1 Samueli 31 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohufwa hwa Saulo neende abaana bae basyaani

¹ Abafilisiti mani nibalwaania Abaisiraeli hu Sigulu Gilibboa. Abaisiraeli baangi beeterwa hu Sigulu Gilibboa, nae abadoong'ereo nibeeyiruhira, omwo nimwo omwali Omutuki Saulo neende abaana bae.

² Nae Abafilisiti babaloondaho babadiira, mani nibeeta abaana basyaani ba Saulo badatu, Yonatani, Abbinadabbu, neende Malikisua.

³ Ohulwaana hwali ohw'amaani muno ohwebodoohania Saulo, mani omusuku naamulasa obusaale mani naanyayaaliha bubi muno.

⁴ Saulo naaboolera omuraaga yali naakiingire ebilwaaniso byae ati, “Sobolayo olugaanga lwao wuunjite, Abafilisiti bakafiiri bano bahaye ohwiicha mani baanjita.” Nae omuraaga oyo naatya muno ohusihola. Mani Saulo n'abukula olugaanga lwae lweene mani naalwetuungaho omweene.

⁵ Omuraaga oyo niyabona ati, Saulo afwiire, yesi yetuunga hu lugaanga lwae lweene mani naafwiira alala neende Saulo.

⁶ Mani eyo niyo engeri yi Saulo, abaana bae badatu, neende omuraaga oyo bafwiiramo; mani abasaacha ba Saulo boosi nibafwiira hu ludaalo lweene olwo.

⁷ Abaisiraeli abali engereha w'Ehooho lya Yesireeli haandi ebukwe w'Omwaalo kwa Yorodaani nibawulira bati eye ly'Abaisiraeli lyali niliruuhe haandi bati, Saulo neende abaana bae basyaani boosi beeterwe, bosi baleha ebiko byaabwe mani nibeeyiruhira. Abafilisiti mani nibeecha nibabimenyamo.

⁸ Nae nibwahya, ebiita nibiweere, Abafilisiti bachia ohunyaka emilaambo, mani nibakaana emilaambo kya Saulo alala neende eky'abaana bae badatu nikyelambaalire hu Sigulu Gilibboa.

⁹ Saulo bamutemaho omutwe, haandi nibamutusaho ebilwaaniso byae. Mani nibatuma bawamwaanda nibabikiingire babite mu syaalo sy'Abafilisiti syoosi, ohuyira emboosi ndai eyiri ebiloongaloongwe byaabwe neende eyiri abaandu.

¹⁰ Ebilwaaniso bya Saulo babita mu nyuumba ya nasaae muhasi Asitarooti, mani nibaaniha omulaambo kwae hu sida sy'esiko sya Bbetisani.

¹¹ Abaandu ba Yabbesi abali mu Gileadi nibawulira esiindu si Abafilisiti bahola Saulo,

¹² mani abasaacha bahiramo esinani nibatulayo nibahuumba esiro syoosi, nibachia mu Bbetisani. Baanula omulaambo kwa Saulo neende eky'abaana bae abasyaani ohutula hu sida, mani nibakileeta Yabbesi, nibakisaambira eyo.

¹³ Mani nibabukula amakuumba kaabwe nibakasiiha Yabbesi, aasi w'omusaala kw'oryaang'i mu siko omwo, haandi nibasiiba enjala ohumala endaalo chitaanu-na-chibiri choong'ene.