1 Timoteo 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKOByoohoyere ohuholera Abafukiiriri 1 Otalabiraanga omusaacha muhuluundu, nae muyireenge koti lataao ohwiibula. Bukulaanga abasyaani baraaga koti bamwaanamaao. 2 Bukulaanga abahasi bakofu koti ba maao, haandi abahaana basiimbuha koti bamboochoo, neende omwooyo mulala kwoong'ene. 3 Yisaanga oluyaali mu bahasi bafwiire abadoong'a boong'ene. 4 Nae omuhasi mufwiirwe naaba naali neende abaana kata abeechuhulu, bahoyere bataangireenge mberi ohwooseresanga ebidahibwa by'ediini eyiri amadaala kaabwe hu mu huhola batyo banyaleenge ohutungaanga abeebusi baabwe neende bakuuka yaabwe. Olwohuba sino nisyo esihoyera mu moni wa Nasaae. 5 Omuhasi mufwiirwe owadoong'a yeeng'ene, nataaliho neende omuundu yeesi onyala ohumuliinda, aba ali koti owamala ohuta esuubi lyae lyoosi mu Nasaae mani ahoyere ohuchiiririra ohusabaanga neende ohwekwedaanga Nasaae esiro neende esideete. 6 Nae omuhasi mufwiirwe owesukuna sa mu buli simusangaasa, ali koti owamala ohufwa hale, kata neende naaba n'aliwo omulamu. 7 Lagiraanga otyo hu baandu bahaye ohuba neende sibatanyala ohwooseresa hu biindu bino byoosi. 8 Omuundu yeesi n'ataliinda abeeho bae, haandi ohuhirira elalira ab'edaala lyae lyeene, aba amalire ohwebwaaba efukiirira yino haandi aba ali omubi ohiraho neende omuundu otaali omufukiiriri. 9 Otandikaanga omuhasi yeesi omufwiirwe otoosa emyaaka ch'obuhuluundu amahumi kasaasaba, haandi niyali niyadeehera omusaacha mulala yeeng'ene. 10 Haandi omuhasi oyo ahoyere ohuba nasiimibwa ohuba neende ebiholwa bilai, haandi koti owaliindaho abaana, omuliindi w'abaandu, owosaho amakulu k'aboolerefu ba Nasaae, owajanjabiaho abaandu, haandi owetusayo ohuholaanga ebilai mu buli ngira. 11 Hayira elalira ohwandiika abahasi bafwiirwe bayere boosi. Olwohuba obwekoombi bwaabwe nibukera boola ohudaha ohudeeha, baba bachia ohwebwaaba Kristo, 12 mani bakwe mu musaango kw'ohuhaya ohwooseresa esisuubise syaabwe syataangira. 13 Haandi baba bachia ohweeka ohudyaala, nibayiikaana mu buli mulyaango, haandi nibameeda ohwo obumoonyi neende obumemekalu bukera nibakaniaaya bibatahoyeere ohukaniaaya. 14 Mani naange ndahadahire abahasi bafwiirwe abo abasisiiri abayere bahahoyereenge banyala ohudeeha haandi, boole ohwibulaanga haandi abaana, hu banyale haandi ohuliindaanga amadaala akaabwe keene bulai hu beemeo banyaleenge ohwiimira elalira abasuku beefwe abo ehabi kata nabudiidi eyohuchaaka ohutulomalomaangaho emboosi ch'esifuto haba daawe. 15 Olwohuba abahasi bafwiirwe baandi bamalire ohutula hu Nasaae mani bachaaka ohuloonda Sitaani. 16 Mani n'aliwo omuhasi mufukiiriri yeesi, oli neende abeeho bahasi bafwiirwe, ahoyere abe niye obahoonya. Lehe omukaanda kw'abafukiiriri kuhaye ohusidoyerwa neende omusiigo okwo, hukunyale ohuhoonya abahasi bafwiirwe bataaliho neende omuundu obahoonya. 17 Lehe abahuluundu beemirira abaandu bulai, babeeresebweenge oluyaali amahabi kabiri, ohuhirira elalira abo abahalaabana mu mulimo kw'ohuyaala Emboosi Ndai, neende ohweekesa amakesi. 18 Olwohuba ebyandiiko byoolerefu biboola biti, “Otaboyaanga omunwa kw'endaawu niyiri ohuhunyeenya engaano,” haandi biti, “Omuhalaabani ahoyere ohubeereswaanga omusaara kwae.” 19 Otafukiiriraanga ohuwosesa omusaango kudiira hu muundu muhuluundu yeesi okutaaliho abaloli babiri oba badatu. 20 Nae abaandu basiihayiire mu huholaanga ebyonoono, boolobyeenge mu lwichuule lw'abaandu, hu baandu badoong'ereyo banyale ohutya. 21 Mu moni wa Nasaae, neende mu wa Kristo Yesu, neende mu wa bamalaika badoole, hwekweeda olondeenge amakerako kano ataali ohutya oba ohukwiira omuundu yeesi mu buli siindu syoosi sy'ohola. 22 Otabbibbirihanaangaho ohwiisa amahono hu baandu, oba ohweyambaania mu byonoono by'omuundu wuundi. Welindeenge nooli omunywerefu. 23 Otang'wechaanga haandi amaachi koong'ene, nae wehonyereengeho efiini ndiidi yosi, ohuhoonya enda yao ohunyuhuula bilai ebyohulya, neende hulw'amachuuni kao ka butoli-toli. 24 Ebyonoono by'abaandu baandi bibonehanira abweene, bichoomesera elalira hu huheengerwa emisaango, nae ebyonoono by'abaandu baandi bibonehana luunyuma. 25 Ebiholwa bilai byosi bibonehanira abweene; nae kata nibitanyala ohuba bityo, haba sibinyala ohudoong'a nibyakiswa sa olubeerera daawe. |