1 Samueli 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaisiraeli basaba Nasaae ababe omutuki

¹ Samueli niyakofula, yahola abaana basyaani bae ohuba abakayi mu Yisiraeli.

² Eliita ly'omwaana muhuluundu lyali Yoeli, nae omuyere yali Abbija. Bano bali abakayi mu Bberisebba.

³ Nae haba sibaloondakana neende esyohuboneraho sya laata yaabwe daawe; nae badahaanga muno ohunyoola eseende, mani nibafukiiriraanga asowa haandi nibataheengaanga emisaango mubwadyeeri daawe.

⁴ Mani abeemeresi ba Yisiraeli boosi nibebuusa alala, nibachia eyiri Samueli abuundu mbwe Rama,

⁵ nibamuboolera bati, “Bona, oli ohukofula nae abaana bao haba sibaloondakana neende esyohuboneraho syao daawe. Maya akatudoolera omutuki ohututukaanga, fwesi hube neende omutuki, koti ebyaalo biindi.”

⁶ Esiindu sy'ohusaba omutuki syanyoolesa Samueli, Samueli mani niyekongooya eyiri Omwaami.

⁷ Omwaami yaboolera Samueli ati, “Tekeeresa ebyo byoosi bi baandu bahuboolera. Olwohuba haba sibahayire ewe, nae niise yi bahayire ohuba omutuki waabwe.

⁸ Olwohuba ohutulira elalira lu ndabatusa Misiri ohwoola buti, bangaluuhanaho mani nibeenamira banasaae baandi. Bulaanu bali ohuhuhola koti lu babeere nibaaholaanga.

⁹ Mani sakira, ewe bawulire, nae balabule bulai bweene haandi obaboolere engeri yi batuki baabwe bachia ohubayiiriramo.”

¹⁰ Samueli mani naaboolera abaandu bali nibamusaba ababerese omutuki buli siindu si Omwaami yali naamuboleere.

¹¹ Samueli yababoolera ati, “Yino niyo engeri yi mutuki weeng'we achia ohubayiramo: abaana beeng'we basyaani achia ohubeengisa mu maye, abaandi bachia ohuhalaabanira mu bigaari byae by'ebiita; abaandi bachia ohwiirusa efaraasi chae, abaandi bachia ohulwaanira hu loba, nibeemiriire ebigaari byae.

¹² Achia ohuhola abaandi babe abeemeresi b'emikaanda ky'abasaacha balwaani elifu ndala, abaandi ab'abasaacha amahumi kataanu. Abaana basyaani beeng'we nibo abachia ohumulimiraanga emikuunda kyae, ohukesaanga ebirime byae, ohumwiitaanyiraanga ebilwaaniso byae, haandi neende ebiindu bihola hu bigaari by'amaye byae.

¹³ Abaana bahaana beeng'we nibo abachia ohumuholeraanga amafuta k'ebing'aari, ohumudeeheraanga ebyohulya neende ohumuubbiraanga emigaati.

¹⁴ Achia ohubang'ulaanga emikuunda kyeeng'we kihiramo obulai, emikuunda ky'emisabbiibbu neende eky'emiseituuni, mani akikabaanga abahoongo bae baandi.

¹⁵ Achia ohubukulaanga buli silala sy'ehumi sy'emere yeeng'we neende ey'emisabbiibbu kyeeng'we ohubeechaanga eby'abahoongo bomu dooho lyae neende abahoongo abaandi.

¹⁶ Achia ohubukulaanga abahalaabani beeng'we neende ebyaayo byeeng'we bihiramo obulai, neende esuhiri, mani naabihola byoosi ohumuholeraanga emirimo kyae.

¹⁷ Achia ohubukulaanga buli silala sy'ehumi sy'ebyaayo byeeng'we. Haandi eng'we beene muchia ohweehola abawaambe bae.

¹⁸ Esiha esyo nisyahoole, muchia ohwekanyiirisa muno omutuki weeng'we, oyo yi eng'we abeene mwadoola. Nae Omwaami haba saachia huwulira ohwekanyiirisa hweeng'we daawe.”

¹⁹ Nae abaandu nibahaya ohuwulira ebya Samueli daawe, mani nibaboola bati, “Haba! Efwe hudaha omutuki.

²⁰ Hudaha fwesi hube koti ebyaalo biindi, hube neende omutuki weefwe otutuka haandi otwimirira nihuchia mu biita haandi alwaaneenge ebiita byeefwe.”

²¹ Samueli yatekeeresa buli siindu si baandu baboola, mani n'achia naabiboolera Omwaami.

²² Omwaami yakobolamo ati, “Hola bi badaha, obateereo omutuki.” Ao mani Samueli naaboolera Abaisiraeli boosi ohukobolayo engo waabwe.