2 Abatuki 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olwiibulo lw'Ahabbu lwiitwa

¹ Bulaanu Ahabbu yali neende abaana basyaani amahumi kataanu-na-kabiri mu Samaria. Yehu mani niyaandiika Ebbarwa, nichiyirwa Samaria eyiri abatuki b'esiko esyo, eyiri abahoongo neende eyiri abaliindi b'abaana ba Ahabbu, n'aboola ati,

² “Mani bulaanu, nimunyoola ebbarwa yino sa muti, nimuli alala neende abaana basyaani b'omwaami weeng'we, haandi nimuli neende ebigaari neende efaraasi, neende ebiko bisite byosi, alala neende ebilwaaniso,

³ mudoolemo omwaana wa Ahabbu ohiramo obulai haandi ohoyera, mani mumwiihase hu sisaala sya laatang'ene abe omutuki, haandi mulwaanire abomu nyuumba y'omwaami weeng'we.”

⁴ Nae nibasoma Ebbarwa eyo, batya muno, mani baaboola bati, “Bone, nikali mbwe abatuki babiri haba sibanyalire ohumuyiingania, nae niifwe abanaanyale?”

⁵ Mani omuundu ohulira edooho, neende oyo ohulira esiko, alala neende abahoongo neende abaliindi, batumira Yehu emboosi nibaboola bati, “Huli abahalaabani bao, haandi huchia ohuhola buli siindu syoonatulagira. Haba sihucha ohubaaho neende omuundu yi hunaahole omutuki; ewe hola syosi-syosi esihusaangaasa.”

⁶ Mani Yehu naabandiikira Ebbarwa ypohubiri, n'aboola ati, “Nimuli hu lwaande lwaange, haandi nimufukiirira ohuumbulira, mutemeho emitwe ky'abasyaani b'omwaami weeng'we, mani mukindeetere mu Yesireeli muchuli ebiha koti bino.”

⁷ Nae Ebbarwa niyaboolaho, babukula abaana basyaani ba Ahabbu, baabatemaho emitwe, abaandu amahumi kataanu-na-kabiri, mani baakita mu simweero, baakiyira mu Yesireeli eyiri Yehu.

⁸ Nae wamwaanda yeecha yamuboolera ati, “Baleetere emitwe ky'abaana basyaani ba Ahabbu.” Mani Yehu yaaboola ati, “Mukibuungihe alala mu bituuli bibiri hu siruwa sy'esiko ohwoola muchuli echuli.”

⁹ Nae nibwahya echuli, Yehu yatula yeema erwaanyi w'esiko esyo, yaaboolera abaandu boosi ati, “Eng'we mubulaho omusaango. Niise owalya mu mwaami waange olukwe mani ndaamwiita; nae wiina mweene owiitire bano boosi?”

¹⁰ Manye muti buli siindu si Omwaami yalomaloma esidiira hu nyuumba ya Ahabbu sihoyeere ohwoolerera; olwohuba Omwaami aholere esiindu si yaboola naabitira mu Elija muhalaabani wae.

¹¹ Mani Yehu niyeeta Yesireeli abomu nyuumba y'Ahabbu boosi abali nibadoong'ere, abasaacha bahunuufu bae boosi neende abeecha bae bamanyihaane, alala neende abalaamisi bae, naatalehahooyo kata mulala naali omulamu.

Abeeho b'omutuki Ahasia beetwa

¹² Yehu yatula Yesireeli ao yaachia mu Samaria. Niyali naali hu ngira, abuundu alaangwa ati Bbeti-ekeedi (amahuluundu kasyo mbwe, Ekaambi y'Abaayi).

¹³ Yehu yabukaanana neende abeeho ba Ahasia, omutuki wa Yuda, mani yaabateeba ati, “Eng'we niing'we naanu?” Bamukobolamo bati, “Niifwe abeeho b'Ahasia, mani hwiichire ohukeniya abaana basyaani b'omutuki neende abaana b'omutuki muhasi.”

¹⁴ Mani Yehu n'alagira abasaacha bae ati, “Mubadiire, mubayire nibali abalamu.” Mani baabayira nibali abalamu, baabeetera hu liina lya Bbeti-ekeedi, abaandu amahumi kane neende babiri, mani naatadoong'ahooyo kata mulala omulamu.

Abeeho ba Ahabbu abali nibadoong'ereo boosi beetwa

¹⁵ Nae Yehu niyatula ao, yabukaanana neende Yehonadaabbu omwaana wa Rekabbu niyeecha ohumubukaanira; mani naamuheesa, haandi n'amuteeba ati, “Omwooyo kwao mani kulihooho esiindu silala neende okwaange, koti okwaange kuli silala neende okwao kose?” Mani Yehonadaabbu naakobolamo ati, “Kuli silala neende okwao.” Yehu yaboola ati, “Nikuli silala neende okwaange, mani ndiire mu mahono.” Mani naamudiira mu mahono. Yehu yamuhweesa omuhono, yamwiingisa mu sigaari syae.

¹⁶ Mani naamuboolera ati, “Yiicha naange, obone koti lu ndeyaana eyiri Omwaami.” Mani boombi nibachiira mu sigaari syae.

¹⁷ Nae niyoola mu Samaria, yeeta abeeho ba Ahabbu abali nibadoong'ere mu Samaria, ohwoola lu basihirisirwa bosi pe, ohuchaanakana neende emboosi yo Omwaami yi Elija yalomaloma.

