1 Samueli 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esanduuku ly'Endagaano niliri mu Abafilisiti

¹ Luunyuma lw'Abafilisiti ohuwaamba Esanduuku ly'Endagaano, balikiinga balitusa mu Ebbeneesa baliyira mu siko syaabwe sya Asidoodi.

² Baliyira mani nibalita mu nyuumba ya nasaae waabwe olaangwa Dagoni, nibalita aambi neende esifwaanani siloongaloongwe sya nasaae oyo.

³ Nibwahya oludaalo luloondaho echuli muno, abaandu ba Asidoodi banyoola esiloongaloongwe sya Dagoni syali nisikwiire mafumaame hu loba mu moni w'Esanduuku ly'Endagaano y'Omwaami. Ao mani nibasiingisa Dagoni nibakobosa mu bweyaango bwasyo.

⁴ Haandi echulichuli y'oludaalo luloondaho, banyoola bati esiloongaloongwe esyo haandi syali nisikwiire aasi mu moni w'Esanduuku ly'Endagaano. Ehabi lino, omutwe kwasyo neende amahono kasyo koombi kali nikafuniiheho nikali aasi w'omulyaango; omubiri kwong'eene nikudoong'ere omulaamba.

⁵ (Mani sakira kata buti, abalaamisi ba Dagoni, neende abo boosi abamwiinamira boosi mu Asidoodi beengira mu lwangaacha nae haba sibaseena mu mulyaango wakwo.)

⁶ Omwaami yasaandya muno abaandu bomu Asidoodi mani yaabakwiisamo oluteengo. Yabasaandya neende abaandu bomu bituundu bibebodoohaanie bafwiimba amabubuuto.

⁷ Nibabona ebyali nibiholehana, baboola bati, “Nasaae wa Yisiraeli wuno niye owali abasaandya haandi naasaandya Dagoni nasaae weefwe. Haba sihuchia huleha Esanduuku ly'Endagaano lino lyemeede ohuba ano daawe.”

⁸ Ao mani nibatuma bawamwaanda haandi nibalaanga alala abatuki b'Abafilisiti bataanu boosi mani nibabateeba bati, “Huhole hutye Esanduuku ly'Endagaano ya Nasaae w'Abaisiraeli lino?” Mani nibabakobolamo bati, “Esanduuku ly'Endagaano ya Nasaae w'Abaisiraeli muliyire Gaati.” Mani nibaliyira Gaati, esyali esiko siindi sy'Abafilisiti.

⁹ Nae nilyoola Gaati, Omwaami haandi yasaandya esiko esyo syosi, mani yakwiisayo oluteengo luungi muno. Yabasaandya neende amabubuuto akatula hu buli muundu yeesi owali mu siko omwo, abayere alala neende abahuluundu nasilala.

¹⁰ Ao mani Esanduuku ly'Endagaano ya Nasaae w'Abaisiraeli nibaliyira Ekironi, esiko siindi esy'Abafilisiti. Nae nilyoolayo, abaandu bomu siko esyo boobba wuuwi bati, “Batuleetere Esanduuku ly'Endagaano ya Nasaae w'Abaisiraeli ano ohutwiita fweesi!”

¹¹ Mani haandi nibalaanga abatuki b'Abafilisiti mani nibababoolera bati, “Mukoboseyo Esanduuku ly'Endagaano ly'Abaisiraeli mu bwiihalo bwaalyo bweene, hu lihaye ohutwiita fweesi neende abomu madaala keefwe.” Oluteengo lwakwaao mu siko omwo mwoosi olwohuba Nasaae yali naali ohubasaandya muno.

¹² Kata neende abo abatafwa batulaanga amabubuuto mani abaandu nibalirira banasaae baabwe ohubahoonya.