1 Samueli 19 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi asaandisibwa neende Saulo

¹ Saulo yaboolera Yonatani omwaana wae alala neende abachweenufu bae boosi beete Daudi. Nae Yonatani yali niyaheera Daudi muno.

² Yonatani yaboolera Daudi ati, “Laata ali ohukiiya ohuhwiita. Mani teemaho koti lu sinyaliha weliinde, muchuli echuli wekise abuundu weengiso mani odoong'e eyo.

³ Njia ohuchia nyeme aambi neende laata mu siino y'onabe niweekisire, mani muboolere ebihudiiraho. Nimanya esiindu syoosi, ohumutusaho esiindu syoosi, njia ohusihweekesa.”

⁴ Yonatani mani naafumia Daudi muno eyiri Saulo n'aboola ati, “Ewe omuhuluundu, otaholaho esyonoono syoosi hu muhalaabani wao Daudi. Sibulao esiindu sibi syoosi si yali ahuholere; ohutusaho, buli siindu si yahola syali esy'obuhoonyi muno yooli.

⁵ Daudi yayaanayo obulamu bwae lu yeetera Goliati, mani Omwaami naayiingirira Abaisiraeli ebiita by'amaani. Niwabona otyo wasangaala muno. Bulaanu lwasiina odaha ohwonoona omuundu obulaho omusaango kwoosi, mani wiite Daudi ataali esifune syoosi daawe?”

⁶ Saulo mani naata omwooyo hu biindu bi Yonatani yali naalomaloome, mani niyeechuba mu liita ly'Omwaami ati haba saacha hwiita Daudi daawe.

⁷ Ao Yonatani naalaanga Daudi, naamuboolera buli siindu syoosi; mani naamuyira eyiri Saulo. Daudi yemeeda ohuhalaabanira omutuki koti lu yaholaanga hale.

⁸ Ebiita neende Abafilisiti haandi nibikwaao. Daudi yaseeta Abafilisiti n'abalwaania mani naabayiingirira elalira, Abawonao nibeeruha.

⁹ Ludaalo luundi omusaambwa mubi okutula eyiri Omwaami kwaniina Saulo. Yali niyehaale mu nyuumba yae naadiirire efumo, nae Daudi yali ao, naahubbaanga obuhana bwae.

¹⁰ Saulo yateemaho ohufumita Daudi efumo, limubitemo lidiire esida. Nae Daudi niyeebalula, mani efumo nilibita nilyeechomeha hu sida. Daudi yeeruha mani niyeewonia.

¹¹ Esiro syeene esyo, Saulo yatuma bawamwaanda bachie baliinde hu nyuumba ya Daudi bamwiite echuli nibuhyeere. Mikaali, omuhasi wa Daudi, yamulabula ati, “N'oteeruhe esiro sino wawonia obulamu bwao, muchuli ochia ohwiitwa.”

¹² Mikaali yeesera Daudi mu dirisa, mani Daudi niyeeruha naawona.

¹³ Mikaali n'abukula esiloongaloongwe sy'adaala, naasyaalisa hu buliri. Yata enamutwe wasyo omuto okwaholwa mu bwooya bw'embusi, mani naasibwiihaho engubo.

¹⁴ Bawamwaanda ba Saulo nibeecha ohudiira Daudi, Mikaali yababoolera ati Daudi mulwaae.

¹⁵ Nae Saulo yatuma bawamwaanda bakoboleyo beebonereho Daudi. Yabalagira ati, “Muchie mumukiingire mu sitaanda syae, mumuleete ano, mumwiita.”

¹⁶ Bawamwaanda nibeengira mu nyuumba, banyoola esiloongaloongwe sy'adaala nisiri mu buliri, omuto kw'obwooya bw'embusi nikuli enamutwe wasyo.

¹⁷ Saulo yateeba Mikaali ati, “Lwasiina wuumbachiriise otyo, waleha omusuku waange yeeyiba?” Mikaali yakobola mu Saulo ati: “Yambooleere ati, nitamuleha yawaao, achia ohuunjita.”

¹⁸ Daudi yeeyiba mani n'achia eyiri Samueli mu Rama, naamuboolera buli siindu syoosi si Saulo yali naamuholere. Ao mani Daudi neende Samueli basiingira nibachia Nayoti mani nibamenya eyo.

¹⁹ Baboolera Saulo bati: “Daudi ngula ali Nayoti mu Rama.”

²⁰ Saulo mani yatuma bawamwaanda ohudiira Daudi. Babona omukaanda kw'abanabbi nibali ohuhina haandi nibalaanga, Samueli naali nabo, haandi naali koti omwiimirisi waabwe. Mwooyo wa Nasaae naaniina bawamwaanda ba Saulo, mani bosi nibachaaka ohuhina neende ohulaanga.

²¹ Saulo niyawulira hu sino, yatuma bawamwaanda baandi, haandi bosi nibatulaniramo ohuhina amahina neende ohulaanga. Saulo haandi yatuma bawamwaanda baandi ehabi lyahadatu, haandi esiindu nasilala nisibeeholehanaho.

²² Bulaanu Saulo mweene naachia mu Rama. Niyoola hu sulo hoongo eyiri abuundu mbwe Seku, yateeba ati: “Samueli neende Daudi bali yeena?” Bamuboolera bati: “Bali Nayoti mu Rama”.

²³ Mani niyali hwaachia Nayoti mu Rama, Mwooyo wa Nasaae naamuniina, mani Saulo n'achia naali ohulaanga ohwoola lu yoola Nayoti mu Rama.

²⁴ Yefwaalulamo engubo chae, mani naahina haandi naalaangira mu moni wa Samueli. Mani n'akalama syeekenye oludaalo olwo lwoosi neende esiro esyo syoosi. (Ano niwo yi nomanoma yachaakira eyiboola yiti, “Saulo yesi yehola omunabbi?”)