2 Abakoriito 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuhoonya Abakristo basyeeng'we

¹ Sisihoyeere ohubaandiikira ebidiira hu huhoonya aboolerefu,

² olwohuba manyire obweetekefu bweeng'we, bumbesuungiramo eyiri abaandu ba Makedonia, nimboola endi Akaya syali esyetekefu ohutula omwaaka kuweere; haandi ohumaliirira hweeng'we hubasangaasire muno.

³ Nae bulaanu ndi ohubatumira abasyeefwe bano hu hubesuungiramo hweefwe huhaye ohuba ohw'ebihaya, hu munyale ohuba abeetekefu, koti lu ndaboola endi muchia ohuba nimuli abeetekefu.

⁴ Ataali ao, niinjicha neende Abamakedonia baandi, mani hwanyoola nimutaali abeetekefu, huba huchia ohudiirwa esoni mani huhaywe esy'ohulomaloma olwohuba hubeesika muno.

⁵ Sakira mbaasire endi silai muno ohutuma abasyeefwe bano bataangire ohwiicha yi muli, mutekehe nibusisiiri esiyaanwa sino simwalaka, hu sinyale ohuba esiyaanwa sitekehe esitula muhudaha hweeng'we ataali ohuyiikwa.

⁶ Sino nisyo esiindu si ndi ohuboola, oyo otaaka bidiidi, yahakese bidiidi. Nae oyo otaaka ebiingi, yahakese mu buungi.

⁷ Buli muundu ahoyere ohuhola koti lu aba n'aheengereo mu mwooyo kwae, ataali ohwekanyiirisa, oba ohuyiikwa, olwohuba Nasaae adaha omuundu owaana neende esangaalo.

⁸ Haandi Nasaae ali neende obunyala bw'ohubaberesa ehabi choosi mu buungi, hu munyale buli siha ohuba neende ebiindu byoosi bi mudaha haandi hu munyale ohuwaana mu buungi hulwabuli mulimo mulai.

⁹ Koti lu syandiikwa siti, “Akaba abamanani mu buungi; obuluungifu bwae buyiindira endaalo choosi.”

¹⁰ Oyo oberesa omuwaanyi emwo, neende ebiindu byohulya, achia ohubaberesa haandi ameede efuni yeeng'we haandi ameede ekesa ly'obuluungifu bweeng'we.

¹¹ Muchia ohuholwa abayiinda mu buli ngeri hulw'obuwaani bulai bweeng'we, obuchia ohukera hweebase Nasaae.

¹² Olwohuba omulimo kuno sikuhoonya aboolerefu boong'ene nae kukera hweebasa Nasaae muno.

¹³ Nimuhola muti, muchia ohuberesa Nasaae oluyaali olw'obuwulisi bweeng'we muhufukiirira emboosi ndai ya Kristo, haandi hulw'obuwaani bweeng'we bulai, bumubaberesa neende bumuberesa abaandu baandi boosi;

¹⁴ bachia ohubekoomba mani babalaamire eyiri Nasaae, hulw'embabaasi nyiingi cha Nasaae echibalimo.

¹⁵ Lehe hweebase Nasaae hulw'esiyaanwa syae sibitiirifu!