2 Abakoriito 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abahalaabani b'Endagaano Njaaha

¹ Mani huchaakire ohwefumia abeene haandi? Oba mani hweenya, koti lu baandi bahola, ebbarwa chitusiima yi muli, oba ohutula yi muli?

² Ngandi eng'we abeene muli ebbarwa cheefwe chitusiima, echaandiikwa mu myooyo kyeeng'we, huchimanyihane, haandi chisomwe neende abaandu boosi;

³ nihaandi mweekesa muti muli ebbarwa yitula eyiri Kristo eyaleetwa naafwe, niyitaandiikwa neende obuwiino, nae neende Mwooyo wa Nasaae mulamu, ataali hu makina ak'amakina nae hu makina ak'emyooyo ky'abaandu.

⁴ Obwo nibwo obwomiifu bu huli nabwo mu Nasaae ohubitira mu Kristo.

⁵ Ataali mbwe efwe abeene huli abanyala hulweefwe ohuboola huti hunyala ohuhola esiindu syoosi; obunyala bweefwe butula eyiri Nasaae,

⁶ owatuhola hwaaba abanyala ohuba abahalaabani ab'Endagaano Njaaha, eyitaali mu bwandiike nae eyiri Mwooyo; olwohuba obwandiike bwiita, nae Mwooyo akaba obulamu.

⁷ Bulaanu nikali mbwe esileeta ohufwa, syasaatwa mu nukuta hu kina, syeecha neende oluyaali olwakera Abaisiraeli sibanyalaanga hulingaala hu bweeni bwa Musa bumesa-mesana, syafwiiriraanga sa,

⁸ esileeta Mwooyo haba sisichia huba neende oluyaali luhiraho olwo?

⁹ Olwohuba nikali mbwe aliwo oluyaali mu sileeta ohuheengerwa omusaango ohubahira, esileeta obuluungifu siba sihoyere ohuba esihira muno esyo oluyaali.

¹⁰ Mubwadyeeri bweene, mu ngeri yino, esyo esyaliho neende oluyaali luhoongo lwakiire ao, lwiichire lwahaya ohubaaho neende oluyaali kata budiidi, hulw'oluyaali luba niluluhira eyale.

¹¹ Olwohuba nikali mbwe esyo esyabbuuruha syeecha neende oluyaali lwakiire ao, mani esyo esitaliwao siba sihoyere ohuba neende oluyaali luhirira elalira olwo.

¹² Mani koti lu huli neende esuubi lifwaana lityo, sakira huli abasimbiifu muno,

¹³ ataali koti Musa, oyo owatechaanga esitaambaya hu bweeni bwae hu Baisiraeli bahaye ohubona enjakamo y'oluyaali lufwiiririra.

¹⁴ Nae ebibaaso byaabwe byahadaangwa; olwohuba kata ohwoolera elalira bulaanu buti, nibasoma Endagaano Ehale, esitaambaya syeene sira sidoong'a sa nisitafunuulwe, olwohuba ni ohubitira mu Kristo yeeng'ene yi sinyala ohutusibwayo.

¹⁵ Eee, ohwoola buti, amalako ka Musa nikasomwa, ebibaaso byaabwe bifunihwaangaho;

¹⁶ nae omuundu yeesi nakaluhaana eyiri Omwaami, ebibaaso byae bibwiihulwaangaho.

¹⁷ Bulaanu Omwaami oyo niye Mwooyo, mani eyo yoosi yi Mwooyo w'Omwaami aba, yibaayo obulehuule.

¹⁸ Mani efwe fweesi nihuli neende obweeni butaabwiihirwe, hubona oluyaali lw'Omwaami, mani hwakaluuhanisibwa mu hufwaana hwae ohutula hu digiri ndala ey'oluyaali ohuchia hu yiindi; olwohuba sino siicha nisitula eyiri Omwaami oyo oli Mwooyo.