1 Samueli 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ao mani abaandu ba Kiriati Yearimu nibabukula Esanduuku ly'Endagaano y'Omwaami, nibalingisa mu nyuumba y'omusaacha olaangwa Abbinadabbu, owali niyamenya hu lugulu. Baawula omwaana wae Eliasaari ohuliliindaanga.

Samueli atuka Yisiraeli

² Esanduuku ly'Endagaano y'Omwaami lyaba mu Kiriati Yearimu ohumala embaka ndeeyi muno; kyali emyaaka aambi amahumi kabiri (20). Mu siha sino, Abaisiraeli boosi balirira Omwaami abahoonye.

³ Samueli yaboolera Abaisiraeli ati, “Nimuchia ohukaluuhana mukobole eyiri Omwaami neende emyooyo kyeeng'we kyoosi, muhoyere mberi ohweetusaho banasaae bateende boosi alala neende ebiloongaloongwe bya nasaae muhasi olaangwa Asitarooti. Mweweeyo elalira eyiri Omwaami mani mumwiinamireenge yeeng'ene. Ao achia ohubanunula ohutula mu bunyala bw'Abafilisiti.”

⁴ Mani Abaisiraeli nibeemalaho ebiloongaloongwe byaabwe bya Bbaali neende ebya Asitarooti, mani nibeenamira Omwaami yeeng'ene.

⁵ Ao mani Samueli naalaanga Abaisiraeli boosi bachie beebusiire alala abuundu mbwe Misipa, n'aboola ati, “Njia ohubasabira eyiri Omwaami.”

⁶ Mani boosi nibebuusira Misipa. Badaya amaachi mani nibakachuha aasi ohuba koti esiyaanwa eyiri Omwaami haandi nibasiiba oludaalo olwo lwoosi. Baboola bati, “Efwe hwonoona eyiri Omwaami.” (Eyo Misipa niyo yi Samueli yakaira obusoolo bwali mu Baisiraeli.)

⁷ Abafilisiti nibawulira bati Abaisiraeli bali nibebuusiire Misipa, abatuki b'Abafilisiti bataanu nibeecha neende abasaacha baabwe ohuseeta Abaisiraeli. Abaisiraeli basiwulira mani nibatya.

⁸ Baboolera Samueli bati, “Wemeede ohutusabira eyiri Omwaami Nasaae weefwe atuwonie Abafilisiti bano.”

⁹ Samueli yeeta ekoondi doto mani naalisaamba ohuba koti esiyaanwa sisaambwa syoosi eyiri Omwaami. Ao mani Samueli naasaba Omwaami ohuhoonya Abaisiraeli, Omwaami mani naakobolamo ohusaba hwae.

¹⁰ Samueli niyali n'ayaana esiyaanwa sisaambwa esyo, Abafilisiti basuda mu moni ohuseeta balwaanie Abaisiraeli; nae abweene ao, Omwaami mani niyaduluhira Abafilisiti mu kono ly'aakulu ohutula muukulu. Abafilisiti nibateng'eng'ana olw'obuti mani nibeeruha Abaisiraeli.

¹¹ Abaisiraeli bahuumba ohutula Misipa niboonga hu Abafilisiti ohwoola Bbetikaari, bachia nibabeeta.

¹² Ao Samueli yabukula ekina, naalyoombaha akatikaati wa Misipa neende Seeni, naalikuliha ati, “Ekina ly'Obuhoonyi”. Mani n'aboola ati, “Omwaami atuhoonyere hu lukeendo lwoosi”

¹³ Mani Abafilisiti nibayiingirwa, Omwaami naabakayira ohuseetaanga esituundu sy'Abaisiraeli esiha syoosi si Samueli yali naali omulamu.

¹⁴ Ebiko byoosi bi Abafilisiti bali nibawaamba akatikaati wa Ekironi neende Gaati byakoboserwa Abaisiraeli. Ao mani Abaisiraeli nibakoboserwa ebituundu byaabwe byoosi ohutula hu Abafilisiti. Haandi niyibaao omuleembe akatikaati w'Abaisiraeli neende Abakanani.

¹⁵ Samueli yatuka Yisiraeli endaalo choosi ech'obulamu bwae.

¹⁶ Buli mwaaka yachichaanga Bbeteli, neende Giligaali, neende Misipa. Yakayiraanga obusoolo bw'Abaisiraeli mu bituundu ebyo.

¹⁷ Mani yakobolaangayo engo wae, abuundu mbwe Rama, olwohuba mu ngo wae niyo haandi yi yahalaabaniraanga koti omukayi. Samueli yoombaha Rama alutaari y'Omwaami.