1 Samueli 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Goliati ataangana Abaisiraeli

¹ Abafilisiti babuusa amaye kaabwe ohulwaana, bebuusira mu siko sya Sooko syomu Buyudaaya. Boombaha ekaambi abuundu alaangwa mbwe Efesidamiimu, ali akatikaati wa Soko neende Aseka.

² Saulo neende ab'amaye bae Abaisiraeli bebuusa mani niboombaha ekaambi mu hooho lya Ela, nibeetekehera ohulwaania Abafilisiti.

³ Abafilisiti beema hu sigulu silala nae Abaisiraeli nibeema hu siindi, akatikaati waabwe yaluwo ehooho.

⁴ Omusaacha olaangwa Goliati, ohutula mu siko sya Gaati, yatula mu kaambi y'Abafilisiti ohwehudumbasira hu Abaisiraeli. Goliati yali omusaacha muleeyi muno, niyoola aambi emiita chidatu.

⁵ Yali niyefwaalire ehuumba y'omugasa, obusito bwaayo bwali ekiloguraamu amahumi kataanu neende chitaanu-na-chibiri neende ekofia y'omugasa.

⁶ Haandi yali niyefwaalire ehuumba y'omugasa, haandi naali neende efumo ly'omugasa hu mabeka kae.

⁷ Olubaango lw'efumo lyae lwali oluhoongo muno olwaakana neende omusiruunga kw'esyuuma sinaba engubo, nae efumo lyeene lyali ely'esibya, obusito bwaalyo bwali aambi ekiloguraamu chitaanu-na-chibiri. Yali neende omukiingira engabo yae. Oyo niye owamwiimiriraangamo.

⁸ Goliati yeema mani naahuumula naaboolera ab'eye ly'Abaisiraeli ati, “Siina syeene si muli ohuhola eyo, nimweetekeha ohulwaana ebiita? Ese ndi Omufilisiti, eng'we muli abawaambe ba Saulo! Doole mulala hu basaacha beeng'we yeeche yanwaanie.

⁹ N'ananyale ohunwaania mani yaanyiingira yaanjita, efwe huchia ohuba abawaambe beeng'we; nae ese nimuyiingira mani ndamwiita, eng'we muchia ohuba abawaambe beefwe.

¹⁰ Mani bulaanu haandi esiha sino syeene, ndi ohwehuduumbasa hu ye lya Yisiraeli. Mumberese omusaacha mulala yaanwaanie!”

¹¹ Ao mani Saulo neende abasaacha ba yali nabo nibawulira emboosi ch'Omufilisiti, bakwaamo oluteengo.

Daudi naali mu kaambi ya Saulo

¹² Daudi yali omwaana wa Yese Omuwefuraate ohutula Bbetilehemu mu Buyudaaya. Yese yali neende abaana basyaani bataanu-na-badatu. Mu biha bi Saulo yali omutuki, Yese yali n'akofuule muno.

¹³ Abaana bae bahuluundu badatu bali bachiire neende Saulo mu biita. Omuhuluundu mweene yali Eliabbu, oloondaho yali Abbinadabbu, owahadatu yali Saama.

¹⁴ Daudi niye owali walaka. Bamwanaang'ina bahuluundu bala bali nibamenya neende Saulo.

¹⁵ Nae Daudi yachichaanga eyiri Saulo haandi naakobolaanga Bbetilehemu ohwaaya amakoondi ka laatang'ene.

¹⁶ Goliati yehudumbasiraanga hu Baisiraeli buli chuli neende buli ngoloobe ohumala embaka y'endaalo amahumi kane.

¹⁷ Yese yaboolera Daudi ati, “Bukula ekiloguraamu ehumi ech'emere esiyire, alala neende emigaati ehumi kino, mani waanguyeho oyirire bamwaanamao mu kaambi.

¹⁸ Haandi ebitole ehumi bino eby'amafuta masache, biyirire omuhoongo waabwe. Chia obone bamwaanamao koti lu bali ohuchiiririra mu biita, mani okobole neende esiindu syomiisa siti obabweeneho haandi siti bali bulai.

¹⁹ Omutuki Saulo, bamwaanamao, neende Abaisiraeli boosi bali mu hooho lya Ela, balwaania Abafilisiti.”

²⁰ Daudi yawuuna mu mabwiibwi ohusiingira nibwahya, yaalehera omuundu wuundi obwaayi bw'amakoondi, mani naakiinga ebyohulya ebyo, naabiyira koti lu Yese yali naamuboolere ohuhola. Daudi yoola mu kaambi esiha si Abaisiraeli bali nibatula ohuchia ohwetekeha ohulwaana ebiita, nibehuuma mu makono k'ebiita.

²¹ Amaye k'Abafilisiti neende ak'Abaisiraeli kali nikalingalaane, niketekeeha ohulwaana.

