1 Petero 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebyaayo bya Nasaae

¹ Bulaanu koti ese syeesi ndi omwaayi muhuluundu w'omukaanda kw'abafukiiriri, haandi koti omuundu owabona ohusaanda hu Kristo yali nahwo, haandi koti omuundu yeesi ochia ohukabana hu luyaali luchia ohuboneha, hubbira omulaanga eyiri abeemeresi b'emikaanda ch'abafukiiriri abali mweeng'we.

² Mube abaayi b'ebyaayo bi Nasaae yababeresa, haandi mubiliinde neende ohudaha koti lu Nasaae adaha muhole ataali ohuyiikwa. Hole emirimo kyeeng'we ataali ohwekoomba eseende, nae ohweema hu hudaha ohuhalaabanira abasyeeng'we mubwadyeeri.

³ Mutatukaanga abaandu babata mu buliindi bweeng'we neende esirifu, nae mubecheenge esyohuboneraho eyiri ebyaayo.

⁴ Mani Omwaayi muhuluundu niyahabonehe muchia ohunyoola ekofia y'obutuki y'oluyaali eyitafwiirira.

⁵ Mu ngeri nasilala eng'we abasisiiri abaraaga, muhoyere ohuwulira abahuluundu beeng'we neende obuloonga. Haandi mweesi-mweesi koti engubo yeeng'we muhoyere ohwefwaala obuloonga bw'ohuhalaabanira abasyeeng'we; olwohuba ebyandiiko byoolerefu biboola biti, “Nasaae alwaaniaanga abeniinia, nae aberesaanga abaloonga embabaasi chae.”

⁶ Sakira mube abaloonga mu mahono ka Nasaae w'obunyala hwaanyale ohubasiingisa yabaniinia aakulu mu siha syae sihoyere.

⁷ Yireenge ohwelalihirira hweeng'we hwoosi eyiri Nasaae olwohuba abadeebaho.

⁸ Mweliinde, mube meeso! Olwohuba omusuku weeng'we Sitaani ang'aalalaanga nabuluula koti edalang'i n'akoonya oyo yanalya.

⁹ Mumuyiinganie nimuli abomiifu mu fukiirira, olwohuba abafukiiriri basyeeng'we baandi abali mu syaalo syoosi bosi bali ohubitira mu husaanda nasilala ohwo.

¹⁰ Nae nimumalire ohusaandaho budiidi, Nasaae ow'embabaasi choosi, owabalaanga ati mukabaneho hu luyaali lw'endaalo choosi mu Kristo, niye ochia ohubaberesa amaani mube abomiifu mu fukiirira.

¹¹ Obunyala bwoosi bube obwae, endaalo choosi. Amiina.

Amaheeso kamaliiriha

¹² Mbaandiikira ebbarwa nyimbikiti yino, neende obuhoonyi bwa Silifaano, yi njira koti mwaanaama mweesikwa. Ndaha ohubameedamo amaani neende ohuboomiisira endi buno n'embabaasi cha Nasaae cheene. Haandi mbalagira endi mubwoomiiriremo.

¹³ Omukaanda kw'abafukiiriri basyeeng'we bali mu Bbabbilooni, ba Nasaae yesi yadoola, babaheesa. Neende Mariko omwaana waange yesi abaheesa.

¹⁴ Muheesanie nimukwiichana mu birifu neende obuheeri koti Abakristo. Lehe omuleembe kube naang'we mweesi, abaandu ba Kristo.