Abeenamiri ba Bbaali beetwa

¹⁸ Yehu yalaanga abaandu boosi yaabahung'aania alala yaababoolera ati, “Ahabbu yeenamira Bbaali budiidi sa; nae Yehu achia ohumwiinamirira elalira.

¹⁹ Mani sakira, munaangire abanabbi ba Bbaali boosi, abeenamiri bae boosi neende abalaamisi bae boosi; abuleo adoong'a yeesi, olwohuba ndi neende esiyaanwa sihoongo siinjia ohuyaanira Bbaali; oyo yeesi onadoong'eyo achia ohwiitwa.” Mani Yehu niyehoonyera amakesi kano hu anyale ohusihirisa abeenamiri ba Bbaali.

²⁰ Yehu yalagira ati, “Mulaangire Bbaali omuhung'aano muhoongo.” Mani baalaanga omuhung'aano.

²¹ Yehu yatuma emboosi mu Yisiraeli mwoosi; mani abeenamiri ba Bbaali boosi-boosi nibeecha, yaabulao owadoong'aho enyuma beengira mu nyuumba ya Bbaali mani niyiichulira elalira du.

²² Yehu yeemao yaaboolera omuundu wali naahulira ekabbati y'engubo ati, “Leetera abeenamiri ba Bbaali boosi engubo.” Mani yaatusa engubo yaababeresa.

²³ Yehu neende Yehonadabbu omwaana wa Rekabbu beengira mu nyuumba ya Bbaali eyo; mani baaboolera abeenamiri ba Bbaali abo bati, “Munoonie, mubone muti abulahoo omuhalaabani w'Omwaami kata mulala oli ano naang'we, nae abeenamiri ba Bbaali boong'ene.”

²⁴ Mani nibeengira ohuyaana ebiyaanwa alala neende ebiyaanwa bisaambwa. Bulaanu Yehu yali naateereo abasaacha amahumi kataanu-na-kadatu nibeemere erwaanyi, mani n'aboola ati, “Omuundu ofukiiriraho kata sa mulala hu baandu ba hudiirire bano yeeyiba, oyo niye ochia ohwiitwa mu bweyaango bwae.”

²⁵ Nae nibamala sa bati ohuyaana esiyaanwa sisaambwa, Yehu yaboolera abaliindi neende abahoongo b'abasikaari bae ati, “Mwiingire mubeete boosi te; mutakanyaho omuundu yeesi yeeyiba.” Mani nibamala ohubeeta, abaliindi neende abahoongo b'abasikaari babasukuna erwaanyi, beengira mu siseenge syomuukati esyomu nyuumba ya Bbaali.

²⁶ Batusa erwaanyi omusiiro kwalichiingi mu nyuumba ya Bbaali, mani baakusaamba.

²⁷ Balikula omusiiro kwa Bbaali, haandi balikula enyuumba ya Bbaali, baayihola yaaba echorooni ohwoola bulaanu buti.

²⁸ Mu ngeri eyo, Yehu yatusirayo elalira ohwiinamiraanga Bbaali mu Yisiraeli.

²⁹ Nae Yehu haba siyalehanaho neende ebyonoono bya Yerobboamu omwaana wa Nebbati, ebyaleetera Yisiraeli esyonoono sy'ohwiinamira esurusi njere ch'esaabbu echalichiingi mu Bbeteli neende mu Daani.

³⁰ Mani Omwaami naaboolera Yehu ati, “Olwohuba oholere esiindu silai sisaangaasa, haandi okwiisire hu bomu nyuumba ya Ahabbu ebyo byoosi bi ndali nindekoomba bibakweeho, olwiibulo lwao ohwoola hu beechuhulu boohune bachia ohutuka Yisiraeli.”

³¹ Nae Yehu haba siyaataaho omwooyo kwae kwoosi hu hudiiraanga ebilagiro by'Omwaami Nasaae wa Yisiraeli; haba kata yaalehanaho neende ebyonoono bya Yerobboamu, ebyaleetera Yisiraeli ohukwa mu bwonooni daawe.

Ohufwa hwa Yehu

³² Mu biha ebyo, Omwaami yachaaka ohuduuduya esyaalo sya Yisiraeli. Hasaeli omutuki wa Siria yawaamba esituundu sya Yisiraeli syoosi esyohu lwaaho,

³³ ohutulira hu mwaalo kwa Yorodaani okwali ebukwe, neende ebyaalo byoosi ebya Gileadi, esy'Abagaadi, neende esy'Abarubbeeni, neende Abamanaase, ohutula hu siko sya Aroeri, esiri mu hooho lya Arunooni. Esyo nisyo esituundu syoosi esya Gileadi neende Bbasani.

³⁴ Bulaanu ebiholwa bidoong'ereo ebya Yehu, neende ebyo byoosi bi yahola, neende ebiholwa byae by'obululu byoosi, byaandiikwa mu sitabo sya Ebyaliwo by'abatuki ba Yisiraeli.

³⁵ Yehu yafwa yaasiihwa mu Samaria alala neende bakuukaang'ene. Mani omwaana wae yi balaangwa bati Yehoahasi, naakobola mu makulu kae koti omutuki wa Yisiraeli.

³⁶ Yehu yali naatukiire Yisiraeli mu Samaria ohumala embaka y'emyaaka amahumi kabiri neende kitaanu-na-kidatu.