²² Daudi yalehera omuhoongo oliindaanga ebiindu ebyohulya ebyo, mani niyeeruha ohuchia eyiri ebiita, naachooma eyiri bamwanaang'ina, mani naabateeba koti lu bali nibali.

²³ Daudi niyali naasilomalomaanga nabo, nae bone, Goliati yatulayo mani niyehuduumbasira hu Baisiraeli koti lu yali yanala ohwehuduumbasaanga. Daudi mani naawulira bi yali ali ohuboola.

²⁴ Abaisiraeli nibabona Goliati, bakwaamo oluteengo mani nibeeruha.

²⁵ Abaisiraeli baboolanira bati, “Mumuboneho sa! Tekeerese koti lu yehuduumbasa! Omutuki Saulo yasuubisa ohuberesa obuyiinda buungi muno omuundu onamwiite; haandi achia ohumuberesa omuhaana wae amudeehye. Haandi ati haba saachia hukanya edaala lya laatang'ene ohutoyaanga omusolo.”

²⁶ Daudi yateeba abasaacha bali aambi nae ati, “Omuundu oneete Omufilisiti wuno, mani yaatusa esoni chino choosi hu Yisiraeli, achia ohunyoola siina syeene? Nae Omufilisiti wuno, otaali omuhebe, niye naanu, owehuduumbasira hu ye lya Nasaae mulamu?”

²⁷ Bamuboolera ebyo byoosi bi bachia ohuholerwa omuundu oneete Goliati.

²⁸ Eliabbu, owali mwanaang'ina Daudi muhuluundu, yawulira Daudi naali ohulomalomaanga neende abasaacha abo. Eliabbu yanyoolerera Daudi mani n'amuteeba ati, “Wiichire ohuhola siina ano? Wiina mweene oli ohwaaya amakoondi kao akomu sichiimi? Ow'esyeejo ewe! Manyire endi wiichire ohweema sa ohwelolera ebiita!”

²⁹ Daudi yamuteeba ati, “Bulaanu ese holereho siina syeene? Ohuteebaho sa hwosi huba ohubi?”

³⁰ Daudi yakaluuhana mani naateebaho omusaacha wuundi esiteebo nasilala esyo, nae buli lu yateebaanga, bamukobolaangamo esiindu nasilala.

³¹ Abasaacha baandi bawulira emboosi chi Daudi yalomalomaanga, mani nibaboolera Saulo, Saulo yatuma balaange Daudi.

³² Daudi yaboolera Saulo ati, “Ewe Ow'oluyaali, leha abulao omuundu yeesi ohoyere ohutya Omufilisiti wuno daawe! Ese njia ohuchia mulwaanie.”

³³ Saulo nae yamukobolamo ati, “Haba daawe. Ewe haba s'onyala ohulwaania Omufilisiti oyo! Ewe osisiiri ahasyaani hayere, nae ye musaacha mulwaani obulamu bwae bwoosi!”

³⁴ Daudi yaboolera Saulo ati, “Ewe Ow'oluyaali, ese omuhalaabani wao ndi omwaayi w'amakoondi ka laata yaange. Edalang'i oba elyaaka nibiicha ohunyaka omwaana kw'ekoondi,

³⁵ ese njiloondaho, ndayiseeta, mani ndaabina omwaana kw'ekoondi okwo. Edalang'i oba elyaaka nilikaluuhana ohunwaania, likwa mu mamiro mani nilihuya niliita.

³⁶ Ese ndaamala ohwiitaho edalang'i nyiingi neende amaaka maangi, mani njia ohuhola nasilala endyo Omufilisiti otaali omuhebe wuno, owachalaasa eye lya Nasaae mulamu.

³⁷ Omwaami wuno yaamonia ohutula hu madalang'i, neende hu maaka; haandi achia ohuumonia ohutula hu Mufilisiti wuno.” Saulo yaboolera Daudi ati: “Mani chia, Omwaani abe naawe.”

³⁸ Saulo mani naaberesa Daudi ebyohulwaaniramo byae ati yefwaale: ekofia y'esibya sy'omugasa, yi yafwaasa omutwe kwa Daudi, neende ekooti ly'esibya lyosi.

³⁹ Daudi yasobolayo olugaanga lwa Saulo niyefwaalire ebilwaaniso by'esibya bya Saulo mani nateema ohukeenda nabyo, nae byaamuhaya ohukeenda olwohuba haba siyali niyanala ohubyefwaala daawe. Daudi yaboolera Saulo ati, “Haba sinyala ohulwaana nindefwaalire ebiindu bino. Haba sindabinala daawe.” Mani naabyeefwaalula byoosi pe.

