1 Samueli 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuwaambwa hw'Esanduuku ly'Endagaano

¹ Ao mani Abafilisiti nibehung'aania alala nibachaaka ebiita ohulwaania Abaisiraeli. Abaisiraeli bosi nibatula ohuchia ohubalwaania. Abaisiraeli niboombaha ekaambi yaabwe Ebbeneesa nae Abafilisiti nabo nibaba mu Afeki.

² Abafilisiti bataangira ohuseeta, mani luunyuma lw'ohulwaana hululu muno, mani nibayiingira Abaisiraeli, babeetamo abasaacha aambi elifu chine (4,000) hu sipaapi sy'ebiita.

³ Nae Abawonao nibakobola mu kaambi, abeemirisi ba Yisiraeli baboola bati, “Lwasiina leero Omwaami afukiriire Abafilisiti batuyiingira? Leha huchie Silo hutuseyo Esanduuku ly'Endagaano y'Omwaami, hulileete yi huli, libe alala naafwe, lituwonie abasuku beefwe.”

⁴ Mani nibatuma bawamwaanda baachia Silo, ohuleeta Esanduuku ly'Endagaano y'Omwaami w'Obunyala, owihala aakulu hu bakerubbi. Mani abaana aba Eli boombi, Hofuni neende Finehaasi, bosi nibeechera alala neende abo abaleeta Esanduuku ly'Endagaano y'Omwaami.

⁵ Ao Esanduuku ly'Endagaano y'Omwaami nilyoola ango, Abaisiraeli boosi boobba oluwuungu lw'esangaalo olwadengaania esyaalo syoosi.

⁶ Abafilisiti nibawulira oluwuungu lwadengaania esyaalo olwo, beteeba bati, “Oluwuungu lwakiire ao oludengaania esyaalo lutyo oluli mu kaambi y'Abaibburania, lweekesa siina?” Nae nibamanya bati Esanduuku ly'Endagaano y'Omwaami lyali nilyoolere mu kaambi y'Abaibburania,

⁷ batya muno mani nibaboola bati, “Yiluwo nasaae owichire mu kaambi yaabwe! Chitwakaanire! Esiindu siri koti sino sisiiri ohutweholeraho daawe.

⁸ Wiina onyala ohutuwonia banasaae b'amaani abo? Abo nibo banasaae abasiinjira Abamisiri mu siparara!

⁹ Mugume, eng'we Abafilisiti! Mulwaane koti abasaacha, ataali ao, huchia ohuba abawaambe b'Abaibburania, koti sa lu balichiingi abawaambe beefwe. Mani lwaane koti abasaacha!”

¹⁰ Abafilisiti balwaana neende amaani muno mani nibayiingira Abaisiraeli, abachaaka ohwiiruha embiro nibakobola engo waabwe. Ohwiitana hwali ohubitiirifu: Abaisiraeli elifu amahumi kadatu (30,000) nibeetwa.

¹¹ Esanduuku ly'Endagaano ya Nasaae lyawaambwa, mani abaana ba Eli, Hofuni neende Finehaasi boombi nibeetwa.

Ohufwa hwa Eli

¹² Omusaacha owomu nono ya Bbenjamini yatula mu sipaapi sy'ebiita mani niyeeruha ohwoola Silo hu ludaalo lweene olwo. Mani ohweekesa esibeera si yali nasyo, yataandula engubo chae haandi niyeebaha edosi hu mutwe kwae.

¹³ Eli, owali niyeelalihiriire muno n'abaasa hu Esanduuku ly'Endagaano. Eli yali niyehaale hu sisaala syae endulo w'engira naahomoolere emoni. Omusaacha wuno yasalaania emboosi chino mu siko syoosi, buli muundu yeesi naatia mani naatuunduha ohulira.

¹⁴ Eli yawulira oluwuungu olwo mani naateeba ati, “Oluyoka lwakiire ano lwasiina.?” Omusaacha oyo yalalaho bwaangu ohuchia eyiri Eli ohumuboolera.

¹⁵ (Eli yali niyoosa emyaaka amahumi kataanu-na-kane neende chitaanu-na-chidatu, naali aambi ohuwofulira elalira.)

¹⁶ Omusaacha wuno yaboola ati, “Ndeyibire ohutula mu biita, mani njiruuheyo enyaanga yino.” Eli mani n'amuteeba ati, “Mwaana waange, siina esikwiireo?”

¹⁷ Wamwaanda wuno yakobolamo ati, “Abaisiraeli nibo aberuuhe Abafilisiti; mani abaandu baangi muno beeterwe. Haandi ebyo nibiri ao, abaana bao boombi, Hofuni neende Finehaasi beeterwe, haandi Esanduuku ly'Endagaano ya Nasaae liwaambirwe!”

¹⁸ Omusaacha oyo niyalomaloma ebidiira hu Esanduuku ly'Endagaano sa ati, Eli yakuha hu sisaala syae, naakwiira omukoongo aambi neende esiruwa. Yali niyakofula muno, haandi niyahomera lukali mani ohukwa ohwo nihumufunaka ekosi naafwiirao. Yali omweemeresi mu Yisiraeli ohumala emyaaka amahumi kane.

Ohufwa hw'omuhasi mufwiirwe wa Finehaasi

¹⁹ Muhoomwaana wa Eli, omuhasi wa Finehaasi, yali aasito, haandi yali niyoosere endaalo chae ch'ohweetusaho. Mani niyawulira ati Esanduuku ly'Endagaano ya Nasaae limalire ohuwaambwa, haandi ati muhweeng'ene alala neende wamwe boombi bosi bamalire ohufwa, yachaakaniramo ohulumwa mani niyeetusaho.

²⁰ Nae niyali aambi ohufwa, abahasi bali nibamwiibusa bamuboolera bati, “Guma! Mbao wibuule omwaana musyaani!” Nae haba siyadeebayo daawe, haandi siyakobolamo kata nabudiidi.

²¹ Mani naakuliha omwaana oyo ati, Yikabbodi, n'aboola ati, “Oluyaali lwa Nasaae lumalire ohutula hu Yisiraeli.” Yakeraania ohuwaambwa hw'Esanduuku ly'Endagaano neende ohufwa hwa Muhweeng'ene alala neende wamwe.

²² “Oluyaali lwa Nasaae lutulire hu Yisiraeli,” yaboola ati, “olwohuba Esanduuku ly'Endagaano ya Nasaae liwaambirwe.”