1 Samueli 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yonatani ahoonya Daudi

¹ Daudi mani niyeeruha ohutula Nayoti mu Rama, n'achia eyiri Yonatani. Yateeba Yonatani ati, “Holere siina? Musaango siina ku ndania? Sibi siina si ndahola lataao hu adahe ohuunjita?”

² Yonatani yakobolamo ati, “Nasaae atasifukiirira wafwa! Laata yambooleraanga buli siindu syoosi sy'aba naadaha ohuhola, esihoongo oba esidiidi, mani haba siyahangisire sino daawe. Sino haba si syadyeeri daawe!”

³ Nae Daudi yakobolamo ati, “Laatao amanyire bulai bweene koti lu wuundaha, sakira aheengereo, ohutahweekesa sino, olwohuba ochia ohuchuniswa muno mu mwooyo. Ndeechuba yi oli koti lu Omwaami ali omulamu endi ese ndoong'iiseyo esiha sidiidi fwe!”

⁴ Yonatani yaboolera Daudi ati, “Njia ohuholera buli siindu syoosi sy'odaha.”

⁵ Daudi yakobolamo ati, “Muchuli ludaalo lw'Esidyaalo sy'Omwoosi Muyaaha,” mani hoyeere ohuliira alala neende omutuki. Nae n'otadeeba daawe, leha njie mani ndeekise mu siino ohwoola engoloobe y'oludaalo luloonda hulwa muchuli.

⁶ Lataao naamanya ati haba siindiwo, muboolere oti: “Daudi yandekongooyere mulehe achie Bbetilehemu, olwohuba abomu daala lyaabwe boosi bachia ohuyaana esiyaanwa si bayanaanga buli mwaaka.

⁷ Nae n'aboola ati, ‘Silai,’ njia ohuba bulai; nae n'anyoolera, ochia ohumanya oti siluwo esyonoono sy'amaliriire ohuuholaho.

⁸ Hwekongooya wuungwiire esisa, mani oliinde esisuubise syoolerefu sino si wuuholeere. Nae niimba niindiho omusaango, ewe omweene njite! Lwasiina onjira eyiri lataao baanjite?”

⁹ Yonatani yaboolera Daudi ati, “Esyo otasibaasaho kata nabudiidi, olwohuba laata aba naali neende esibi sy'atekeehe ohuhuholaho, haba siimba hubooleere daawe.”

¹⁰ Daudi yateeba Yonatani ati, “Wiina mweene ochia ohumboolera ati lataao ahukoboolemo neende etima?”

¹¹ Yonatani yaboolera Daudi ati, “Leha huchie mu mikuunda.” Mani nibachia mu mikuunda boombi.

¹² Yonatani yaboolera Daudi ati, “Leha Omwaami Nasaae wa Yisiraeli abe omuloli weefwe! Esiha siti muchuli, haandi neende hu ludaalo luloondaho njia ohuteeba laata. Nimbona endi hulomalomaho bulai, njia ohuhutumira omuundu ahweekese.

¹³ Nae mbona endi laata adaha ohuhuholaho obubi, mani ndahaya ohuhweekesa, ndahuwonia wawaao omuleembe, leha Omwaami yanjitireo. Leha Omwaami abe naawe koti lu yalichiingi neende laata!

¹⁴ Nisisiiri omulamu, liinda esisuubise syoolerefu, haandi obe omuloli yi ndi. Nae niifwa,

¹⁵ yekesaanga obuwulisi bwao eyiri edaala lyaange endaalo choosi pe. Mani Omwaami niyahabe n'amalire ohusihirisa abasuku bao boosi,

¹⁶ esisuubise syeefwe esyo hu buli muundu, sihoya syadoong'a nisitahalaakwe. Nae nisihalakwa, Omwaami achia ohuhusaandya.”

¹⁷ Yonatani haandi yahola Daudi yasuubisa baheeraneenge, olwohuba Yonatani yali niyaheera Daudi muno koti lu yeeheera omweene.

¹⁸ Yonatani yaboolera Daudi ati, “Muchuli nilwo oludaalo lw'Esidyaalo sy'Omwoosi Muyaaha, bachia ohubona bati haba s'oluwo daawe, olwohuba bati haba s'obeere hu sidyaalo daawe.

¹⁹ Oludaalo luloonda muchuli, ohutabaao hwao huchia ohumanyihana muno. Mani chia abuundu yi weekisa esiha sira, weekise emukoongo w'esituuli sy'amakina esiri eyo.

²⁰ Mani njia ohulasa obusaale budatu hu ndulo wako, mbe koti oli ohuhubba esabba.

²¹ Ao mani njia ohutuma omuhalaabani waange achie akoonye obusaale obwo. Nimuboolera endi ‘Bona, obusaale buli hu lwaande luno lu oliho; butuseyo’ mani ao onyala ohwekisulayo. Koti lu Omwaami ali omulamu, ndeechuba endi kabulao amasira kachia ohuhukwaaho daawe.

²² Nae nimboolera omuhalaabani waange endi, ‘Obusaale buli hu lwaande luundi lula mu moni wao,’ ao mani waao, olwohuba Omwaami anaba ali ohuhuyira eyale.

