1 Samueli 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiitwa hw'abalaamisi

¹ Daudi yatula mu siko sya Gaati esyo, mani n'achia mu ng'uungu yiri aambi neende esiko Adulaami. Bamwanaang'ina neende ab'edaala lyaabwe boosi nibawulira yali eyo, mani nibachia yi ali.

² Abaandu abali nibafwiinyirirwa, neende abali neende amakobi, neende abo abali nibasinyiha boosi bachia mani nibeyambaania hu Daudi. Boosi abamweyambaaniaho bali aambi abasaacha emia chine (400). Daudi mani niyeehola omweemeresi waabwe.

³ Daudi yatula ao, mani naachia Misipa esiri mu Moabbu mani naaboolera omutuki wa Moabbu ati, “Nookanya, leha laata neende maama beeche bamenye naawe ohwoola lu njia ohumanya bi Nasaae achia ohuuholera.”

⁴ Mani Daudi naaleha abeebusi bae ew'omutuki wa Moabbu, mani nibamenya nae ebiha byoosi bi Daudi yamala niyeekisire mu ng'uungu.

⁵ Bulaanu omunabbi Gaadi yeecha eyiri Daudi mani n'aboola ati, “Tulao ochie mu syaalo sya Buyudaaya.” Ao mani Daudi n'atulamo, n'achia mu sichaha sya Hereti.

⁶ Ludaalo luundi, Saulo niyali Gibbeya, niyehaale mu siiniha sy'omusaala kw'omusamakwa hu sigulu siindi, naadiirire efumo mu muhono, haandi abachweenufu bae boosi nibeemere nibamwebodoohaanie, yawulira ati Daudi neende abasaacha ba yali nabo, bali nibanyolehaane.

⁷ Saulo yaboolera abahalaabani bae ati, “Tekeerese eng'we Ababbenjamini! Mubaasa muti Daudi anyala yaachia ohukaba emikuunda alala neende endalo ch'emisabbiibbu, haandi neende naabahola ohuba abahoongo mu ye lyae?

⁸ Esyo nisyo esikera eng'we nimuuhoba? Yibulao kata mulala hweeng'we onyala ohumbooleraho ati omwaana waange mweene yahola obulala neende Daudi. Yibulao kata mulala hweeng'we oli ohufwaaho daawe, kata ohumbooleraho ati Daudi, mulala hu basaacha baange beene, ali bulaanu buti ohukiyaanga anyoole ehabi yohuunjita, haandi ati omwaana waange mweene niye oli ohumuchuubaanga!”

⁹ Doegi yali niyeemere ao neende abahalaabani ba Saulo, mani n'aboola ati, “Mbweene Daudi naachiire Nobbu, eyiri Ahimeleki omwaana wa Ahituubbu.

¹⁰ Ahimeleki yateeba Omwaami esiindu si Daudi ahoyere ohuhola, mani naaberesa Daudi ebyohulya, haandi n'amuberesa olugaanga lwa Goliati Omufilisiti.”

¹¹ Mani omutuki Saulo naalaanga Ahimeleki omulaamisi alala neende abeeho bae boosi, bano bosi bali Abalaamisi mu Nobbu, mani boosi beecha eyiri omutuki.

¹² Saulo yaboolera Ahimeleki ati, “Ewe Ahimeleki, tekeeresaho!” Nae yakobolamo ati, “Nduwo, omuhuluundu waange.”

¹³ Saulo yamuteeba ati, “Lwasiina ewe neende Daudi muudyaamo olukwe? Lwasiina wamuberesa ebyohulya neende olugaanga, haandi weteeba eyiri Nasaae hulwae? Bulaanu mbao amalire ohungaluuhanira mani akiiya ehabi yaanjite!”

¹⁴ Ahimeleki yakobolamo ati, “Mu bahalaabani bao boosi, Daudi niye ohiramo obweesikwa. Omuhwe wao mweene, muhoongo w'abaliindi bao, haandi buli muundu mu dooho lyao amwiisamo oluyaali.

¹⁵ Eee, ndeetere eyiri Nasaae hulwae, haandi lino haba siniryo ehabi litaangira ohusihola daawe. Nae ebyohuhulyaamo olukwe, ewe Ow'oluyaali, otasimbasirisaho daawe oba ohusiibaasira hu muundu yeesi owomu daala lyeefwe daawe. Ese haba siimanyireho esiindu syoosi esidiira hu siindu sino daawe!”

¹⁶ Omutuki mani n'aboola ati, “Ahimeleki, ewe alala neende abeeho bao muli ab'ohufwa.”

¹⁷ Mani omutuki naalagira abaliindi bali nibeemere aambi nae ati, “Mwiite abalaamisi b'Omwaami! Beecha beehoba neende Daudi mani baahayira elalira ohuumbooleraho daawe bati yali n'amalire ohwiiruha ohuwaao, kata neende nibali nibasimanya hale muno.” Nae abaliindi bahaya ohusiingisaho omuhono ohwiita abalaamisi b'Omwaami.

¹⁸ Mani Saulo yeecha yaboolera Doegi ati, “Ewe chia obeete sa! Mani Doegi yaachia yabeeta boosi. Hu ludaalo lulala lweene olwo, yanyala ohwiita abalaamisi amahumi kataanu-na-kadatu neende bataanu abali nibali nibo abali nibahoyera ohukiingaanga engubo yomu sibuno.”

¹⁹ Haandi Saulo yeecha yaahola abaandu baandi bali nibamenya mu Noobbi, esiko syali esy'abalaamisi bosi beetwa sa: abasaacha neende abahasi, abaana neende abadoto, eng'oombe, esuhiri, neende amakoondi byoosi byeetwa.

²⁰ Nae Abbiataari, owali mulala hu baana basyaani ba Ahimeleki, yanyala ohweeyiba, yeeruha, mani yaachia yeyambaania hu ye lya Daudi.

²¹ Yanyala ohumuboolera koti lu Saulo yali n'amalire ohwiita abalaamisi b'Omwaami.

²² Daudi nae yamuboolera ati, “Ese nimbeere nimalire ohubonaho Doegi naali eyo hu ludaalo olwo, ese manyire mbwe, achia ohubooleraho Saulo. Mani ese neese oli neende obufunaanibwa bw'ohufwa hw'abeeho bao boosi.

²³ Mani ewe doong'a sa ano mani otatya daawe. Saulo adaha ohutwiita ese neende ewe nae ewe ochia ohubaao omuleembe nooba neende ese.”