2 Abatuki 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Elisa ahoonya omuhasi mufwiirwe mumanani

¹ Olwoola, omuhasi mufwiirwe wa mulala hu basyaani b'omukaanda kw'abanabbi bali neende Elisa, yamulirira yaamuboolera ati, “Omuhalaabani wao, wamwaange yafwa; haandi omanyire koti omuhalaabani wao oyo yali niyeesa oluyaali muno mu Omwaami. Bulaanu omuundu wali naamubaanja yeechere ohuyira abaana baange babiri ohuba abawaambe bae.”

² Nae Elisa yamuteeba ati, “Odaha huholereho siina? Mboolere; oliho neende siina syeene mu nyuumba yao?” Yakobolamo ati, “Ese omuhalaabani wao mbulaho neende esiindu syoosi mu nyuumba, ohumalaho enjaagi yilihoomo otufuta.”

³ Elisa yamuboolera ati, “Chia eyiri abaasyo boosi mani obasabe hooho amabbuka mahoongo kayeraho akataalihoomo esiindu.

⁴ Mani mwiingire mu nyuumba yao, mweeyikaliremo, ewe neende abaana bao, mani mudoonyeenge otufuta otwo mu buli bbuka hoongo; mani buli liichula, nimulisudya ebuleka.”

⁵ Omuhasi oyo yatula eyiri Elisa, yaachia mu nyuumba yae yeeyikaliramo alala neende abaana bae; yaabukula ahabbuka halimo otufuta aho, mani yaatudoonyaanga mu mabbuka mahoongo k'abaana bae bamuleeteraanga.

⁶ Nae amabbuka mahoongo ako koosi nikali nikechuule, yaboolera omwaana wae ati, “Leeta ebbuka liindi.” Nae yamuboolera ati, “Amabbuka koosi kaweereo.” Mani amafuta nikaakamira ao ohudoonya.

⁷ Omuhasi oyo yeemao yaachia yaaboolera Elisa omuundu wa Nasaae ebiindu ebyo byoosi. Mani Elisa yaamuboolera ati, “Chia okuse amafuta ako otuunge ekobi lyooli nalyo, mani akadoong'aho kabahoonye, ewe neende abaana bao.”

Elisa neende omuhasi muyiinda ohutula mu siko sya Suneemu

⁸ Olwoola, Elisa yachia mu Suneemu, yi muhasi muyiinda wuundi yali niyamenya; mani omuhasi oyo yamwekweedaanga ohulichaanga ewae. Mani ohutula hu ludaalo olwo, buli lu Elisa yachichaanga eyo, yabitiraanga ew'omuhasi oyo n'anyoola esyohulya.

⁹ Omuhasi oyo yoola yaaboolera wamwe ati, “Bona, bulaanu malire ohumanya endi omusaacha obitiraanga ano buli siha wuno, muundu wa Nasaae niye.

¹⁰ Lehe humwoombahire esiseenge sidiidi hu goroofa yeefwe yino, mani humuteeremo esitaanda, emeesa, esisaala, neende etaara. Mani buli lu anaatukeniyeenge, aneeyaliseenge omwo.”

¹¹ Olwoola, Elisa yakobola Suneemu, yeengira mu siseenge omwo yaawuluuhiramo.

¹² Elisa wuno yeemao yaaboolera Gehaasi omuhalaabani wae ati, “Naangire omuhasi Musuneemu oyo yeecheho mberi.” Nae niyamulaanga, omuhasi oyo yeecha, yeema mu moni wa Gehaasi.

¹³ Elisa yaboolera Gehaasi ati, “Muboolere oti, ‘Bona, otuyaahaniire muno. Ali hoo esiindu si wadaha huhuholereho kose? Siriwo esiindu si wahadaha huhusabireho eyiri omutuki oba eyiri omusikaari wiimirira eye lyae?’ ” Omuhasi oyo nae yakobolamo ati, “Ese ndamenya mu baandu baange beene.”

¹⁴ Elisa nae yeemao yaateeba Gehaasi ati, “hunaamuholere siina syeene bulaanu?” Gehaasi yakobolamo ati, “Omuhasi wuno abulaho neende omwaana, haandi omusaacha wae mukofu niye.”

¹⁵ Mani Elisa naaboolera Gehaasi ati, “Mulaange yeecheho haandi.” Nae Gehaasi niyamulaanga, omuhasi oyo yeecha mani yaakamira amwiingira.