²³ Nae ebidiira hu sisuubise si huholaniire abeene-na-beene, Omwaami niye ochia ohubona ati husyooseresa endaalo choosi pe.”

²⁴ Daudi mani niyeekisa mu siino. Hu ludaalo lw'Esidyaalo sy'Omwoosi Muyaaha, omutuki Saulo yehala hu sidyaalo ohulya emideeho.

²⁵ Mani niyeehala mu bwiihalo bwae bwa buli ludaalo, aambi neende esida. Abbuneeri yehala mu lubafu wae, nae Yonatani niyeehala n'ataangalisaanie nae. Obwiihalo bwa Daudi bwadoong'a obuhaya.

²⁶ Nae sibulao si Saulo yaboolaho hu ludaalo olwo, olwohuba yabaasa ati, “Esiindu si nyala ohuba nisimukwiireho, mani haba yaahaya ohuba omulabye, mubwadyeeri, haba si mulabye daawe.”

²⁷ Hu ludaalo lwaloondaho, oludaalo luloonda hu Sidyaalo sy'Omwoosi Muyaaha, obwiihalo bwa Daudi haandi bwali nibudoong'ere obuhaya. Saulo naateeba Yonatani ati, “Lwasiina Daudi s'abeere hu sidyaalo ekulo neende enyaanga yino?”

²⁸ Yonatani yakobolamo ati, “Daudi yandeekwedere mufukiirire achie Bbetilehemu.

²⁹ Aboolere ati, ‘Hwekweeda, ndahe njie, olwohuba ab'edaala lyeefwe bali mu siko ohuyaanayo esiyaanwa, mani mwaanama yandagiire mbeeyo. Mani n'oli omwiicha waange mweene, ndehe njie mbone abeeho baange.’ Sakira Daudi ataanyalire ohuba mu bwiihalo bwae hu meesa yao eyo.”

³⁰ Saulo yanyoolerera Yonatani mani naamuboolera ati, “Ewe omwaana mujeemu haandi otesikiha koti maakoo! Bulaanu manyire endi oli ohukwiira Daudi haandi omweene wetusaamo muno oluyaali, mani n'odiisa maakoo esoni!

³¹ Hoya omanye oti Daudi n'asisiiri omulamu, ewe haba soochia huba omutuki w'esyaalo sino? Chia mani omuleete ano, olwohuba ahoyera ohufwa!”

³² Yonatani yakobola mu Saulo ati, “Lwasiina yeetwa? Aholere siina syeene?”

³³ Ao mani Saulo naalasa efumo ohumufumita. Yonatani mani naasimanya ati laatang'ene yali naamaliriire ohwiita Daudi.

³⁴ Yonatani yasiingira yaatula hu sidyaalo etima nilimudiirire muno, mani naahaya ohulyaaho esiindu syoosi hu ludaalo olwo, oludaalo lwohubiri lw'Esidyaalo sy'Omwoosi Muyaaha. Yelalihirira muno hulwa Daudi, olwohuba Saulo yali naamunyoleese.

³⁵ Nibwahya echuli, Yonatani yachia mu siino ohubukaanana neende Daudi, koti lu bali nibafukiirisaanie. Yachia neende omusyaani muraaga

³⁶ mani naamuboolera ati, “Yiruha okoonye obusaale bu ndasa.” Omusyaani oyo yeeruha, mani Yonatani naalasa olusaale lwabita lwaakwa mu moni wae.

³⁷ Omusyaani muraaga oyo niyoola abuundu yi lusaale lwali nilukwiire, Yonatani yamulaangira mu kono ly'aakulu n'aboola ati, “Olusaale luli emberi wao!

³⁸ Oteyemeresa ao! Yalaalaho!” Omusyaani yadoola olusaale olwo mani naakobola eyiri omwaami wae.

³⁹ Nae omusyaani oyo haba siyamanya amahuluundu kabyo byoosi. Yonatani neende Daudi boong'ene nibo abali nibamanyire.

⁴⁰ Yonatani yaberesa omusyaani oyo ebilwaaniso byae, naamuboolera ati “Biyire mu siko.”

⁴¹ Omusyaani muraaga oyo niyamala ohuwaao, Daudi yekisula ohutula emukoongo w'esituuli sy'amakina, mani naasigama aasi amahabi kadatu. Daudi neende Yonatani boombi batuunduha ohulira nibakwiichaane mu birifu. Daudi yali neende esibeera siingi muno esihiraho esya Yonatani.

⁴² Yonatani mani naaboolera Daudi ati, “Nasaae abe naawe. Omwaami achia ohubona ati, fweembi neende abeechuhulu beefwe, huchia ohudiira endaalo choosi esisuubise syoolerefu siihuholere fweembi hudoong'a koti lu hweechubire ewe neende ese, alala neende abeechuhulu bao neende abaange, bachia endaalo choosi ohwomiisa esisuubise silafu sino sihwaholanira.” Daudi mani naawaao, nae Yonatani naakobolayo mu siko.