2 Abatuki 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Elisa yeenulula eyaywa mu maachi

¹ Olwoola, omukaanda kw'abanabbi okwali nikwamenya neende Elisa kwamwekanyiirisira kuti, “Bona, abuundu yi humenyere ano adiidi muno.

² Leha huchie hu mwaalo kwa Yorodaani, mani buli muundu hweefwe atemeyo omusaala mulala-mulala.” Elisa yakobolamo ati, “Mani muchie.”

³ Nae mulala hu abo yaboola ati, “Hwekongooya, fukiirira ochie naafwe.” Nae yakobolamo ati, “Mani hahuche.”

⁴ Mani Elisa n'achia nabo. Nae niboola hu mwaalo kwa Yorodaani, batema emisaala.

⁵ Nae mulala niyali naatema omusaala, eyaaywa yae yasabuha mu mwiini, mani yaakwa mu maachi. Omusaacha oyo yahubba wuuwi n'aboola ati, “Wuuwi ewe, omwaami waange eyaaywa yaabeene yaheebira mu maachi! Mbeere nisabire eyaaywa yino.”

⁶ Mani omuundu wa Nasaae n'ateeba ati, “Yikwiire yeena?” Nae nibamweekesa abuundu yi yaaywa eyo yali niyilakahiire mu maachi, Elisa yatema olusaala, yaalusukunira abweene ao mu maachi mani eyaaywa eyo yaatuumbuha yaabeenga.

⁷ Elisa yeemao yaaboola ati, “Muyiinululemo mani.” Mani owali naayisabire oyo niyeyeneeresa omuhono n'ayiinululamo.

Eye lya Siria liyiingirwa

⁸ Olwoola, omutuki wa Siria niyali nalwaanisa Abaisiraeli, yalomaloma neende abahunuufu bae, n'aboola ati, “Njia ohwoombaha ekaambi yaange abuundu yi ndoolere.”

⁹ Nae omuundu wa Nasaae yatuma emboosi eyiri omutuki wa Yisiraeli n'aboola ati, “Weliinde otabitiraho abuundu ano, olwohuba Abasiria bali beekisireo.”

¹⁰ Omutuki wa Yisiraeli yeemao yaatuma abaandu abuundu yi muundu wa Nasaae yali naamubooleere naamulabula. Elisa yalabulaanga omutuki wa Yisiraeli, mani niyewonia amahabi kayeraho.

¹¹ Mani Omutuki wa Siria naanyaahana mu bibaaso hulweesiindu sino; naalaanga abahalaabani bae naababoolera ati, “Wiina mweene hweefwe oli hu lwaande lw'omutuki wa Yisiraeli?”

¹² Mani mulala hu abo n'amukobolamo ati, “Abulao kata mulala, mwaami waange; ohutusaho Elisa, omunabbi oli mu Yisiraeli, niye obooleraanga omutuki wa Yisiraeli emboosi choolomalomaanga nooli mu siseenge syao.”

¹³ Mani omutuki wa Siria naalagira n'aboola ati, “Bakuuka mubone yi yamenya, ndumeyo abaandu bachie bamudiire.” Mani nibamuboolera bati, “Bona, ngaandi mbano ali sa ano mu Dotani.”

¹⁴ Mani naatumayo efaraasi neende ebigaari neende eye hoongo; nibachia esiro, nibebodoohania esiko esyo.

¹⁵ Nae omuhalaabani w'omuundu wa Nasaae oyo yasiingira echuli mu mabwiibwi, yaatula erwaanyi, nae bone, eye neende efaraasi neende ebigaari byali nibyebodoohaanie esiko esyo. Mani omuhalaabani wae oyo n'aboola ati, “Wuuwi, omwaami waange! Hunaahole hutye?”

¹⁶ Elisa yamukobolamo ati, “Otatyaaho kata budiidi, olwohuba abaandu bali olwaande lweefwe baangi muno ohuhira ba bali nabo.”

¹⁷ Elisa yasaba, n'aboola ati, “Ewe Omwaami, husaba endi omwaamule emoni mani olehe abone.” Omwaami yeemao yeekula emoni ch'omusyaani muraaga oyo, mani yaabona; nae bone, olugulu olwo lwali nilwichuuleho efaraasi neende ebigaari by'omuliro nibyebodoohaanie Elisa.

¹⁸ Nae Abasiria nibeecha ohumuseeta, Elisa yasaba Omwaami, n'aboola ati, “Ewe Omwaami, husaba, yofusa emoni ch'abaandu abo.” Mani Omwaami naawofusa emoni chaabwe, ohuchianakana neende ohusaba hw'Elisa.

