1 Samueli 25 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohufwa hwa Samueli

¹ Samueli mani naafwa, Abaisiraeli boosi beehuung'aania alala mani nibamulira muno. Bamusiiha mu daala lyae mu Rama.

Daudi neende Abbigaili

² Luunyuma, Daudi mu yali sichiimi sya Parani. Yaluwo omusaacha wuundi Maoni, ow'enono ya Kalebbu, olaangwa Nabbali. Yali neende eloba aambi neende esiko sya Karimeeli. Omusaacha wuno yali omuyiinda muno; yali neende amakoondi elifu chidatu (3,000), neende embusi chosi elifu ndala (1,000).

³ Omuhasi wa Nabbali yali Abbigaili. Abbigaili yali omuhasi mukesi haandi ow'esiiso silai, nae Nabbali yali omusaacha omwaalaba haandi omwiimani. Nabbali yali naabeka obwooya bw'amakoondi kae mu Karimeeli,

⁴ Daudi yali mu sichiimi mani naawulira ati Nabbali yali n'abeka amakoondi kae.

⁵ Daudi yatuma abaraaga ehumi; yabalagira ati, “Muchie Karimeeli, mukoonye Nabbali, mani mumuuheesere.”

⁶ Yabakerakira ohuboolera Nabbali bati, “Daudi ahuheesere ewe omwiicha wae, haandi ahubadahisa ebilai byoong'ene, alala neende edaala lyao lyoosi, haandi neende ebyo byoosi by'oli nabyo.

⁷ Awuliire ati oli ohubeka amakoondi kao, haandi adaha ohuhweekesa ati, abaayi bao mbao babeere naafwe eno, nae haba sihubaholereho esyonoono syoosi daawe. Ebiha byoosi bi babeere Karimeeli, sibulao esiindu syaabwe syoosi esiibirwe daawe.

⁸ Teeba abaraaga abo, bachia ohuhuboolera. Mani bulaanu, kwiira abaraaga baange esisa; olwohuba hwiichire hu ludaalo lw'esidyaalo. Hwekongooya endi beresa abahalaabani bao esyo syoosi sy'onyala, neende ese Daudi omwiicha wao.”

⁹ Abaraaga ba Daudi bano boosa emboosi chino eyiri Nabbali koti lu Daudi yabatuma. Mani nibaliindirira abweene ao,

¹⁰ mani Nabbali naabakobolamo ati, “Daudi niye naanu? Niye naanu mweene? Ese haba simuwuliraangaho daawe! Endaalo chino waluwo abawaambe baangi muno abeeyiba hu baami baabwe.

¹¹ Haba siinjia hubukula emigaati kyaange neende amaachi kaange, neende ebisolo bi njitiire ababeki b'amakoondi baange, mbiberese abaandu bataamanyireho yi batula!”

¹² Mani abaraaga ba Daudi bakobolayo eyiri Daudi mani nibamuboolera ebyo byoosi bi Nabbali yali naaboolere.

¹³ Daudi yabalagira ati, “Mwefwaale engaanga cheeng'we!” Mani buli muundu naahola atyo. Daudi yesi yefwaala olugaanga lwae mani aambi w'abasaacha emia chine (400) nibachia neende Daudi, nibaleha emia chibiri (200) nibaliindire ebiindu.

¹⁴ Mulala hu bahalaabani ba Nabbali yaboolera Abbigaili omuhasi wa Nabbali ati, “Omanyireho? Daudi atumire bawamwaanda bae ohutula mu sichiimi yi ali ohuheesa omwaami weefwe, nae yabanyeka bunyeka.

¹⁵ Nae abasaacha abo batuyira bulai muno. Haba sibatudeebaho daawe, haandi ebiha byoosi bi hwali nabo mu siparara, sibulao esiindu syeefwe esyeebwa daawe.

¹⁶ Batuliindaanga esiro neende esideete ebiha byoosi bi hwalichiingi nabo, nihwaaya ebyaayo byeefwe.

¹⁷ Mani bulaanu ohoyere omanye haandi obaase esy'ohuhola. Olwohuba sino sinyala ohuba esy'amasira eyiri omwaami weefwe neende abomu nyuumba yae boosi. Omuundu mubi wuno, abulao onyala ohulomaloma nae yaatekeeresa!”

¹⁸ Bwaangu bweene, Abbigaili yanguyaho mani n'abukula emigaati emia chibiri (200), ebikiingiro by'amaseero bibiri ebichuule efiini, amakoondi kataanu amasaambe, ekiloguraamu ehumi neende chitaanu-na-chibiri ch'emere esiiyire, ebituunduli emia ndala eby'enduli, neende ekeeki ch'emisabbiibbu, mani naabidwiiha hu suhiri.

¹⁹ Abbigaili yaboolera abahalaabani ati, “Mutaangiriremo muchie, syesi njia ohubaloondaho.” Nae haba siyabooleraho wamwe esiindu syoosi.

²⁰ Abbigaili yali ali ohweyirusira esuhiri yae, niyeehirira naakata ekoona liri mu nandaalira y'esigulu, mani niyeduuya hu Daudi naali neende abasaacha bae nibeecha ohubukaanana nae.

²¹ Daudi yali naabaasaanga ati, “Lwasiina ndaliinda bulai emyaandu ky'omusaacha oyo nikiri erwaanyi eno mu sichiimi? Sibulao kata esiindu silala syae esyeebwaho daawe, bulaanu yino niyo engeri yoong'ene eyaali ohunduungiramo hulw'obuhoonyi bundamuberesa!

