1 Yowaana 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaana ba Nasaae

¹ Bone koti lu Seefwe yatuheera muno, sakira batulaanga abaana ba Nasaae; haandi mubwadyeeri bweene huli hutyo. Esikera esyaalo nisitukotwa nisyo olwohuba haba sisyamanya Nasaae.

² Basyaange baheerwa, bulaanu huli abaana ba Nasaae, nae sihwahabe sisisiiri ohumanyihana, nae humanyire huti, Kristo niyahabonehe huchia ohuba koti lwaali, olwohuba hwahamubone koti lwaali.

³ Omuundu yeesi oli neende esuubi lino mu Kristo ahoyere ohulabya obulamu bwae koti lu Kristo yalabya.

⁴ Omuundu yeesi ohola esyonoono, oyo aba ahalaka amalako ka Nasaae; haandi oba mu syonoono yeekesa ati, yahaya ohuwulira amalako.

⁵ Mumanyire muti Kristo yabonehana hwaanyale ohumalao ebyonoono byeefwe, haandi Kristo abulaho neende esyonoono.

⁶ Mani sakira buli muundu yeesi oli mu bulala neende Kristo, siyemeeda ohwonoona; nae omuundu wemeeda ohwonoona, oyo aba asisiiri ohumubona haandi asiimukoterwe.

⁷ Baana baange, omuundu yeesi alehe ohubabacha! Omuundu yeesi ohola ebiluungifu aba omuluungifu koti lu Kristo ali omuluungifu.

⁸ Nae omuundu wemeeda ohwonoona aba omuundu wa Sitaani olwohuba Sitaani yachaaka neende ebyonoono byae ohutula hale. Omwaana wa Nasaae yeecha hulw'esifune sino, ohusihirisa omulimo ku Sitaani yali amalire ohuhola.

⁹ Abaana ba Nasaae haba sibahemeeda ohwonoona, olwohuba obulamu bwa Nasaae bweene bubalimo; haandi olwohuba Nasaae niye saabwe, haba sibanyala bemeeda ohuholaanga ebyonoono.

¹⁰ Sino nisyo esikera hwaanyala ohukabuhania bulai akatikaati w'abaana ba Nasaae neende aba Sitaani. Omuundu yeesi otahola ebiluungifu, oba otaheera owaasye, oyo haba saaba ali omwaana wa Nasaae.

Heeraneenge

¹¹ Yino niyo enjekesa yimwaulira ohutula hale mbwe, muheeraneenge.

¹² Haba simuhoyere ohuba koti Kaini; yali omuundu w'omusuku Sitaani, mani yeeta Abbeli mwaanang'ina mweene. Lwasiina Kaini yeeta mwaanang'ina? Olwohuba ebiholwa byae byali ebibi, nae ebiindu bi mwaanang'ina yahola byali ebilai.

¹³ Sakira basyaange, mutesiinduhaanga abaandu bomu syaalo nibatabadaha.

¹⁴ Humanyire huti, hwamala ohuleha ohufwa, mani hwechia mu bulamu; olwohuba hwaheera abasyeefwe. Omuundu otaheera abaasye, oyo asisiiri mu hufwa.

¹⁵ Omuundu otaheera mwaanang'ina, oyo mwiiti niye, haandi mumanyire muti abeeti haba sibalimo obulamu butaakama.

¹⁶ Sino nisyo esikera hwaamanya koti lu buheeri buli: Kristo yayaanayo obulamu bwae hulweefwe. Mani fwesi huhoyere ohuyaanaangayo obulamu bweefwe hulw'abaasyeefwe!

¹⁷ Omuundu muyiinda naabona owaasye naali mu ngisa, mani yaahaya ohumudeebaho, anyala ohuboola atye ati, ali neende ohuheera Nasaae mu mwooyo kwae?

¹⁸ Baana baange, obuheeri bweefwe haba sibuhoyere ohuba obwohumunwa sa hwoong'ene nae buhoyere ohuba obw'obwadyeeri, ohubonehera mu biholwa.

Ohuba abomiifu mu moni wa Nasaae

¹⁹ Sino nisyo esikera hwaamanya huti huli abaandu b'obwadyeeri; haandi koti emyooyo kyeefwe kichia ohuba neende omuleembe mu moni wa Nasaae.

²⁰ Buli lu bibaaso by'emyooyo kyeefwe bitweekesa esyonoono syoosi, olwohuba humanyire huti Nasaae muhoongo muno ahira emyooyo kyeefwe, haandi amanyire buli siindu.

²¹ Sakira basyaange, ebibaaso by'emyooyo kyeefwe nibitatweekesa esyonoono syoosi, ao huba neende obwomiifu ohweema mu moni wa Nasaae.

²² Haandi hunyoola buli siindu si hudaha syoosi ohutula yaali, olwohuba huwulira amalako kae haandi hwaahola ebiindu bimusangaasa.

²³ Sino nisyo esiindu sibatulagira ohuhola, mbwe huhoyere ohufukiirira mu liita ly'Omwaana wae Yesu Kristo haandi huheeraneenge, koti lu Kristo yatulagira ohuhola.

²⁴ Omuundu yeesi owulira amalako ka Nasaae, amenya mu Nasaae haandi Nasaae amumenyamo. Haandi sino nisyo esikera hwaamanya huti Nasaae yatumenyamo, Mwooyo yi yatuberesa.