¹⁹ Elisa yababoolera ati, “Yino haba siniyo engira, haandi sino sinisyo esiko; munoondeho, mani njia ohubayira eyiri omusaacha yi mukoonya.” Mani naabayira Samaria.

²⁰ Nae nibeengira sa mu Samaria bati, Elisa yaboola ati, “Omwaami, yamula emoni ch'abaandu bano, banyale ohubona.” Mani Omwaami niyaamula emoni chaabwe, nibabona; nae bone, bali nibali mukati wa Samaria.

²¹ Nae omutuki wa Yisiraeli niyababona, yaboolera Elisa ati, “Laata yaange, mbeete? Mbeete?”

²² Nae Elisa yakobolamo ati, “Haba, otabeeta daawe. Odaha ohubeeta koti bawaamba neende olugaanga lwao neende oluyiingo lwao? Baberese esyohulya neende amaachi, mani balye haandi bang'we mani bakaluheyo eyiri omwaami waabwe.”

²³ Mani omutuki wa Yisiraeli naabaholera esidyaalo sihoongo muno. Nae nibamala ohulya neende ohung'wa, omutuki yabaseebula baawaao, baachia eyiri omwaami waabwe. Mani ohutula olwo, Abasiria haba sibakobolayo haandi ohuyaaya mu syaalo sya Yisiraeli.

Abasiria baseeta Samaria

²⁴ Ebyo nibyawa, Bbenihadadi, omutuki wa Siria, yabuusa eye lyae lyoosi, yaachia yaaseeta esiko sya Samaria.

²⁵ Mani enjala y'amaani niyikwa mu Samaria, ohweema hu huseeta ohwo, ohwoola lu mutwe kw'esuhiri kwoola ohukulwa ebituundu by'efeesa amahumi kataanu-na-kadatu, haandi eguraamu emia chibiri eky'amasirikotyo k'eguugu nikakulwa ebituundu by'efeesa bitaanu.

²⁶ Bulaanu, omutuki wa Yisiraeli niyali naabita hu sida sy'esiko, omuhasi wuundi yamulirira n'aboola ati, “Hoonyeho, ewe omutuki, omwaami waange!”

²⁷ Nae omutuki naamukobolamo ati, “Omwaami naatahuhoonya, ese niise wiina onaahuhoonye? Ndaatuse yeena eby'ohuhuhoonya ese syesi nitaaliho neende obusye mu sibbaahiro oba efiini mu sihunyiro?”

²⁸ Mani omutuki n'amuteeba ati, “Siina syeene esidinyu?” Nae omuhasi oyo naakobolamo ati, “Omuhasi wasyaange wuno yamboolere ati, ‘Leeta omwaana wao musyaani, humulye enyaanga yino, nae omwaana waange musyaani hunaamulye muchuli.’

²⁹ Mani nihudeeha omwaana waange musyaani, nihumulya. Nae nibwahya, ndamuboolera endi, ‘Leeta omwaana wao musyaani, humulye’; nae bulaanu akisire omwaana wae musyaani.”

³⁰ Nae omutuki niyawulira emboosi chi muhasi oyo yalomaloma, yataandula ebyefwaalo byae hulw'engisa. Bulaanu omutuki yali n'akeenda naabita hu sida sy'esiko, nae abaandu nibatingaala, nae bone, yali niyefwaalire ebigunia hu mubiri kwae

³¹ mani n'aboola ati, “Leha Nasaae yasaandye neende obwalaba atyo, Elisa omwaana wa Safati n'atatemwaho omutwe enyaanga yino.”

³² Ebiha ebyo, Elisa yali niyehaale mu nyuumba yae, neende abahuluundu baandi bosi bali nibehaale nae. Bulaanu omutuki yali naatumire omusaacha wuundi ohutula yaali; nae wamwaanda oyo niyali n'asisiiri ohwoola, Elisa yaboolera abahuluundu abo ati, “Mubona koti omwiiti wuuno atumire omuundu ohwiicha ohuundemaho omutwe? Bone, wamwaanda niyoola, eng'we mwiikaleo sa olwiiki, mulwomiise ahaye ohwiingira. Omutuki mweene yesi aneecha n'amuloondaho enyuma.”

³³ Nae niyali naasilomalomaanga, omutuki yamwoolaho mani n'aboola ati, “Ebidinyu bino bitula eyiri Omwaami! Lwasiina haandi ndemeeda ohuliinda si Omwaami anaahole?”