2 Abatuki 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ahasi omutuki wa Yuda

¹ Mu mwaaka kw'ehumi neende hataanu-na-habiri okw'obutuki bwa Peeka omwaana wa Remalia, Ahasi omwaana wa Yotamu, omutuki wa Yuda yachaaka ohutuka.

² Ahasi yali naali neende emyaaka amahumi kabiri ak'obuhuluundu n'achaaka ohutuka, mani naatukira mu Yerusalemu embaka y'emyaaka ehumi neende chisaasaba. Haba siyahola ebiindu bilai mu moni w'Omwaami Nasaae wae, koti lu kuukaang'ene Daudi yahola,

³ nae Ahasi yaloondakana neende ebyonoono by'abatuki Baisiraeli. Kata Ahasi yasaamba omwaana wae koti esiyaanwa, ohuchianakana neende emikwoobo mibi ch'abaandu bomu syaalo esyo baandi ba Nasaae yeerusamo Abaisiraeli nibasisiiri ohubaamo.

⁴ Ahasi yayaana ebiyaanwa haandi yaniooheseraanga obubbaani abuundu ahuluundu aw'ohwiinamiraangamo, neende hu bigulu, neende mu bisina bya buli musaala muhoongo.

⁵ Ao mani Resini omutuki wa Siria neende Peeka omwaana wa Remalia, omutuki wa Yisiraeli nibachaaka ebiita hu Yerusalemu, nibebodoohania Ahasi, nae nibatanyala ohumiyiingira.

⁶ Mu biha byeene ebyo, omutuki wa Edomu yakalusira Edomu esiko sy'Elati niyeerusa Abayudea ohutula mu Elaati; mani Abaedomu nibeecha nibamenya mu Elaati, yi bali ohwoola Bulaanu buti.

⁷ Ahasi yatuma bawamwaanda eyiri Tigilati-pileseri, omutuki wa Asiria n'aboola ati, “Ese ndi omuhalaabani wao haandi omwaana wao. Yicha eno wuunjabine ohutula mu mahono k'omutuki wa Siria neende mu mahono k'omutuki wa Yisiraeli, abali ohuseeta.”

⁸ Ahasi yabukula efeesa neende esaabbu yi yanyoola mu nyuumba y'Omwaami neende mu bibiihiro byomu nyuumba y'omutuki, mani yaabiyira koti esiyaanwa eyiri omutuki wa Asiria.

⁹ Omutuki wa Asiria yafukiirira ebyae ebyo. Omutuki w'Asiiria oyo yaseeta esiko sya Damasiko, yaasiwaamba, yeeta Resini, mani yaayira abaandu bamwo mu Kiri koti ababoye.

¹⁰ Nae omutuki Ahasi niyachia Damasiko ohubukaanana neende Tigilati-pileseri omutuki wa Asiria, yabona alutaari eyali Damasiko. Mani omutuki Ahasi naatumira Wuria omulaamisi esifwaanani sy'alutaari eyo, esyeekesa engeri yi yaholerwamo.

¹¹ Wuria omulaamisi niyoombaha alutaari, ohuchianakana neende ebiindu byoosi bi mutuki Ahasi yamutumira ohutula Damasiko, Wuria yamala ohwoombaha alutaari eyo omutuki Ahasi n'asisiiri ohutula Damasiko.

¹² Nae omutuki niyatula Damasiko, yabona alutaari eyo. Yasuda aambi neende alutaari eyo, yaachia yaayiyaaniraho ebiyaanwa.

¹³ Yasaambiraho ebiyaanwa byae bisaambwa neende ebiyaanwa by'emwo y'ebyohulya byae, mani yaachuhaho ebiyaanwa by'ohung'wa haandi yaachuhaho amabaanga k'esiyaanwa sy'ohusaasania.

¹⁴ Nae alutaari y'ebikomo eyali niyabereswa Omwaami, eyali akatikaati w'alutaari yae njaaha neende enyuumba y'Omwaami, Ahasi yayitusa mu moni w'Enyuumba ya Nasaae mani yaayita hu lwaande lw'emukulu lw'alutaari yae.

¹⁵ Mani omutuki Ahasi n'alagira Wuria omulaamisi, n'aboola ati, “Hu alutaari hoongo yino, nihwo hu oba osaambire esiyaanwa sy'echuli, neende esiyaanwa sy'emwo sy'engoloobe, neende esiyaanwa sy'omutuki sisaambwa, neende esiyaanwa syae sy'emwo, neende esiyaanwa sisaambwa esy'abaandu boosi, neende esiyaanwa syaabwe sy'emwo, neende ebiyaanwa byaabwe by'ohung'wa. Mani yanyaho amabaanga k'ebiyaanwa bisaambwa byoosi, neende amabaanga k'ebiyaanwa byoosi; nae alutaari y'ebikomo yinabecheenge eyaange y'ohweteeberaho eyiri Omwaami.”

¹⁶ Wuria omulaamisi yahola sa buli siindu koti lu omutuki Ahasi yali naamulagiire.

¹⁷ Omutuki Ahasi yatema amakulu hu biteeni byali nibyehoonyerwaanga mu nyuumba yohwiinamiramo, haandi yaatusamo ebbeseeni chaliho. Yatusa okutaangi hu surusi ky'ebihomo echali aasi wakwo, yaakuta hu musiingi kw'amakina mapaange.

¹⁸ Ahakira hasite h'ohubitaho hu ludaalo lwa Sabbaato ahali nihoombahwa muukati w'edooho, neende omulyaango kw'erwaanyi ku mutuki yabitiraangamo n'achia mu nyuumba y'Omwaami, omutuki Ahasi yabitusayo, olwohuba yadaha ohusaangaasa omutuki wa Asiria.

¹⁹ Bulaanu ebiholwa bya Ahasi biindi bi yahola, byaandiikwa mu sya Ebyaliwo by'abatuki ba Yuda.

²⁰ Mani Ahasi naafwa, nibamusiiha alala neende bakuukaang'ene mu siko sya Daudi; Hesekia omwaana wae niye owamukobola mu makulu koti omutuki.