1 Samueli 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Samueli alomaloma eyiri abaandu

¹ Ao Samueli naaboolera Abaisiraeli ati, “Holere ebiindu byoosi bi mumboolere ohuhola. Mbabereese omutuki onabatukeenge.

² Mani bulaanu muli nae abeemirireenge. Nae ese, mbano ngofuule, ndimo embuchi, haandi abaana baange basyaani bali naang'we. Mbereenge omwimirisi weeng'we ohutula mu buraaga bwaange ohwoola buti.

³ Mbano ndi ano. Nikali mbwe ndaholaho esiindu syoosi esitahoyera, mu mbabire bulaanu buti mu moni w'Omwaami, neende mu moni w'omutuki yi y'adoolere. Wiina mweene yi ndanyakaho eng'oombe yae? Oba wiina mweene yi ndanyakaho esuhiri yae? Oba wiina mweene yi ndeebaho? Wiina mweene yi ndafwiinyiriraho? Ni siruwo esiindu hu bino si ndahola, njia ohubakoboserao.”

⁴ Abaandu bakobolamo bati, “Bbe, ewe haba siwatwibaho daawe, haba si wanyuulaho omuundu yesi esiindu syoosi daawe.”

⁵ Samueli yakobolamo ati, “Omwaami neende omutuki y'adoolere nibo abaloli baange enyaanga yino bati mbulaho elalira omusaango kwoosi.” Nabo nibakobolamo bati, “Eee, Omwaami niye omuloli weefwe fwesi.”

⁶ Samueli yemeeda ohuboola ati, “Omwaami niye owadoola Musa neende Arooni, haandi niye owatusa bakuuka yeeng'we ohutula mu syaalo sy'e Misiri.

⁷ Bulaanu, mani mweeme yi muli, mani njia ohubaabira mu moni w'Omwaami niimbeechulisa ebiholwa by'amaani byoosi bi Omwaami yahola ohubawonia alala neende bakuuka yeeng'we.

⁸ Yakobbo neende edaala lyae nibachia Misiri, mani Abamisiri babafwiinyirira; bakuuka yeeng'we balirira Omwaami ohubahoonya, mani n'atuma Musa neende Arooni, ababatusa Misiri babeehasa mu syaalo sino.

⁹ Nae abaandu beebirira Omwaami Nasaae waabwe, mani Nasaae naaleha Abafilisiti neende abatuki b'Abamoabbu neende Sisera, omuhoongo w'eye ly'esiko sya Hasoori, ohulwaania bakuuka yeeng'we, mani nibabayiingira.

¹⁰ Balirira Omwaami abahoonye nibaboola bati, ‘Hwonoona, olwohuba hwakaluuhana hwaahutulaho, ewe Omwaami, mani nihwiinamira ebiloongaloongwe bya Bbaali neende Asitarooti. Tununule otutuse hu basuku beefwe, mani huchia ohuhwiinamiraanga!’

¹¹ Mani Omwaami n'atuma Gidioni, Bbaraka, Yefuta, neende ese owamalirihayo. Buli mulala hweefwe, yabanunula ohubatusa hu basuku beeng'we, mani nimumenya mu muleembe.

¹² Nae nimwabona muti Omutuki Nahasi wa Abaamooni yali aambi ohubaseeta, mwebwaaba Omwaami ohubeechaanga omutuki weeng'we mani nimumboolera muti, ‘Hudaha omutuki ohututuka.’

¹³ “Mani bulaanu, omutuki yi mudoolere nguno. Mwamusaba haandi nguno Omwaami abamubereese.

¹⁴ Nimuneseenge mu Omwaami oluyaali, mani mwamuhalabaanira, mwamuwulira, haandi mwadiira ebilagiro byae, haandi eng'we neende omutuki weeng'we nimuloonda Omwaami Nasaae weeng'we, buli siinda si munaaholeenge sinabachireenge bulai.

¹⁵ Nae nimuhaya ohuwulira Omwaami, mani mwaahaya ohudiira amalako kae, Omwaami achia ohubalwaania, eng'we neende omutuki weeng'we.

¹⁶ Mani mweeme yi muli, muchia ohubona ebiindu bihunuufu bi Omwaami achia ohuhola.

¹⁷ Esiha sino sy'esiminyu nisyo, kose? Nae njia ohusaba Omwaami aleete ohwaduluhana, haandi akwiise efula. Bino nibikwaao, ao niwo yi muchia ohumanyira muti mwonoona muno mu moni w'Omwaami nimwamusaba ababe omutuki.”

¹⁸ Ao mani Samueli naasaba Omwaami. Omwaami mani naaleeta ohwaaduluhana, haandi naakwiisa efula. Mani abaandu boosi nibatya muno Omwaami neende Samueli,

¹⁹ mani nibaboolera Samueli bati, “N'okanya, ewe omuhuluundu, tusabire eyiri Omwaami Nasaae wao, huhaye ohufwa. Bulaanu humanyire huti hu bibi byeefwe biindi byoosi, hwameedaho sino, esy'ohwesabira omutuki.”

²⁰ Samueli yakobolamo ati, “Mutatya daawe. Muholere esiindu sibi syakiire ao sityo, nae mutakaluuhana mani mwaleha ohuloondaanga Omwaami, nae mumuhalaabanireenge neende emyooyo kyeeng'we kyoosi.

²¹ Mutaloonderaanga banasaae batali abadyeeri; haba sibanyala ohubahoonyaho kata nabudiidi oba baabawonia daawe, olwohuba haba sibali abadyeeri daawe.

²² Omwaami aholere esisuubise simaliirifu sino, haba saachia ohubajwaang'a daawe, olwohuba ohuheengao ohubahola mube abaandu bae beene.

²³ Nae ese hulwaange, Omwaami ahoya yaahaya ohukanya, ndonoona mu moni wae, ninjakamira ano ohubasabiraanga. Nae njia ohubeekesaanga esilai haandi esihoyeera eng'we ohuhola.

²⁴ Yiseenge oluyaali mu Omwaami, haandi mumuhalaabaniraanga koti lu bihoyera neende emyooyo kyeeng'we kyoosi. Yichuliseenge ebiindu bihunuufu bi yabaholera.

²⁵ Nae nimwemeeda ohwonoona, eng'we neende omutuki weeng'we, muchia ohusihiriswa.”