1 Samueli 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala ya Hana

¹ Hana yasaba ati: “Omwaami yechuuse omwooyo kwaange esangaalo; ndi omusangaafu muno hulw'ebiindu bi yaholeere! Syesi njeheho abasuku baange; nga ndi omusangaafu koti lu Nasaae yahoonyere!

² “Abulao oyo yeesi oli omwoolerefu koti Omwaami wuno; abulao oyo yeesi ofwaana nae, abulao omuliindi koti Nasaae weefwe wuno.

³ Yakamya ohwepaahira aakulu hwao ohwo; nyisa emboosi ch'ohwepaaha chao echo. Olwohuba Omwaami niye Nasaae omanyire, haandi niye oheengao buli siindu si baandu bahola.

⁴ Obuyiingo bw'ab'amaye b'amaani bufunaakwe, nae abakata bemeeda ohunyoola amaani.

⁵ Abaandu balichaanga bulai hale nibeekuta, bulaanu bapakasa hu banyoole ebyohulya, nae abalumwaanga enjala bulaanu haba sibasiilumwa daawe. Omuhasi mukuumba yebuule abaana bataanu-na-babiri, nae owali niyeebula abaana baangi, yibulao yi yadoong'isa daawe.

⁶ Omwaami yeeta haandi yakobosao obulamu; ayira abaandu mu syaalo sy'emakoombe haandi yabalamusa.

⁷ Akera abaandu baandi baaba abamanani, nae yaberesa abaandi obuyiinda; aloongoyasa abaandi baandi haandi yakera abaandi baaba abahunuufu.

⁸ Asiingisa abamanani naabatusa mu lufu haandi yaaniinia abali mu ngisa yaabatusa mu ngisa yaabwe. Abahola bakeendera alala neende abaana b'abatuki haandi yabata mu bwiihalo bw'oluyaali. Olwaalo lw'esyaalo lwosi lw'Omwaami; ohwo nihwo hu yoombahira esyaalo.

⁹ “Akayiriraanga obulamu bw'abaandu bamweesika, nae abonooni bahamyuuhira mu siirima; omuundu haba s'ayiingiraanga hulw'amaani kae keene.

¹⁰ Abasuku b'Omwaami bachia ohusihirira; achia ohubaaduluhiraho n'ali muukulu. Omwaami niye ochia ohuheengera esyaalo syoosi omusaango; niye ochia ohuberesa omutuki amaani, haandi niye okera omutuki yi yadoola yayiingira.”

¹¹ Elikana mani naakobolayo engo mu Rama, nae omwaana Samueli naadoong'a mu Silo naahalaabanira Omwaami, omulaamisi Eli naamuliindire.

Abaana ba Eli

¹² Abaana basyaani ba Eli bali abaandu batahoyera. Sibadeebaanga hu Omwaami daawe.

¹³ Haandi sibadeebaangaho kata neende hu biindu bi balaamisi badahaanga ohubona abaandu nibabihola. Mu sifwo sy'esyo, omuundu niyayaanaanga esiyaanwa, omuhalaabani w'omulaamisi yechaanga neende ewuma y'amasaga kadatu. Enyama niyalichiingi niyisideehwa,

¹⁴ yafumitaanga ewuma eyomu nuungiro, mani esyo syoosi si wuuma yatusaanga mu nuungiro, syalichiingi esy'omulaamisi. Abaisiraeli boosi abeechaanga mu Silo ohuyaana ebiyaanwa bayirwaanga nasilala batyo.

¹⁵ Ohumeeda ohwo, kata neende amasinya nikali nikatatuswaho kasaambwe, omuhalaabani w'omulaamisi yeechaanga mani naaboolera oyo oli ohuyanaangayo esiyaanwa esyo ati, “Mberese mberi enyama y'omulaamisi y'ohusaamba; haba s'acha ohufukiirira enyama ndeehe ohutula hweewe, ohutusaho enyama mbisi yoong'ene.”

¹⁶ Nae omuundu niyakobolaangamo ati, “Leha huhole ebiindu koti lu bihoyera, hutaangire husaambe amasinya mberi; hu weemeo obukule ebyo by'odaha,” nae omuhalaabani w'omulaamisi aboola ati, “Haba! Yimberese sa bulaanu! N'ohaya ohuumberesa, njia ohuhunyuula neende amaani.”

¹⁷ Esibi sy'abaana ba Eli sino, syaali esibitiirifu muno ohuba esyonoono mu moni w'Omwaami, olwohuba babukulaanga ebiyaanwa bichiira Omwaami nibabimalamo oluyaali luli lutyo.

Samueli naali mu Silo

¹⁸ Ao mani Samueli niyemeeda ohuhalaabanira Omwaami n'asisiiri omuyere, yefwaalaanga ekaanju lafu ely'elaasi.

¹⁹ Buli mwaaka ng'ina yamunabiraanga ekaanju diidi, mani naamuyiriraanga buli lu yachanaanga neende wamwe nibachia ohuyaana esiyaanwa sya buli mwaaka.