⁴⁰ Yabukula endawusi yae y'omwaayi mani n'adoola amakina kataanu amanyirifu ohutula mu mwoombe kw'omwaalo mani naakata mu sao yae. Yatekeha esimulo yae, mani n'achia ohubukaanana neende Goliati.

Daudi ayiingira Goliati

⁴¹ Omufilisiti oyo yachaaka ohukeenda naasuda eyiri Daudi, omukiingi w'engabo yae naamweemereeremo. Yemeeda ohusuda aambi bweene neende Daudi,

⁴² mani niyabona Daudi bulai, yamulekeeresa, olwohuba yali sa ahasyaani hayere ah'esiiso silai.

⁴³ Omufilisiti oyo naateeba Daudi ati, “Endawusi eyo y'ohuhola siina syeene? Obaasa oti ndi embwa hu wiiche yi ndi neende endawusi?” Omufilisiti oyo naachaaka ohubwaaba niyeechubira banasaae bae.

⁴⁴ Yehudumbasira hu Daudi n'aboola ati: “Suda yi ndi, omulaambo kwao njia ohukuberesa amayoni neende esolo bi kulye.”

⁴⁵ Daudi yakobola Omufilisiti oyo ati, “Wiicha yi ndi n'oli neende olugaanga, efumo, neende amahaango, nae ese njicha y'oli mu liita ly'Omwaami w'Obunyala bwoosi, Nasaae w'amaye ka Yisiraeli, k'olekeeresa.

⁴⁶ Nyaanga yino Omwaami achia ohuhuta mu bunyala bwaange; mani njia ohuhuyiingira haandi hutemeho omutwe. Haandi enyaanga yino, njia ohuberesa amayoni neende ebisolo birye emilaambo ky'ab'eye ly'Abafilisiti. Mani ao niwo yi syaalo syoosi sichia ohumanyira siti mu Yisiraeli mulimo Nasaae.

⁴⁷ Haandi buli muundu yeesi oli ano achia ohubona ati Omwaami haba s'awonia abaandu bae niyehoonyera engaanga oba amafumo. Omwaami niye oyiingira mu buli biita, mani achia ohubata eng'we mweesi mu bunyala bweefwe.”

⁴⁸ Goliati haandi naachaaka ohukeenda naachoomere Daudi, mani Daudi niyeeruha bwaangu naachoomere abuundu yi Abafilisiti bali nibeetekeehe ohulwaanira, n'achia ohumulwaania.

⁴⁹ Daudi niyeengisa omuhono mu sikiingiro syae, naatusamo ekina, naalita mu simulo, mani naayisimula naaliingire Goliati. Ekina elyo lyahuya Omufilisiti oyo hu bweeni lyaasasaakula esyaanganga syae, mani Goliati naakwa aasi mafumaame.

⁵⁰ Ao mani Daudi naatehoonyeere olugaanga, yayiingira haandi yeeta Goliati niyehoonyera esimulo neende ekina sa!

⁵¹ Daudi yeemao yeeruha yaachia yeema hu Mufilisiti, yaasobolayo olugaanga lwa Goliati mu silaalo syalwo, mani naamutemaho omutwe kwae naamwiitira elalira. Abafilisiti nibabona bati omuundu waabwe w'amaani afwiire, beeruha bawaao.

⁵² Abasaacha ba Yisiraeli neende aba Buyudaaya basiingira baayokera, mani niboonga hu Abafilisiti ohwoolera elalira Gaati neende hu biruwa bya Ekironi. Abafilisiti bafumitwa mu biita ebyo, nibakwa hu ngira yichia Saraimu, ohwoolera elalira Gaati neende Ekironi.

⁵³ Abaisiraeli nibakobola nibatula ohwoonga hu Abafilisiti, bayaaya ebiindu mu ekaambi y'Abafilisiti abo.

⁵⁴ Daudi yabukula omutwe kwa Goliati mani naakuyira Yerusalemu, nae naabiiha ebilwaaniso bya Goliati mu yeema lyae lyeene.

Daudi ayirwa eyiri Saulo

⁵⁵ Saulo niyabona Daudi n'achia ohulwaana neende Goliati, yateeba Abbuneeri, omuhoongo w'eye lyae ati, “Abbuneeri, omwaana wuno, mwaana wa naanu?” Abbuneeri yamukobolamo ati, “Haba siimanyireho daawe, Ewe Ow'oluyaali.”

⁵⁶ Saulo yalagira ati, “Chia mani oteeberese.”

⁵⁷ Daudi mani niyakobola mu kaambi n'amalire ohwiita Goliati, Abbuneeri yamuyira eyiri Saulo. Daudi yali naasikiingire omutwe kwa Goliati.

⁵⁸ Saulo yamuteeba ati, “Omuraaga ewe, oli omwaana wa naanu?” Daudi yakobolamo ati, “Ndi omwaana wa Yese omuhalaabani wao, ohutula Bbetilehemu.”