1 Yowaana 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Kristo Omuhoonyi weefwe

¹ Baana baange, mbaandiikira sino hu muhaye ohwonoona, nae omuundu wuundi naahola esyonoono, huli neende Yesu Kristo muluungifu owutusabira eyiri Seefwe.

² Omweene oyo niye esiyaanwa sikera hwaaleherwamo ebyonoono byeefwe, nae ataali ebyonoono byeefwe byoong'ene, nae ebyonoono bya buli muundu yeesi.

³ Esiindu sikera hwomiisa huti humumanyire nisyo ohuwulira amalako kae.

⁴ Omuundu yeesi n'aboola ati, “Mumanyire” nae haba saawulira amalako kae, omuundu oyo aba ali omubacha haandi abulamo obwadyeeri.

⁵ Nae omuundu owulira emboosi chae, oyo niye oba omuundu yi buheeri bwae eyiri Nasaae buba obwiichufu elalira. Sino nisyo esikera hwomiisa huti huli mubulala neende Nasaae.

⁶ Omuundu oboola ati, ali mu bulala neende Nasaae ahoyere ohumenya koti lu Yesu Kristo yamenya.

Esilagiro siyaaha

⁷ Basyaange baheerwa, esilagiro si mbaandiikira sino, haba sisiyaaha; nae sihale nisyo, simwamala ohuba nasyo ohutula mu njaako. Esilagiro sihale sino, niyo emboosi yi mwamala ohuwulira.

⁸ Nae esilagiro si ndi ohubaandikiira sino siyaaha, haandi obwadyeeri bwasyo bubonehera mu Kristo haandi neende mweeng'we mwesi. Olwohuba esiirima syamala ohutulao, haandi obulafu bwadyeeri bulaanu nibwo obuli ohwaaduha.

⁹ Omuundu oboola ati ali mu bulafu, nae yasyuula abaasye, aba asisiiri mu siirima ohwoola buti.

¹⁰ Omuundu oheera owaasye, niye oba ali mu bulafu haandi abulamo esiindu sikera yaahola esyonoono.

¹¹ Nae omuundu ohayihana neende abaasye, oyo aba ali mu siirima haandi asikeenderamo nataamanyire yachoomere olwohuba esiirima siba simuwofuuse.

¹² Baana baange, mbadiikira olwohuba mwamala ohuleherwa ebyonoono byeeng'we hulw'eliita lya Kristo.

¹³ Mbaandiikira eng'we balaata, olwohuba mumanyire oyo owaliwo ohutula mu njaako. Mbaandiikira eng'we abaraaga basiimbuha, olwohuba mwamala ohuyiingira omuundu omusuku Sitaani.

¹⁴ Mbaandiikira eng'we abaana olwohuba mumanyire Seefwe. Mbaandiikira balaata, olwohuba mumanyire owaliwo ohutula mu njaako. Haandi mbaandiikira eng'we abaraaga basiimbuha, olwohuba muli neende amaani, haandi emboosi ya Nasaae yiri mweeng'we, haandi mwamala ohuyiingira omusuku Sitaani.

¹⁵ Mutaheraanga esyaalo, oba esiindu syomu syaalo syoosi. Omuundu yeesi oheera esyaalo, obuheeri bwae eyiri Seefwe buba bumubulamo.

¹⁶ Olwohuba esiindu syoosi esyomusyaalo koti obwekoombi bw'omubiri hubi, neende obwekoombi bw'emoni, neende ohwefumia ohweema hu siindu si muundu ali nasyo oba si yahola, ebyo haba sibya Seefwe; nae by'esyaalo sa.

¹⁷ Esyaalo neende ebiindu byoosi ebisirimo bi baandu beekoomba by'ohuwaao; nae abo abahola bi Nasaae adaha, bachia ohuyiindira endaalo choosi.

Omusuku wa Kristo

¹⁸ Baana baange, chino nicho endaalo chimaliirihayo! Mwawulira muti Omusuku wa Kristo achia ohwiicha; nae ohwoola bulaanu, abasuku ba Kristo abaangi bamala ohubonehana, mani esyo esikera hwaamanya huti enjakamo yiri aambi.

¹⁹ Mubwadyeeri, abaandu bano, haba sibali bala hu bomu mukaanda kwaabwe, sakira batuleha. Baba nibali ab'omumukaanda kweefwe, bahadoong'ere naafwe. Nae bawaao hubabonehanire elalira bati abulao kata mulala hu abo mubwadyeeri bweene owali ow'omukaanda kweefwe.

²⁰ Nae eng'we Kristo yamala ohubachuhaho Mwooyo Mwoolerefu, mani eng'we mweesi mumanyire obwadyeeri.

²¹ Sakira mbaandiikira ataali mbwe mukoterwe obwadyeeri; nae olwohuba mumanyire obwadyeeri, haandi mumanyire muti abulao obubacha butula mubwadyeeri.

²² Mani muundu siina omubacha? Omubacha niye omuundu oboola ati, Yesu haba siniye Kristo. Haandi omuundu oyo musuku wa Kristo olwohuba yekaana Nasaae Seefwe neende Omwaana wae.

²³ Olwohuba omuundu yekaana Omwaana wa Nasaae, oyo aba yekaana Simwaana yesi; haandi omuundu ofukiirira Omwaana wa Nasaae, oyo aba afukiirira Simwaana yesi.

²⁴ Mani sakira yomiise bulai haandi liinde bulai mu myooyo kyeeng'we emboosi yi mwawulira ohutula hale. Bi mwaulira ohutula mu njaako nibidoong'a mu myooyo kyeeng'we, ao muba muchia ohumenya endaalo choosi mu bulala neende Omwaana wa Nasaae neende Simwaana mu bulamu bweeng'we.

²⁵ Haandi sino nisyo si Kristo mweene yabasuubisa ohubaberesa obulamu butaakama.

²⁶ Mbaandiikira bino ebidiira hu abo abateemaho ohubabachirisa.

²⁷ Nae ebidiira hweeng'we, Kristo yamala ohubachuhaho Mwooyo wae. Nae Mwooyo wae naali mweeng'we, ao haandi simuba nimusidaha omuundu yeesi abeekese. Olwohuba Mwooyo mweene oyo, aba abeekesa ebidiira hu buli siindu syoosi. Haandi buli siindu si yekesa siba esyadyeeri ataali obubacha. Bulaanu mudoong'e mu bulala neende Kristo.

²⁸ Eee, baana baange, doong'e sa mu bulala nae, hu bulaanu mube neende obwomiifu buungi naabonehana, hu muhaye ohumweekisa hulw'esoni, hu Ludaalo luyahakobolereho.

²⁹ Mumanyire muti, Kristo muluungifu niye; sakira mumanyire muti omuundu yeesi ohola ebiluungifu aba ali omwaana wa Nasaae.