1 Timoteo 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Abawaambe boosi, babukule abaami baabwe koti abahoyere ohwiiswamo oluyaali lwoosi, hu liita lya Nasaae neende enjekesa yeefwe yino bihaye ohuchalaasibwa.

² Abawaambe abali neende abaami baabwe abafukiiriri, batahaya ohuba abalekeeresi nibeema hu huba abafukiiriri bosi. Mu bweyaango bw'ohuba batyo, nibo abahoyere ohuba nibahalaabana bulai ohuhira boosi. Olwohuba abaandu bafuna engaanga mu buhalaabani bwaabwe nibo abaandu abafukiiriri haandi nibo abaheerwa. Ohoyere ohweekesa haandi neende ohwomiisa ebihoyerwa ohuholwa bino.

Enjekesa y'obubacha neende obuyiinda bwadyeeri

³ Omuundu yeesi niyeekesa ebiindu bikabuhaane neende bino, haandi yaahaya ohufukiirisania neende emboosi huluundu ch'Omwaami Yesu Kristo, neende enjekesa yichaana neende ediini yeefwe yino,

⁴ aba ali owabiiruuha neende esuunga haandi abulao syamanyireho daawe. Naali neende obwekoombi bubi bw'ohuyiingana neende ohusoolanira ebidiira sa hu mboosi, ebileeta ehali-hali, ohuhayaana, amanyeko, ehiinda mbi,

⁵ neende amayiingani k'olutata akatula mu baandu b'ebibaaso byafwa ebitadoong'amo obwadyeeri bwoosi daawe. Babaasa sa bati, obunadiini niyo engira y'ohunyoola efuni.

⁶ Kata katyo, aliwo efuni embitiirifu eyiri mu bunadiini, nae eyiri oyo onyala ohwikuta ebyo byaaba naali nabyo.

⁷ Olwohuba efwe haba sihwaleeta esiindu syoosi mu syaalo muno, haandi sihunyala ohutusa esiindu syoosi mu syaalo muno.

⁸ Mani nihuba nihuli neende ebyohulya neende ebyefwaalo, huhoyere ohwikuswa neende ebyeene bino.

⁹ Nae abo abekoomba ohuba abayiinda, bakwiichaanga sa mu huteemwa, mu muteego, mu biindu biingi muno ebitaalimo amakesi neende obwekoombi bunyala obudimbula abaandu mu hunyaasiha neende mu husihirira.

¹⁰ Olwohuba ohwekoomba eseende nihwo omusi kw'ebibi byoosi. Olwohuba ohubitira mu obwekoombi bubi buno, nimwo mu baandi boolera ohudaaliima baatula hu fukiirira yino, mani baafumita emyooyo kyaabwe neende amafumo maangi ak'ohwelalihirira.

Amakerako kadiira hu ewe omweene

¹¹ Nae ewe omweene, omuundu wa Nasaae, lehana neende ebiindu bino byoosi. Weluungihe obuluungifu, obunadiini, efukiirira, obuheeri, obwesimiirifu, obuloonga.

¹² Lwaana ohulwaana hulai ohw'efukiira. Wediire hu bulamu butaakama buwalaangirwa niwamala ohutuumbula efukiirira yao endai mu lwichuule lw'abaloli baangi.

¹³ Mu moni wa Nasaae oberesaanga ebiindu byoosi obulamu, neende mu wa Kristo Yesu, owatuumbula efukiirira yae ndai mu moni wa Pontio Pilato.

¹⁴ Hwekweeda ohuliinda esilagiro sino sitakwaaho obubi bwoosi, haandi obutalekeeresebwa daawe, ohwoolera elalira hu hwiicha hw'Omwaami weefwe Yesu Kristo.

¹⁵ Ohwiicha hwae huno huchia ohwosereswa mu siha sihoyere, neende ow'oluyaali haandi Ow'aakulu bweene, Omutuki w'abatuki boosi haandi Omwaami ow'abaami boosi.

¹⁶ Oyo yeeng'ene oli neende obutaakama haandi owamenya mu bulafu butanyala ohusudibwaho, Oyo yi muundu yeesi ataabonaho; otanyala ohubonwa daawe. Oluyaali lwoosi lube nae, neende obutuki butaakama. Amiina.

¹⁷ Nae eyiri abayiinda abali mu syaalo muno, beekweede batesuunga, kata sa batata esuubi lyaabwe hu buyiinda butaali obwomiifu obwo, nae balite hu Nasaae otubbiibiraanga mu buungi buli siindu sihwesangaasiramo.

¹⁸ Bahoyere ohuholaanga ebilai sa, babecheenge abayiinda mu biholwa bilai, babecheenge abakabi, haandi abeetekefu ohuhoonya abaandu baandi.

¹⁹ Nibahola batyo, nilwo lu baba bachia ohuba nibali ohweyoombahiraanga omusiingi mulai okw'obulamu bwiicha. Hu baba bachia ohunyala ohunyoola obulamu buli obulamu bw'alalira.

²⁰ Timoteo ewe, liinda esyo siwabiihiswa. Lehana neende embaha chitaali ech'obunadiini, neende amayiingani k'obusiru ka baandu baandi babacha bati niko amakesi ka mwahakotwa mwalaanga mbwe “Amakesi.”

²¹ Olwohuba ohubitira mu huboola mbwe bali neende amakesi ako, abaandu baandi bamala ohufwiirwa efukiirira yeene ndai. Embabaasi cha Nasaae chibe naang'we mweesi.