¹⁶ Elisa yeemao yaamuboolera ati, “Muhasiing'ene, ebiha koti bino, mu mwaaka kwiicha, wahabe noolera omwaana wao w'esisyaani.” Nae omuhasi oyo yamukobolamo ati, “Haba daawe, ewe omwaami waange, oli omuundu wa Nasaae; otaabacha ese omuhalaabani wao.”

¹⁷ Mani omuhasi oyo yeemao yaanyoola amabaanga, mani yeebula omwaana musyaani, mu biha byeene ebyo omwaaka kwaloondaho koti lu Elisa yali naamuboolere.

¹⁸ Nae emyaaka nikyabita hoo, mu biha by'ekesa, omwaana chana oyo yeemao yaachia eyiri laatang'ene yi yali mu ndalo alala neende abaandu bali nibali ohuhoonyaanga ohukesa emere.

¹⁹ Mani omwaana oyo naalirira laatang'ene n'aboola ati, “Omutwe kuunjita, omutwe kuunjita!” Nae laatang'ene yaboolera omuhalaabani wae ati, “Mukiinge omuyire lwaangu eyiri ng'ina.”

²⁰ Omuhalaabani oyo yeemao yaamukiinga yaamuyira eyiri ng'ina yaamulera hu makulu ohwoola esaa chisaasaba, mani omwaana oyo naafwa.

²¹ Omuhasi oyo yeemao yaakiinga omulaambo okwo yaakwaalisa hu sitaanda sy'omuundu wa Nasaae oyo, yaakwiikaliramo, mani yeetulira erwaanyi.

²² Omuhasi oyo yachia yaalaanga wamwe yaamuboolera ati, “Tuma mulala hu bahalaabani bao neende ndala hu suhiri chao, njie bwaangu eyiri omuundu wa Nasaae, mani ngobole haandi.”

²³ Nae wamwe yamuteeba ati, “Siina syeene esikera noochia yaali enyaanga yino? Nyaanga yino haba si ludaalo luhuluundu, lu mwoosi kutuliraho, haandi haba si ludaalo lwa Sabbaato nilwo.” Nae omuhasi oyo yamukobolamo ati, “Otadeebayo daawe, nae leha sa njie.”

²⁴ Bulaanu Omuhasi oyo yaala obwiihalo hu suhiri, mani yaaboolera omuhalaabani wae ati, “Yirusa esuhiri yino embiro cheene; otayiyira kaala ohutusaho niihuboolera.”

²⁵ Mani yasiingiraniramo yaachia eyiri omuundu wa Nasaae hu lugulu lwa Karimeeli. Nae omuundu wa Nasaae niyabonera eyale omuhasi oyo niyeecha yaali, yaboolera Gehaasi omuhalaabani wae ati, “Bona, omuhasi Musuneemu ngula yeecha;

²⁶ yiruha bwaangu ochie omubukaanire, omuteebe oti, muliyo abalamu? Wamwo yesi aliyo omulamu? Omwaana wao yesi aliyo omulamu?” Mani omuhasi naakobolamo ati, “Eee boosi balamu sa.”

²⁷ Nae niyoola hu lugulu eyiri omuundu wa Nasaae, omuhasi oyo yadiira hu makulu k'Elisa. Nae Gehaasi yali aambi ohumuhweesa amutuseyo. Nae Elisa yamuboolera ati, “Mulehe abe, olwohuba ali neende esibeera siingi; haandi Omwaami asiingisire yaahaya ohusiinduumbulira.”

²⁸ Omuhasi oyo yeemao yaamuteeba ati, “Niise owahusaba omwaana musyaani? Haba sindahubooleraho endi, otabacha omuhalaabani wao?”

²⁹ Mani Elisa naaboolera Gehaasi ati, “Yanguyaho bwaangu, obukule endawusi yaange mani ochie neende omuhasi wuno. Nae niwiichuhana waabukaanana neende omuundu yeesi hu ngira, omaanyaanga omuheesa. Haandi omuundu yeesi naahuheesa, omanyaanga omukaluhamo. Nae niwoolayo, noobukula endawusi yaange eyo oyigeeng'a hu bweeni bw'omwaana oyo.”

