1 Samueli 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi naali mu Abafilisiti

¹ Ao Daudi mani naabaasa mu mwooyo kwae ati, “Oludaalo luundi, Saulo achia ohuhwiita. Esihira obulai, handeeyibire bwaangu mu syaalo sy'Abafilisiti. Naluundi Saulo anyala ohuleherao ohungiiyira mu Yisiraeli, mani ao mba njia ohuba bilai.”

² Mani Daudi, alala neende abasaacha ba yali nabo emia chisaasaba (600) nibachia bwaangu eyiri Akiisi omwaana wa Maoki, omutuki wa Gaati.

³ Daudi alala neende abasaacha ba yali nae mani nibamenya Gaati, nibali neende abomu madaala kaabwe. Daudi yali neende abahasi bae boombi, Ahinoamu ohutula Yesireeli, neende Abbigaili, owali namulehwa wa Nabbali, ohutula Karimeeli.

⁴ Saulo niyawulira ati Daudi yeeruhiire Gaati, mani naalehera ao eby'ohumukiiya.

⁵ Daudi yaboolera Akiisi ati, “Nikali mbwe oli omwiicha waange mweene, fukiirire menye mu silala hu biko byao bidiidi. Sibulao esifune sikera ndaamenya alala naawe mu siko sihoongo sino.”

⁶ Mani Akiisi naamuberesa esiko sidiidi sya Sikilaagi, mani ohweema hu sifune sino, Sikilaagi syehola esiko sy'abatuki ba Buyudaaya ohutula ebiha ebyo.

⁷ Daudi yamenya mu syaalo sy'Abafilisiti ohumala embaka y'emyoosi ehumi neende kisaasaba.

⁸ Esiha esyo, Daudi alala neende abasaacha bae baseetaanga Abagesuuri, Abagirisi, neende Abamaleki, abali nibamenya mu situundu esyo ohumala embaka hoongo muno. Baseetaanga esyaalo syaabwe ohutula Suuri ohwoolera elalira hu lwaaho neende Misiri.

⁹ Betaanga abasaacha boosi alala neende abahasi, haandi nibayaaya amakoondi, eng'oombe, esuhiri, engamia, kata neende engubo chosi. Nibamalaanga batyo bakobolaangayo ewa Akiisi.

¹⁰ Akiisi yamuteebaanga ati, “Oseetere situundu siina enyaanga yino?” Mani Daudi yamukobolaangamo ati; “Seetere esituundu sy'emwaalo wa Buyudaaya,” oba “Esituundu sy'emwaalo esy'enono ya Yerahumeeli,” oba “Esituundu si Abakeeni bamenyamo.”

¹¹ Daudi yeetaanga buli muundu yeesi, abasaacha neende abahasi, abulao oyo yeesi owanyalaanga ohuchia mu Gaati, ohubaboolera siina syeene esikwiireo. Daudi yaholaanga atyo ebiha byoosi bi yali mu syaalo sy'Abafilisiti.

¹² Akiisi mani niyeesika Daudi muno haandi n'aboola ati, “Mubwadyeeri bweene, wuno abaandu bae Abaisiraeli bamusyuula, mani achia ohuba omuhalaabani waange endaalo choosi.”