2 Abakoriito 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO1 Olwohuba ese ndaheengao ohutabatekehera olukeendo luundi olunyala ohubachuunia. 2 Olwohuba niwiichuhana ndabachuunia, ni naanu mweene oba anaasangaasa, nimutaba eng'we ba mba ninjuuniisye? 3 Mani ndandiika koti lu ndaandiika endyo, hu bulaanu ni mba niinjicha eyo, tanyala ohuchuunisibwa neende abo abahahoyeere ohusangaasa, olwohuba ndali nimbeesika mweesi, endi esangaalo lyaange lyahahoyeere lyaaba esangaalo lyeeng'we mweesi. 4 Olwohuba ndabandiikira ninyemere hu huchuunisibwa neende ohwekanyiirisa hw'omwooyo haandi neende amasika amaangi, nitachiiririra ohubachuunia nae ohukera mumanye nga lu ndabaheera neende obuheeri bubitiirifu. Ohuleherwamo hw'omwonooni 5 Nae omuundu yeesi n'aba n'achuuniise owaasye, haba saaba niyaholeere ese syeeng'ene, nae mu siha siindi eyiri eng'we mweesi. (Mboola sino nitadaha ohuboomesera muno obulamu.) 6 Olwohuba omuundu ofwaana atyo, esibonereso sy'abaandu bahira obuungi siba simala sa; 7 sakira eng'we muhoyere mwakaluuhana mwamulehera, haandi mwamulemya omwooyo, awuundi aba achia ohuyiingirwa neende ohwelalihirira hubitiirifu. 8 Sakira mbekweeda mumwichuliseenge ohumuheera hweeng'we. 9 Olwohuba sino nisyo esyakera niyaandiika, hu nyale ohubahema mani nyemeo nyale ohumanya nimuli abawulisi mu buli siindu syoosi. 10 Omuundu yeesi yo lehera, syesi mba ndamulehera. Esyo si mba nimalire ohulehera, ni mba nindeheere omuundu yeesi esiindu syoosi, siba syeemere hweeng'we mu moni wa Kristo, 11 ohunyala ohukayira Sitaani ohunyoola obweyaango ohutufubulira; olwohuba efwe humanyire ebibaaso byae koti lu biri. Esiindu si Paulo yadaha muno naali mu Turoasi 12 Nindeecha mu Turoasi ohuyaala emboosi ndai ya Kristo, omulyaango kwaanjikuhira sa mu Omwaami; 13 nae ebibaaso byaange haba sibyakwalaala olwohuba haba sindakaana Tito mwaanaama naaliyo. Sakira ndeecha ndaabatulaho mani ndaamala ndaachia Makedonia. Ohuyiingira ohubitira mu Kristo 14 Nae Nasaae yebasibwe muno, oyo obitiraanga mu Kristo atwimiriraanga mu huyiingira, haandi ohubitiraanga mw'efwe, asalaanianga esing'aari sy'ohumumanya buli abuundu. 15 Olwohuba efwe niifwe esing'aari sya Kristo eyiri Nasaae mwaabo abali ohuwonisibwaanga, haandi mwaabo abali ohusihiriranga, 16 eyiri owuundi ni esing'aari sy'ohutula mu hufwa ohuchia mu hufwa, nae eyiri owuundi ni esing'aari situla mu bulamu ohuchia mu bulamu. Ni naanu mweene oyera bino byoosi? 17 Olwohuba efwe haba sihuyera, koti sa abaandu baangi bali, abaonianga emboosi ya Nasaae; nae koti abaandu b'obwadyeeri, koti abatumwa neende Nasaae, mu moni wa Nasaae hulomalomera mu Kristo. |