1 Samueli 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiita hu Abafilisiti

¹ Saulo naachaaka ohutuka, yali neende emyaaka … eky'obuhuluundu. Yatuka Yisiraeli hulw'embaka y'emyaaka kibiri.

² Saulo yadoolamo abasaacha elifu chidatu (3,000). Hu abo, yabechaanga neende abasaacha elifu chibiri (2,000) abuundu mbwe Mikimasi neende mu syaalo sy'ebigulu sya Bbeteli. Abasaacha elifu ndala (1,000) babechaanga neende omwaana wae Yonatani Gibbeya mu situundu sy'enono ya Bbenjamini. Abasaacha badoong'ereo boosi, Saulo yabaseebula muli muundu akoboleyo engo wae.

³ Yonatani yeeta omuhoongo w'eye ly'Abafilisiti mu Gebba, mani Abafilisiti boosi nibasiwulira. Ao Saulo n'atuma bawamwaanda ohuchia ohulaanga Abaibburania beeche balwaane ebiita niyoobba eturumbete mu syaalo syoosi koti lu syaali nisyaaka.

⁴ Baboolera Abaisiraeli boosi bati Saulo yali niyeetere omuhoongo w'eye ly'Abafilisiti, haandi bati Abafilisiti bali nibabasyuulire. Mani abaandu nibalaangwa beyambaanisira hu Saulo abuundu mbwe Giligaali.

⁵ Abafilisiti bebuusa alala ohulwaania Abaisiraeli. Bali neende ebigaari by'ebiita elifu amahumi kadatu (30,000), abeerusi b'efaraasi elifu chisaasaba (6,000), neende ab'amaye baangi muno koti omusenyi kwohu lwaasi lw'enyaanja. Bachia Mikimasi, esiri ebukwe wa Bbetafeeni, mani niboombahayo ekaambi.

⁶ Abaisiraeli, haandi eye babona bati bali mu bidinyu olwohuba eye ly'amaani libaseetere. Abaisiraeli baandi beekisa mu ng'uungu neende mu meena, mu nyaanda oba mu meena neende mu bisima by'amaachi.

⁷ Abaandi baambuha Omwaalo kwa Yorodaani mani nibeengira mu syaalo sya Gaadi neende Gileadi. Saulo yali n'asisiiri Giligaali, abaandu bali nae bakwaamo oluteengo mani nibahinaakirira.

⁸ Yamala endaalo chitaanu-na-chibiri naaliindire Samueli, koti lu Samueli yali n'amukerakiire ohuhola, nae Samueli yali n'asisiiri ohwiicha Giligaali. Abaandu mani nibachaaka ohutula hu Saulo.

⁹ Mani Saulo naababoolera ati, “Mundeetere ebiyaanwa bisaambe neende ebiyaanwa by'ohusaasania.” Saulo mani n'ayaanayo esiyaanwa sisaambwa.

¹⁰ Yali hu yahamala ohuyaanayo esiyaanwa sisaambwa sa ati, Samueli niyoola. Ao Saulo naatulayo ohubukaanira neende ohumusangaalira.

¹¹ Samueli yaboola ati, “Oholere siina?” Saulo naakobolamo ati, “Mbweene abaandu nibasalaana nibaandulaho, haandi ewe siwichiire mu ndaalo chi waboola ohwiichiramo. Ohumeeda hu esyo, Abafilisiti babeere beebuusiire Mikimasi.

¹² Sakira mbaasire endi, ‘Abafilisiti bachia ohwiihirira baaseete ano Giligaali, haandi mbeere nisisiiri ohwekongooya Omwaami ohungwiira esisa.’ Sakira biinjiikire ohuyaanayo esiyaanwa sisaambwa.”

¹³ Samueli yakobolamo ati, “Oholere esiindu sy'obusiru. Haba s'odiirire esilagiro sy'Omwaami Nasaae wao syahubeere daawe. Oba n'osidiirire, Omwaami yahalehere ewe neende abeechuhulu bae ohutuka Yisiraeli endaalo choosi pe.

¹⁴ Nae bulaanu, obwaami bwao haba sibuchia hwemeeda daawe. Olwohuba ewe ohayire ohumuwulira, Omwaami achia ohwekoonyera omuundu wuundi y'asiimire, amuhole omutuki w'abaandu bae.”

¹⁵ Samueli mani naatula Giligaali niyeweerao. Abaandu badoong'ereo boosi baloonda hu Saulo n'achia ohweyambaania hu b'amaye bae. Batula Giligaali mani nibachia Gibbeya mu situundu sya Bbenjamini. Saulo yabala ab'amaye kae, abali aambi w'abasaacha emia chisaasaba (600).

¹⁶ Saulo neende omwaana wae Yonatani, neende abasaacha bali alala nabo, nibadoong'a mu kaambi abuundu mbwe Gebba mu situundu sya Bbenjamini; nae Abafilisiti niboombaha ekaambi yaabwe Mikimasi.

¹⁷ Abacha ohunyaka mani nibatula mu kaambi y'Abafilisiti nibali mu mikaanda kidatu: Omukaanda mulala kwachiira Ofira mu situundu sya Suali,

¹⁸ omukaanda kuundi kwachiira Bbeeti Horooni, nae okuundi nikuchiira hu lwaaho lulingaalire Ehooho lya Sebboimu neende sichiimi.

¹⁹ Mu syaalo sya Yisiraeli syoosi haba simwalimo abetaanyi daawe, olwohuba Abafilisiti bali nibakayira Abaibburania ohwitaanya engaanga neende amafumo.

²⁰ (Abaisiraeli bachichaanga eyiri Abafilisiti ohwaakala ebiindu byaabwe bino: embako ch'endaawu, embako, eyaywa, neende engeso.

²¹ Obukusi bwalichiingi ehela ndala ohwaakala eyaywa neende ohuhwiihira, nae ehela chibiri ohwaakala embako neende ohwaakala embako ch'endaawu.)

²² Mani hu ludaalo lw'ebiita, yibulao Omuisiraeli kata mulala hu basaacha bali neende Saulo neende omwaana wae Yonatani owali neende olugaanga oba efumo, ohutusaho Saulo neende Yonatani.

²³ Abafilisiti abali mu kaambi batuma omukaanda kw'ab'amaye ohuchia ohuliinda owohwiingirira noochia Mikimasi.