2 Abatuki 21 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Manaase omutuki wa Yuda

¹ Manaase yachaaka ohutuka naali neende emyaaka ehumi neende kibiri eky'obuhuluundu, naatukira mu Yerusalemu embaka y'emyaaka amahumi kataanu neende kitaanu. Eliita lya ng'ina lyali Hefusiba.

² Manaase yeemao yaahola ebiindu bibi muno mu moni w'Omwaami, ohuchianakana neende ebiindu byomukwoobo by'abaandu ba Omwaami yeerusa ohutula mu syaalo esyo Abaisiraeli nibasisiiri ohwoola.

³ Olwohuba Manaase yoombaha buyaaha ebyeembeho bihoongo bi bakafiiri beenamiraangamo, bi Hesekia laatang'ene yali naasihiriise. Haandi yoombahira Bbaali alutaari, mani yaahola esifwaanani sya nasaae muhasi olaangwa ati Asera, koti lu Ahabbu omutuki wa Yisiraeli yali niyahola. Manaase mulala oyo yeenamiraanga eng'ining'ini chomu kulu, haandi yaachihalaabaniraanga.

⁴ Manaase yoombaha alutaari nyiingi mu nyuumba y'Omwaami, chi Omwaami yalomalomaangaho n'aboola ati, “Mu Yerusalemu nimwo mu bachia ohunyinamiraanga.”

⁵ Mani yoombahira eng'ining'ini chomu kulu alutaari mu nyanyi chibiri echomu Nyuumba y'Omwaami.

⁶ Haandi yasaamba omwaana wae musyaani koti esiyaanwa sisaambwa. Mani yaachaaka ohweteebaanga hu balakusi neende hu b'amayia, haandi naaholera alala neende abalosi n'abalakusi. Manaase yonoona muno mu moni w'Omwaami, ebyakera etima ly'Omwaami lyaasaanguluha.

⁷ Esifwaanani sya nasaae muhasi olaangwa ati Asera, si Manaase yahola, yeemao yaasita mu nyuumba yi Omwaami yaboolera Daudi neende omwaana wae Solomooni ati, “Mu nyuumba yino, neende mu Yerusalemu, esiko si ndadoola mu nono chia Yisiraeli choosi, nimwo mu bachia ohunyinamiraanga endaalo choosi.

⁸ Haandi sindahakereho Abaisiraeli baayiikaana nibatula mu syaalo si ndaberesa bakuuka yaabwe, nibanaatecheenge emyooyo kyaabwe hu huhola ebyo byoosi ebichianakana neende bi ndabalagira ohuhola, neende amalako koosi k'omuhalaabani waange Musa yabalagira.”

⁹ Nae haba sibawulira Omwaami, haandi Manaase yakera bonoona ohuhiraho ebyaalo biindi, bi Omwaami yasihirisa Abaisiraeli nibasisiiri ohwoola.

¹⁰ Omwaami naabitira mu bahalaabani bae, abanabbi, yeemao yaaboola ati,

¹¹ “Olwohuba Manaase omutuki wa Yuda aholere ebiindu by'omusiro bino, haandi yaahola ebiindu bibi ohuhiraho bi Baamoori bamutaangira ohubaao bahola, mani yaakera neende Abayudaaya bosi bonoona nibeenamira ebiloongaloongwe byae.

¹² Sakira Omwaami, Nasaae wa Yisiraeli aboola ati, Bone, njia ohukwiisa amasira hu Yerusalemu neende Yuda, mani buli muundu onasibulireengeho, amatwi kae kanaachwileenge sa.

¹³ Ndahasaandye Yerusalemu koti lu ndasaandya Samaria, koti lu ndasaandya omutuki wa Yisiraeli Ahabbu neende olwiibulo lwae. Haandi njia ohusihirisa abaandu bomu Yerusalemu mbamaleo boosi bwaangu koti omuundu yahasimuula esaani. Koti lu yahachisimuula mani yaamala yaachifuumamia.

¹⁴ Ndaheebwaabe abaandu baange abahabe nibawonereo, mani ndaabaleha mu bunyala bw'abasuku baabwe. Abasuku baabwe bahabayiingire haandi bahayaaye emyaandu kyaabwe;

¹⁵ olwohuba bonoona mu moni waange haandi basiingisa etima lyaange, ohuchaakira hu ludaalo lu bakuuka yaabwe batulira mu syaalo sya Misiri, ohwoolera elalira buti.”

¹⁶ Haandi esiindi, Manaase yeeta abaandu baangi muno, ohwoola lu yechusira Yerusalemu mwoosi amabaanga k'abaandu babulaho omusaango. Ohumeeda hu sino, Manaase yali naakerere Abayudaaya nibonoonere mu moni w'Omwaami.

¹⁷ Bulaanu ebiholwa bya Manaase biindi, neende ebiindu byoosi bi yahola, neende esyonoono si yahola, byandiikwa mu sitabo sya Ebyaliwo by'abatuki ba Yuda.

¹⁸ Manaase yafwa mani baamusiiha mu ndalo yomu dooho lyae, mu ndalo ya Wusa; mani Amoni omwaana wae yaamukobola mu makulu koti omutuki.

Amoni omutuki wa Yuda

¹⁹ Amoni yachaaka ohutuka Yuda naali neende emyaaka amahumi kabiri-na-kibiri eky'obuhuluundu, mani yaatuka emyaaka kibiri naali mu Yerusalemu. Ng'ina Amoni yali alaangwa ati Mesulemeti, omuhaana wa Harusi, ohutula Yotibba.

²⁰ Amoni wuno yesi yahola ebiindu bibi muno mu moni w'Omwaami, koti lu Manaase laatang'ene yaholaanga.

²¹ Amoni yaloondakana neende ebiholwa bibi bya laatang'ene yahalaabaniraanga ebiloongaloongwe bi laatang'ene yahalaabaniraanga, haandi yeenamiraanga ebiloonge ebyo.

²² Sino syakera yeetusa hu Omwaami, Nasaae wa bakuukaang'ene, haandi yaahaya ohuloondakanaanga neende ebilagiro by'Omwaami.

²³ Abahalaabani b'Amoni beemao baaholera alala ohumulyaamo olukwe, mani baamwiitira mu dooho.

²⁴ Nae abaandu bomu syaalo esyo beeta abaandu baholera alala ohulya mu mutuki Amoni olukwe boosi, mani beemao baahola Yosia omwaana w'Amoni ohuba omutuki wa Yuda mu makulu k'Amoni laatang'ene.

²⁵ Bulaanu ebiindu biindi bi Amoni yahola, byaandiikwa mu sitabo sya Ebyaliwo by'abatuki ba Yuda.

²⁶ Amoni yasiihwa mu ng'ani yae mu mukuunda kwa Wusi, mani Yosia omwaana wae naamukaluha mu makulu koti omutuki.