1 Timoteo 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiinamira Nasaae mu mukaanda kw'abafukiiriri

¹ Sakira esitaangira, mbekweeda endi, musabireenge, mukongooyereenge, haandi mwebasireenge abaandu boosi eyiri Nasaae.

² Musabireenge abatuki neende abo boosi abali mu bweyaango bw'obutuki, hu hunyale ohumenya mu bulamu buyenjeefu haandi obw'omuleembe, nihutya Nasaae, haandi nihweeyira bilai mu ngeri choosi.

³ Sino silai, haandi sifukiirirwa mu moni wa Nasaae Omuwonia weefwe,

⁴ odaha abaandu boosi baonisibwe haandi boole hu humanya obwadyeeri.

⁵ Olwohuba aliwo Nasaae mulala haandi aliwo omuundu mulala osasaania Nasaae neende abaandu. Wuno niye Kristo Yesu, oli omuundu mweene,

⁶ owewaayo ohuwonia abaandu boosi. Sino nisyo esilolero syeecha mu biha bihoyere.

⁷ Sino nisyo esyakera ndadoolebwa ohuba omuyaali haandi omutume (Ndi ohuboola obwadyeeri, haba simbacha), omweekesa w'Abateende mu fukiirira neende mubwadyeeri.

⁸ Sakira ndekoomba endi mu buli bweyaango abasaacha bahoyere ohulaama, nibasingiise aakulu amahono kaabwe moolerefu ataali etima oba obusoolo.

⁹ Haandi ndekoomba abahasi bosi befwaaleenge engubo chihoyerwa haandi babe abaloonga. Batesukaanga efwiiri, oba ohwesyaaya esaabbu oba amakina k'ebbeyi oba engubo ch'obukusi bw'aakulu muno.

¹⁰ Nae babe neende ebihole bilai bihoyera abahasi batya Nasaae.

¹¹ Lehe omuhasi atekeereseenge bi beekesa nawuleerere naloongoyaale.

¹² Sifukiirira omuhasi yeesi ohweekesa oba ohuba neende obunyala bwoosi hu musaacha. Ahoyere ohuwuleera.

¹³ Olwohuba Adamu niye owataangira ohuloongwa, hubaloondiaho Efa.

¹⁴ Haandi Adamu siniye owabachiriswa, nae omuhasi niye owabachiriswa, mani yehola omuhalaki w'amalako.

¹⁵ Kata katyo, omuhasi achia ohuwonisibwa ohubitira muhwiibula abaana, niyomiirira mu fukiirira, neende mu buheeri, neende mu bwoolerefu alala neende ohweliinda bulai.