²⁰ Mani Eli yaberesaanga Elikana neende omuhasi wae ehabi, haandi yabooleraanga Elikana ati, “Leha Omwaami ahuberese abaana baandi ohubitira mu muhasi wuno, ohwiichusao obweyaango bwa wuno yi mwamudiisa.” Ebyo nibyawechaanga, bakobolaangayo engo waabwe.

²¹ Omwaami yaberesa Hana ehabi, mani niyeebula abaana basyaani baandi badatu, neende abaana bahaana babiri. Nae omuraga Samueli yahula naali mu buhalaabani bw'Omwaami.

Eli neende abaana bae

²² Ao Eli yali naakofuule muno. Yemeeda ohuwulira buli siindu si basyaani bae bali nibaholaanga Abaisiraeli, haandi koti lu bali nibakonaanga neende abahasi baholaanga hu mulyaango kwiingira mu Yeema ly'Ohubukaananiraangamo Omwaami.

²³ Mani naabateeba ati, “Lwasiina muhola ebiindu biri biti? Buli muundu ali ohumboolera ebiindu bibi bi muli ohuholaanga.

²⁴ Lehere ao, baana baange! Sino siindu si tiisa muno si baandu b'Omwaami bano bali ohulomalomaangaho!

²⁵ Omuundu yeesi niyonoonera owuundi, Nasaae mweene niye ochia ohumulwaanirira; nae wiina mweene onyala ohulwaanirira omuundu wonoona eyiri Omwaami?” Nae haba sibatekeeresaanga saabwe, olwohuba Omwaami yali naaheengereo ohubeeta.

²⁶ Omuraga Samueli yemeeda ohuhula neende ohunyoola ohudahwa eyiri Omwaami neende eyiri abaandu.

Obunabbi bubi budiira hu daala lya Eli

²⁷ Omunabbi wuundi yeecha eyiri Eli neende emboosi ohutula eyiri Omwaami yiti: “Kuukao Arooni neende edaala lyae bali abawaambe b'omutuki wa Misiri, ese mweene mani nindeyekesa yi bali.

²⁸ Ohutula mu nono choosi cha Yisiraeli, ndadoolamo edaala lyae ohubeechaanga abalaamisi baange, ohuhalaabaniraanga hu alutaari, ohunioohesaanga obubbaani, haandi ohwefwaalaanga engubo yilaangwa yiti efodi, ohundeteebaangaho. Haandi ndababeresa obunyala bw'ohuyiraanga omukabo hu biyaanwa bisaambirwa hu alutaari.

²⁹ Lwasiina, mani, muhondyoola mutyo neende esiwonya ebiyaanwa neende ebibereswayo biindusaanga hu baandu baange? Lwasiina, ewe Eli, wiisa oluyaali mu basyaani bao ohuhiraho koti lu wuunjisamo, n'obaleha nibehomesera mu hulya ebituundu bihiramo obulai eby'ebiyaanwa bi baandu baange baanyaanira?

³⁰ Ese, Omwaami Nasaae wa Yisiraeli, ndasuubisa hale endi edaala lyao, haandi neende oluya lwao luchia ohuhalaabaniraanga koti abalaamisi esiha syoosi. Nae bulaanu ndi ohuboola endi, haba sisiidaha endyo daawe! Njia ohwiisaanga oluyaali mwaabo abanjisamo oluyaali, nae njia ohusinyihira abo abaandekeresa.

³¹ Tekeeresa, esiha sichia ohwoola, si njia ohwiita abaana bayere boosi abali mu daala lyao, neende mu nono yao, mani abuleo omuundu yeesi mu daala lyao oyiindira yoola ohukofula.

³² Ao ochia ohutingaalaanga neende ehiinda ebilai bi ndahaholere abaandu baandi ba Yisiraeli, nae abulao owomu daala lyao olihula yoola ohukofula daawe.

³³ Nae njia ohuhola mulala hu beechuhulu bao adoong'eo, mani ahalaabanire koti omulaamisi. Nae oyo achia ohuwofula, ahaye ohuba neende esuubi lyoosi, haandi abeechuhulu bao baandi boosi bachia ofwichaanga nibali abamanani.

³⁴ Mani abaana basyaani bao, Hofini neende Finehaasi boombi nibafwa hu ludaalo lulala, sino sichia ohuhweekesa siti buli siindu syoosi si mboolere sichia ohwoolerera abweene.

³⁵ Njia ohwedoolera omulaamisi ochia ohuba omweesikwa yi ndi, haandi ochia ohuholaanga buli siindu syoosi si ndaha ahole. Njia ohumuberesa abeechuhulu, abachia ohuhalaabaniraanga mu moni w'omutuki waange mudoole.

³⁶ Omwiichuhulu wao yesi ochia ohunyala ohuwonao achia ohuchia eyiri omulaamisi oyo mani amusabe eseende neende ebyohulya, haandi achia ohumweekongooya afukiirirwe ohuhoonya abalaamisi, hu anyale ohunyoola esiindu syohulya.”