1 Samueli 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Luunyuma ebiha nibibitireo, Abafilisiti beecha bahung'aania alala amaye kaabwe ohulwaania Abaisiraeli. Akiisi mani naaboolera Daudi ati, “Osimanye bulai bweene oti ewe neende abasaacha bao muchia ohuchia naange mu biita.”

² Daudi yakobolamo ati, “Eee, ndi omuhalaabani wao, mani omweene ochia ohweboneraho si nyala ohuhola.” Akiisi yaboolera Daudi ati, “Silai nisyo! Njia ohuhuhola obe omuliindi waange w'endaalo choosi.”

Saulo yeteeba hu mulakusi

³ Bulaanu Samueli yali niyamala ohufwa. Abaisiraeli boosi bali nibamulira haandi nibamusiiha mu siko syae sya Rama. Saulo yali niyatusa abalakusi neende ab'emisaambwa boosi mu Yisiraeli.

⁴ Ao Abafilisiti nibebuusa alala mani niboombaha ekaambi yaabwe aambi neende esiko sya Sunemu. Saulo yabuusa alala Abaisiraeli mani niboombaha ekaambi yaabwe hu Sigulu Gilibboa.

⁵ Saulo niyabona eye ly'Abafilisiti, yatya mani naateengereha muno.

⁶ Saulo mani niyeteeba hu Omwaami esy'ohuhola. Nae Omwaami n'atamukobolamo daawe, kata niyehoonyera ebilooto, kata mu hwehoonyera Urimu neende Tumimu, kata mu hwehoonyera abanabbi.

⁷ Mani Saulo naalagira abahalaabani bae ati, “Mungoonyere omuhasi omulakusi, njie mweteebeho.” Abahalaabani bae nibamuboolera bati, “Yiruwo omuhasi mulakusi oli mu Endoori.”

⁸ Saulo mani niyekaluuhania efwaani; niyefwaala engubo chiindi. Mani n'achia neende abahalaabani bae babiri eyiri omuhasi oyo esiro, n'aboola ati: “Hwekongooya wundakule niweteeba hu misaambwa mani wumboolere esichia ohukwaao, haandi wunaangire omusaambwa kw'omuundu yi njia ohulaanga eliita.”

⁹ Omuhasi oyo nae yakobolamo ati, “Mubwadyeeri bweene omanyire bulai bweene ebiindu bi Mutuki Saulo yahola, koti lu yamalao abalakusi neende ab'emisaambwa boosi mu Yisiraeli. Bulaanu lwasiina oteema ohuuhema, n'odaha baanjite?”

¹⁰ Saulo mani naahola esichubo syoolerefu naamuboolera ati: “Koti lu Omwaami ali omulamu, haba soochia husaandisibwa daawe olw'ohuhola sino.”

¹¹ Omuhasi oyo yamuteeba ati, “Hulaangire wiina?” Yakobolamo ati, “Naangire Samueli.”

¹² Omuhasi oyo niyabona Samueli, yaayula mani naaboolera Saulo ati, “Lwasiina wuumbachirisa oti? Niiwe Omutuki Saulo!”

¹³ Omutuki yamuboolera ati, “Otatya daawe. Siina syeene syooli ohubona?” Omuhasi oyo yamukobolamo ati, “Mbona omusaambwa nikutuumbuha nikutula mu loba.”

¹⁴ Haandi n'amuteeba ati, “Kufwaana kutye?” Omuhasi yamukobolamo ati, “Musaambwa kw'omusaacha mukofu niye oli ohutuumbuha. Yefwaalire eganjuula.” Mani Saulo naamanyirao ati oyo yali Samueli, mani yeenama aasi hu loba naamwiisamo oluyaali.

¹⁵ Samueli naateeba Saul ati, “Lwasiina wuusaandya? Siina syeene esikera niwunaanga ohutula emakoombe?” Saulo yakobolamo ati: “Ndi neende ebidinyu biingi muno! Abafilisiti baanwaanisa, haandi Nasaae yajwaang'ire. Nasaae haba sasingobolamo daawe, kata niyehoonyera abanabbi oba ebilooto. Sakira hulaangire wumboolere si hoyeere ohuhola.”

¹⁶ Samueli yamuteeba ati, “Lwasiina wunaanga, nikali mbwe omanyire oti Omwaami yahujwaang'ire haandi yeholere omusuku wao?

¹⁷ Omwaami mweene aholere esiindu si yahuboolere yahuboolera naambitiramo. Ahumalireho obwaami bwao, mani naabuberesa Daudi.

¹⁸ Olwohuba wajeemera amalako k'Omwaami mani n'ohaya ohusihirisira elalira Abamaleki neende ebiindu byaabwe byoosi. Esyo nisyo esikera Omwaami naahuhola atyo buti.

¹⁹ Bulaanu ewe neende Abaisiraeli, Omwaami achia ohubayaanayo mu bunyala bw'Abafilisiti. Muchuli, ewe neende abaana bao basyaani muchia ohuba naange, haandi Omwaami achia ohuwaayo eye ly'Abaisiraeli mu bunyala bw'Abafilisiti.”

²⁰ Esiha syeene esyo, Saulo mani naakwa aasi, naalambaala mu bweeru, naatiire hulw'ebiindu bi Samueli yalomaloma. Amaani kamuweeramo elalira, olwohuba sibulao esiindu syoosi si yali naaliireho oludaalo lwoosi neende esiro syoosi.

²¹ Omuhasi oyo yasuda eyiri Saulo mani yaabona koti lu Saulo yali naatiire, Yamuboolera ati: “Ewe omwaami, mbuliire bi wumbooleere, mani ninyaanayo obulamu bwaange nihola si wuusabire.

²² Bulaanu hwekweeda wesi ofukiirire syesi si husaba. Leha hutekehere esyohulya sidiidi. Ohoyere ohulya hu onyale ohunyoola amaani k'ohukeenda oweeo.”

²³ Saulo yahaya mani n'aboola ati: “Haba siinjia hulya.” Nae abahalaabani bae bosi bateemaho ohumwekweeda alyeeho. Yafukiirira mani naasiingira niyeehala hu sitaanda.

²⁴ Omuhasi oyo yaanguyaho mani niyeeta emoosi enginu yi yali niyaliinda bulai. Yabukulaho obusye naabukaanda mani naabubbamo emigaati ekitaali emibbaahe.

²⁵ Yabileetera Saulo neende abahalaabani bae, mani nibalya. Basiingira mani nibawaao esiro syeene esyo.