1 Petero 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abahasi neende abasaacha

¹ Mu ngeri nasilala, eng'we abahasi badeeha muwulireenge abasaacha beeng'we, hu mani nibalimo mwaabo abatafukiirira emboosi ya Nasaae, ebiima bilai by'abahasi baabwe binyale ohubahola babe abafukiiriri.

² Olwohuba bachia ohubona ebiima byaabwe koti lu biri ebinyirifu haandi ebiisamo oluyaali.

³ Obulai bweeng'we buhaye ohuba obweema hu biindu byoohumukulu koti, engeri yi mwesuukiramo efwiiri, oba emigasa ky'engaanga y'aakulu kimwesyaaya, oba engubo ch'engaanga y'aakulu chi mwefwaala.

⁴ Ohutusaho obulai bweeng'we buhoyere ohutulanga mubwadyeeri buli mu myooyo kyeeng'we, obulai butasasiha bw'omwooyo muloonga, haandi omuyenjeefu, okuli neende engaanga y'aakulu muno mu moni wa Nasaae.

⁵ Olwohuba yino niyo engira yi bahasi boolerefu, abeesikaanga Nasaae mu ndaalo chabita baholaanga hu bulamu bwaabwe bwaaba obulai, haandi bawuliraanga abasaacha baabwe.

⁶ Olwo nilwo koti lu Saara yawulira Abburahamu mani yamulaanga ati omwaami. Haandi muli abaana bae nimuhola ebiluungifu nimutaali neende ohutya esiindu syoosi.

⁷ Mu ngeri nasilala eyo yosi, abasaacha muyireenge abahasi beeng'we bulai, nimumanyire muti mu huloongwa hwaabwe bakata nibo. Haandi koti abaandu bachia ohunyoola alala naang'we esiyaanwa sya Nasaae sy'obulamu. Holeenge mutyo hu ahaye ohubaao esiindu syoosi esyehiinga mu hulaama hweeng'we.

Ohusaandisibwa hulw'ohuhola esiindu silai

⁸ Muhumaliirisa, eng'we mweesi, becheenge neende omwooyo mulala, kwiireenge abasyeeng'we esisa, haandi heeraneenge koti abeenda ndala. Deebeenge hu basyeeng'we, haandi becheenge abaloonga eyiri abasyeeng'we.

⁹ Mutatuungaanga esibi neende esibi, oba ohubwaaba neende ohubwaaba; ohutusaho, tuungeenge neende ehabi choong'ene olwohuba ehabi nicho chi Nasaae yasuubisa ohubaberesa niyali n'abalaanga.

¹⁰ Olwohuba koti lu byandiiko byoolerefu biboola, “Omuundu wekoomba ohunyoola obulamu haandi ohubona omuleembe, alehe ohulomaloma ebibi neende olulimi lwae haandi alehe obubacha.

¹¹ Ahoyere ohulehana neende ebibi mani ahole ebilai; ahoyere ohukoonya omuleembe neende omwooyo kwae kwoosi.

¹² Olwohuba Omwaami aliindanga abaluungifu haandi atekeeresa ohulaama hwaabwe. Nae ayiinganianga abo abahola ebibi.”

¹³ Nae wiina ochia ohutaaho esibi nimweetekeehe ohuhola ebilai?

¹⁴ Kata neende nimusaandisibwa hulw'ohuhola esilai, muchia ohunyoola ehabi. Mutatya omuundu yeesi oba mwelalihirira.

¹⁵ Nae mu myooyo kyeeng'we, mwiseenge oluyaali mu Kristo koti Omwaami. Esiha syoosi becheenge abeetekefu ohukobola mu muundu obalaanga ohulomaloma hu suubi limuli nalyo.

¹⁶ Nae muholeenge mutyo neende obuloonga nimubeesamo oluyaali, haandi lindeenge ebibaaso by'emyooyo kyeeng'we bulai. Haandi abaandu nibalomaloma bubi hu saambo ndai chi muli nachio mu Kristo, lehe banyoole esoni hu biindu bi balomaloma.

¹⁷ Olwohuba silai ohusaanda hulw'ohuhola esiindu silai nihuba huli ohudaha hwa Nasaae, ohuhira ohusaanda hulw'ohuhola esiindu sibi.

¹⁸ Olwohuba Kristo yafwa hulw'ebibi ehabi lala lyoong'ene, omuundu mulai yafwiira ababi, hwaanyale ohubaleeta eyiri Nasaae. Yeetwa mu mubiri, nae abweene ao yaabereswa obulamu mu mwooyo.

¹⁹ Nae mu bulamu bw'omwooyo obwo, yacha mani yayaala alafu eyiri emyooyo kyaboywa.

²⁰ Kino kyali emyooyo ky'abaandu bali bahaya ohuwulira Nasaae niyateemaho ohubaliinda niyesimiriise mu ndaalo chi Nowa yoombahiramo elyaato. Abaandu badiidi boong'ene nibo abali mu lyaato; bali bataanu-na-badatu boong'ene abawonia mu maachi.

²¹ Haandi amaachi ako kali ahalolero aheekesa ohubatiisibwa ohubawoniaanga bulaanu. Haba sihuli ohwoosa hw'erwaanyi hw'ehwe lyohumubiri, nae nihwo esisuubise si huhola eyiri Nasaae mu mwooyo mulai. Huno huhuwonia ohubitira mu husyuuha hwa Kristo Yesu,

²² owamala ohuchia Muukulu, haandi bulaanu ali hu muhono muluungi kwa Nasaae, haandi bulaanu atuka bamalaika boosi neende abaandu boosi neende obutuki bwoosi.