³⁰ Mani omuhasi n'aboola ati, “Mubwadyeeri bweene, koti lu Omwaami ali omulamu haandi koti lu weesi oli omulamu, haba siindatula ano nihutaali naawe.”

³¹ Mani Gehaasi yeemisamo yaachia yaageeng'a endawusi y'Elisa eyo hu bweeni bw'omwaana oyo, nae omwaana chana yaahaya ohudeengaanaho oba kata sa ohwesiinduhaho. Gehaasi yakobolayo mani yaabukaanana neende Elisa, yaamuboolera ati, “Omwaana wula ahayire ohusiingira.”

³² Nae Elisa niyoola mu daala elyo, yeengira mu siseenge syae, yaabona ati omwaana oyo yali naafwiire, haandi nibaaliise omulaambo kwae hu sitaanda sy'Elisa.

³³ Elisa mani niyeyikalira mu siseenge esyo nadoong'amo yeeng'ene neende omwaana oyo, mani naasaba Omwaami.

³⁴ Yachia yeeyalisa hu mulaambo kw'omwaana oyo, n'ageeng'a omunwa kwae hu munwa kw'omulaambo, yaageeng'a emoni chae hu moni chakwo, haandi kae yaageeng'a mahono kae hu mahono kakwo; yaakweeyalisaho, mani omubiri kw'omwaana oyo kwaachaaka ohubala.

³⁵ Elisa yeemao yasiingira, yaachaaka ohukeenda-keendaho mu nyuumba omwo, haandi yaakobolayo ohweeyalisa hu mubiri kw'omwaana oyo. Omwaana oyo yeemao yaasamula amahabi kataanu-na-kabiri, mani omwaana yaaliimbula emoni.

³⁶ Elisa yeemao yaalaanga Gehaasi yaamuboolera ati, “Naangireho ng'ina mwaana wuno yeecheho.” Mani Gehaasi naamulaanga. Nae omuhasi Musuneemu oyo niyeengira, Elisa yamuboolera ati, “Bukula omwaana wao nguyo.”

³⁷ Omuhasi oyo yeemao yaakwa mu makulu k'Elisa, yaaguunama yoosa omutwe kwae aasi; mani yaasiingira yaakiinga omwaana wae yeetulira erwaanyi.

Eby'amayia biindi bibiri

³⁸ Elisa haandi yatulao yaakobola mu Giligaali enjala niyikwiire mu syaalo syoosi. Mani niyali naali ohweekesaanga omukaanda kw'abanabbi kwali nikwihaale mu moni wae, Elisa yaboolera omuhalaabani wae oyo ati, “Bukula enuungiro hoongo oyite hu mayika mani obadeehereho esyohulya.”

³⁹ Mulala hu bahalaabani bae yachia mu siino ohukoonyaho ebyaamo, yaanyoolayo emisabbiibbu kyomu siino mani yaakinokaho ebyaamo byahwo yeechusa esikono mani yaabiheengera mu nuungiro yirimo ebyohulya, nae haba siyali naamanyire.

⁴⁰ Mani baabiinulira abasaacha abo ohubilya. Nae nibali nibabihoombaho sa bati, balira muno nibaboola bati, “Ewe omuundu wa Nasaae, mu nuungiro omwo mulimo obutwa!” Mani baahaya ohuchiiririra ohubilya.

⁴¹ Nae Elisa yaboola ati, “eng'we muleete ebyohulya ebyo ano.” Yabichuha mu nuungiro, n'aboola ati, “Mubiinulire abasaacha bano, babilye.” Mani ebyohulya ebyo nibilyooya.

⁴² Yaliwo omusaacha wuundi ohutula Bbali-salisa, n'aleetera omuundu wa Nasaae emigaati amahumi kabiri eky'amabere masuungu kataangira, neende egunia ly'amadiimwa maangafu. Mani Elisa n'aboola ati, “Biberese abasaacha abo balye.”

⁴³ Nae omuhalaabani wae n'aboola ati, “Ndaakabule endye ebiindu bino hu baandu emia ndala?” Nae Elisa naakobolamo ati, “Ewe baberese balye sa batyo, olwohuba Omwaami aboola ati, ‘Bachia ohulya bibahaye ohumala.’ ”

⁴⁴ Mani omuhalaabani oyo n'abeenulira ebyohulya ebyo. Mani nibalya, ebiindi nibidoong'aho, ohuchianakana neende Emboosi y'Omwaami.