisire obulamu bano?”

¹⁰ Nabo bakobolamo bati, “Sino nisyo syooba ochie obaboolere oti: ‘Ese, ahaala haange h'abusyu hahomefu muno ohuhiraho esibuno sya laata yaange.’

¹¹ Baboolere oti, ‘Laata yaange yali niyabadwiihaho ebidinyu biingi; ese naange njia ohubisidoyia bihire ao. Yabasaamulaanga neende ehoba sa; nae ese naange njia ohubanaalaanga neende embariki ch'efaraasi!’ ”

¹² Endaalo chidatu nichabitao, Yerobboamu alala neende abaandu baandi boosi bakobola eyiri Omutuki Rehobboamu, koti lu yali naabakerakiire.

¹³ Omutuki oyo nae yalekeeresa sa engeraka y'abasaacha bahuluundu bala, mani yaalabira sa abaandu abo,

¹⁴ koti lu abaraaga bala bali nibamukerakiire. Yaboola ati, “Laata yaange yali niyabadwiiha ebidinyu ebiingi; nae ese njia ohubisidoyia ohuhiraho ao. Yabasaamulaanga neende ehoba sa; nae ese naange njia ohubanaalaanga neende embariki ch'efaraasi!”

¹⁵ Eyo yali ohudaha hw'Omwaami nihwo hu Nasaae anyale ohwooseresa bi yali n'aboleere Yerobboamu omwaana wa Nebbati ohubitira mu munabbi Ahija ohutula mu Silo. Sino nisyo esyakera omutuki yaahaya ohudeebaho hu baandu abo.

¹⁶ Abaandu abo nibabona bati omutuki oyo haba siyali n'abawuliire, beehuuma nibaboola bati, “Daudi akwe aasi, alala neende edaala lyae lyoosi! Siina syeene sibali nibatuholeraho? Eng'we abaandu ba Yisiraeli, lehe hweekobolereyo engo weefwe! Lehe Rehobboamu yehoonye omweene.” Mani abaandu ba Yisiraeli baanyala ohweehalaka,

¹⁷ baaleha Rehobboamu yaaba omutuki w'abaandu bali nibamenya mu syaalo sya Yuda boong'ene.

¹⁸ Bulaanu Omutuki Rehobboamu yatuma Adoniramu, owali n'ahuliraanga abahalaabani bayiike, bachie eyiri Abaisiraeli, nae baamuhuya neende amakina yaafwa. Esiha sino syeene, Rehobboamu yayuyuhana yaachia yeengira mu sigaari mani yeeruhira mu Yerusalemu.

¹⁹ Ohutula enyaanga eyo, abaandu b'obwaami bw'emukulu bwa Yisiraeli bwadoong'a nibweehalaka hu butuki bwa Daudi.