²² Nasaae ahoya yaanjitirao nindehao kata omusaacha mulala hu baandu abo obwiire nibutaahya!”

²³ Abbigaili niyabona Daudi, yeeha bwaangu hu suhiri yae mani niyeenama aasi hu loba.

²⁴ Yakwa mu makulu wa Daudi, yaamuboolera ati, “Omuhuluundu waange, leha omusaango okwo kube hu ese. Fukiirisa bi ese omuhalaabani wao huboolera

²⁵ Otadeeba hu Nabbali kata nabudiidi, omusaacha mubi oyo! Koti lu liita lyeekesa liti omusiru, nilwo lu Nabbali ali. Ese haba si ndaluwo ebiha bi abahalaabani bao beecheramo, ewe omuhuluundu waange.

²⁶ Bulaanu ewe omuhuluundu waange, Omwaami niye owahuliinda ohaye ohwetuunga haandi ohaye ohwiita abasuku bao. Mani bulaanu ndeechuba endi, koti lu Omwaami ali omulamu, abasuku bao neende abo boosi abali nibadaha ohuhuholaho esibi, bachia ohusaandisibwa koti Nabbali.

²⁷ Bulaanu ewe omuhuluundu waange, fukiirira ohubukula esirabo sino si huleteere, mani osikabeho abasaacha b'oli nabo bano.

²⁸ Hwekongooya ewe omuhuluundu waange, wuundeheremo buli siindu sibi syoosi si ndahola. Omwaami niye ochia ohuhuhola obe omutuki, alala neende abeechuhulu bao bosi, olwohuba oli ohumulwaaniraanga ebiita byae; mani haba soochia ohuhola esiindu sibi syoosi mu bulamu bwao bwoosi.

²⁹ Niyabaao omuundu yeesi ohuseeta, mani yateemaho ohuhwiita, Omwaami Nasaae wao achia ohuhuliinda bulai, koti lu muundu aliinda obuyiinda bw'engaanga y'aakulu. Nae abasuku bao, bachia ohusukunwa eyale koti lu muundu alasa amakina niyehoonyera esimulo.

³⁰ Omwaami niyahamale ohuhola ebiindu bilai byoosi bi yahusuubisa, ewe omuhuluundu waange, mani yahuhola omutuki wa Yisiraeli,

³¹ ao haba soochia hweeyichulisa, oba ohuhuchuunia omwooyo, olwohuba weeta ataali omusaango kwoosi, oba wali niwetuunga omweene. Haandi ewe omuhuluundu waange, Omwaami niyahabe naahubereese ehabi, otanjibiriraanga daawe.”

³² Daudi yaboolera Abbigaili ati, “Omwaami Nasaae wa Yisiraeli akinisibwe, oyo ohutumire enyaanga yino ohumbukaanira!

³³ Nasaae yebasibwe hulw'obulai bw'ebibaaso byao neende hulw'esiindu sy'oholere esyo enyaanga yino ohuunjakamia ohuhola omusaango kw'obwiiti, neende ohwetuunga omweene.

³⁴ Omwaami yaangayiire ohuhunyaala. Nae ndeechuba eyiri Nasaae wa Yisiraeli mulamu endi, oba n'otanguuyeho ohwiicha ohumbukaanira, obwiire nibwahahyeere, haba siyahadoong'ereo omusaacha yeesi hu baandu ba Nabbali.”

³⁵ Ao mani Daudi naafukiirira ohubukula ebiindu bi Abbigaili yali naamuleteere, mani naamuboolera ati, “Kobola engo mani otelalihirira daawe. Njia ohuhola sy'odaha.”

³⁶ Abbigaili yakobolayo eyiri Nabbali, owali naaholere esidyaalo sihoyera omutuki. Yali naameerere muno haandi naasangaalire muno. Mani Abbigaili haba siyamubooleraho esiindu syoosi daawe ohwoola lu echuli yoola nibuhyeere.

³⁷ Mani nibwahya, Nabbali naali omwaaywe, Abbigaili yamuboolera buli siindu. Nabbali yesiinduha mani yaahalihaho omwooyo yadataalira elalira.

³⁸ Endaalo ehumi nichabitao, Omwaami yahalaka Nabbali omwooyo mani naafwa.

³⁹ Daudi niyawulira ati Nabbali afwiire, yaboola ati, “Omwaami afumisibwe! Omweene yetuungire hu Nabbali olw'ohuunyeka, haandi yaangayiire, ese omuhalaabani wae ndaahaya ohuholaho esibi syoosi. Omwaami asaandiise Nabbali hulw'ebyonoono byae.” Ao mani Daudi naatumira Abbigaili emboosi naamusaba badeehisanie.

⁴⁰ Abahalaabani bae baachia Karimeeli eyiri Abbigaili mani nibamuboolera bati, “Daudi atutumire yooli, huhuyire obe omuhasi wae.”

⁴¹ Abbigaili yaguunama yageeng'a omutwe aasi hu loba mani n'aboola ati, “Ndi omuhalaabani wae, ndi omweetekefu ohwosaanga amakulu k'abahalaabani b'omuhuluundu waange.”

⁴² Yasiingiriranamo mani naaniina hu suhiri yae. Abahalaabani bae bataanu bamugooba, yaachia neende abahalaabani ba Daudi mani yaadeehera Daudi.

⁴³ Daudi yali niyadeehya Ahinoamu ohutula Yesireeli, mani bulaanu Abbigaili yesi naaba omuhasi wae.

⁴⁴ Esiha esyo, Saulo yali akabire omuhaana wae Mikaali, owali muha Daudi, naamubereese Paluti omusyaani wa Laisi, otula mu siko sya Galimu.