2 Abatuki 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yehoahasi omutuki wa Yisiraeli

¹ Mu mwaaka kw'amahumi kabiri neende kidatu okw'obutuki bwa Yoasi omwaana wa Ahasia, Yehoahasi omwaana wa Yehu yachaaka ohutukira Yisiraeli mu Samaria, mani yaatuka hulw'embaka y'emyaaka ehumi neende kitaanu-na-kibiri.

² Yehoahasi yahola ebiindu bibi mu moni w'Omwaami, yaaloondakana neende ebyonoono bya Yerobboamu omwaana wa Nabbati, ebyakwiisa Yisiraeli mu syonoono; mani yaahaya ohulehana neende ebyonoono ebyo.

³ Sino syasiingisa etima ly'Omwaami eyiri Yisiraeli, mani yaaleha Hasaeli omutuki wa Siria neende omwaana wae Bbenihadadi beemeeda ohuyiingiraanga Yisiraeli buli siha.

⁴ Yehoahasi yeemao yekweeda Omwaami, mani Omwaami yaamuwulira, olwohuba yabona koti lu mutuki wa Siria yali naayira Abaisiraeli bubi.

⁵ (Sakira Omwaami yaberesa Abaisiraeli omuwonia, hu baanyala ohutuswa mu mahono ka Abasiria, mani baamenya mu madaala kaabwe ataali obudinyu bwoosi koti lu bali hale.

⁶ Nae kata katyo, haba sibalehanaho neende ebyonoono by'ab'enyuumba ya Yerobboamu, ebyakera Yisiraeli syonoona, nae bemeeda sa ohubikeenderaangamo. Haandi esifwaanani sy'Asera nasaae muhasi syadoong'a sa nisiri mu Samaria.)

⁷ Olwohuba Yehoahasi haba siyadoong'yaho eye lyoosi ohutusaho abeerusi b'efaraasi amahumi kataanu neende ebigaari ehumi, neende abasikaari elifu ehumi abakeenda n'amakulu; olwohuba omutuki wa Siria yali naasihiriise abaandi boosi, naabaseenakiire koti olufu.

⁸ Bulaanu ebiholwa bya Yehoahasi biindi, neende ebiindu biindi bi yahola byoosi, neende obunyala bwae, byaandiikwa mu sitabo sya Ebyaliwo by'abatuki ba Yisiraeli

⁹ Mani Yehoahasi naafwa, nibamusiiha mu Samaria; mani Yehoasi omwaana wae naamukobola mu makulu koti omutuki.

Yehoasi omutuki wa Yisiraeli

¹⁰ Mu mwaaka kw'amahumi kadatu neende hataanu-na-habiri eky'obutuki bwa Yoasi omutuki wa Yuda, Yehoasi omwaana wa Yehoahasi yachaaka ohutuka Yisiraeli naali mu Samaria, mani yaatuka Yisiraeli hulw'embaka y'emyaaka ehumi na chisaasaba.

¹¹ Yehoasi yeesi yahola ebiindu bibi mu moni w'Omwaami. Haba siyalehanaho neende ebyonoono bya Yerobboamu omwaana wa Nabbati, ebyakera Yisiraeli syonoona, mani syaaloondakana neende ebyonoono ebyo.

¹² Bulaanu ebiholwa bya Yoasi biindi, neende ebiindu biindi bi yahola byoosi, neende obunyala bwae bu yalwaanisira Amasia omutuki wa Yuda byaandiikwa mu Sitabo sya Ebyebyaliwo by'Abatuki ba Yisiraeli.

¹³ Yoasi yafwa, Yerobboamu wohubiri yaamukaluha mu makulu koti omutuki wa Yisiraeli. Yehoasi yasiihwa mu Samaria yi basiihaanga abatuki ba Yisiraeli baandi.

Ohufwa hw'Elisa

¹⁴ Elisa yeemao yaalwaala obulwaae bwatuliramo ohufwa hwae. Niyali n'akwiisa omwooyo Yehoasi omutuki wa Yisiraeli yachia yaali ohumubona, mani yaalirira mu moni wae n'aboola ati, “Laata yaange, laata yaange! Niiwe obeere ebigaari bya Yisiraeli haandi omwiirusi w'efaraasi chasyo!”

¹⁵ Elisa nae naamuboolera ati, “Bukula oluyiingo neende olusaale”; mani yaahola atyo.

¹⁶ Elisa yaboolera omutuki wa Yisiraeli oyo ati, “Hweesa oluyiingo olwo”; yaluhweesa. Elisa yageeng'a amahono kae hu mahono k'omutuki oyo.

¹⁷ Elisa yeemao yaamuboolera ati, “Yikulao edirisa litingaalire ebukwe” mani yaaliikulao. Elisa yamuboolera ati, “Lasa olusaale”; omutuki mani n'alulasa. Elisa yaboola ati, “Olusaale lw'Omwaami olwo lw'obuyiingiri, olusaale olwo nilwo olucha ohuyiingira Siria! Olwohuba ochia ohulwaanisira Abasiria mu Afeki ohwoola lwonaabamalireo boosi.”

¹⁸ Elisa yamuboolera ati, “Lasa olusaale” mani n'alubukula. Yaboolera omutuki wa Yisiraeli ati, “Bulase hu loba”; mani omutuki oyo naabulasa hu loba amahabi kadatu koong'ene.

¹⁹ Nae omuundu wa Nasaae oyo yanyoolerera omutuki, yaamuboolera ati, “Oba olasire amahabi kataanu noomba kasaasaba. Ao oba wahahuyire Abasiria ohwoola lu wahabasihirisiire elalira, nae bulaanu ohuyire aasi amahabi kadatu koong'ene.”

²⁰ Elisa yeemao yaafwa, mani baamusiiha. Bulaanu emikaanda ky'Abamoabbu kyaseetaanga esyaalo sya Yisiraeli buli mwaaka mu biha by'etoocho.

²¹ Olwoola, Abaisiraeli bali hu masika nibasiiha omuundu, nae bone, omukaanda kw'Abamoabbu kwatulayo, mani abaandu baasukuna omulaambo kw'omufu mu ng'ani ya Elisa mani beeyiruhira. Nae omulaambo okwo nikwegeeng'a hu makuumba ka Elisa sa kuti, omusaacha mufu oyo yalamuha, yaasiingira yeema.

Ohulwaana akatikaati wa Yisiraeli neende Siria

²² Bulaanu, Hasaeli omutuki wa Siria yayira Abaisiraeli bubi muno mu ndaalo cha Yehoahasi.

²³ Nae Omwaami yabakwiira esisa, yaabalehera. Yabakwiira, olwohuba yali niyahola endagaano neende Abburahamu, Yisaka neende Yakobbo, mani haba siyahabasihiriise; noomba yaabasukuna ohutula mu moni wae ohwoola buti.

²⁴ Nae Hasaeli, omutuki wa Siria niyafwa, Bbenihadadi, omwaana wae niye owamukobola mu makulu koti omutuki.

²⁵ Nae Yehoasi omwaana wa Yehoahasi yeemao yaayiingira Bbenihadadi omwaana wa Hasaeli mani yaamutusaho ebiko bi yali naatusire hu Yehoahasi laatang'ene, mu biita. Yehoasi yayiingira Bbenihadadi amahabi kadatu, mani yaakobosao ebiko bya Yisiraeli.