1 Petero 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ekina lamu neende esyaalo syoolerefu

¹ Sakira mwemalemo ehiinda yoosi, ohuchuunia abasyeeng'we, obubacha bwoosi, oba, ehiinda yoosi, neende obumoonyi bwoosi.

² Mube koti abaana bayere baheebulwa sa, abawulira obuluwo bw'amabeere moolerefu k'omwooyo, mani nimukang'wa muchia ohuhula munyoole obuwonia.

³ Olwohuba ebyandiiko byoolerefu biboola biti, “Mumalire ohuhoombaho hu sisa sy'Omwaami.”

⁴ Mwiiche eyiri Omwaami, ekina elamu li baandu bahaya bati libulamo obuhoonyi, nae Nasaae yaalidoola koti eliri neende obuhoonyi yali.

⁵ Olwohuba mwesi muli amakina malamu akoombahirwa Enyuumba ya Nasaae y'omwooyo, yi muchia ohuhalaabanira koti abalaamisi boolerefu, nimuwaana ebiyaanwa by'omwooyo bi Nasaae yakaanira ohubitira mu Yesu Kristo.

⁶ Olwohuba ebyandiiko byoolerefu biboola biti, “Bone, mbao bulaanu ndaao ekina lisiira enyuumba mu Siyooni, ekina lyalobolwa haandi ely'engaanga y'aakulu; haandi omuundu yeesi omufukiirira haba saachia hudiirwa esoni.”

⁷ Ekina lino ly'engaanga y'akulu muno eyiri eng'we abafukiiririra; nae eyiri abo abatafukiirira liri: “Ekina li boombahi bahaya bati liwuma obuhoonyi nilyo elyeeholere ekina huluundu lisiira enyuumba.”

⁸ Haandi biti, “Lino nilyo ekina likera abaandu nibateremuha, ekina likera nibakwa”. Bateremuha olwohuba haba sibafukiirira emboosi yira koti lu syatekehwa siti b'ohuhola batyo.

⁹ Nae eng'we muli abaandu badoolebwa, abalaamisi, enyuumba njolerefu, abaandu ba Nasaae beene, hu munyale ohufumia emirimo kya Nasaae kiwukisa, ba Nasaae yalaanga ohutula mu siirima ohwiingira mu bulafu bwae bulai butalomwalomwaho.

¹⁰ Mu biha byaahale, haba simwali abaandu badoolebwa, nae bulaanu muli abaandu ba Nasaae; mu biha byaahale haba simwaakaanira esisa sya Nasaae nae bulaanu mwanyoola esisa sya Nasaae.

Abawaambe ba Nasaae

¹¹ Eng'we basyaange, mbahubbira omulaanga bawalukeenda haandi abeyikami mu syaalo muno endi, mweyolobye obwekoombi bubi bw'omubiri obulwaania obulamu bweeng'we buli ludaalo.

¹² Ebiima byeeng'we eyiri abakafiiri bihoyere ohuba ebilai, kata neende nibateemaho ohubayaasa bati muli abahola-mbi, bachia ohubona ebiholwa byeeng'we bilai, mani bafumie Nasaae hu Ludaalo lw'ohwiicha hwae.

¹³ Hulw'obulai bw'Omwaami, wulirenge abeemeresi boosi abohu syaalo: kata abe omutuki muhunuufu otuka abaandu baandi boosi,

¹⁴ kata neende gafana, bayatuma ohusaandya abahola-mbi neende ohweebasa abaholi b'ebiindu bilai.

¹⁵ Olwohuba Nasaae adaha ati, ebiholwa byeeng'we bilai bibwiihe hu nomanoma mbi ey'abaandu basiru.

¹⁶ Obulamu bweeng'we buhoyere ohuba koti obw'abaandu bali neende omuleembe, nae mutehoonyera obulehuule bweeng'we ohubwiiha hu esibi syoosi, ohutusaho obulamu bweeng'we bube koti obw'abahalaabani ba Nasaae.

¹⁷ Yiseenge oluyaali mu baandu boosi: heereenge abafukiiriri basyeeng'we, ticheenge Nasaae, haandi yiseenge oluyaali mu batuki omutuki muhunuufu.

Esyohuboneraho syohusaanda hwa Kristo

¹⁸ Eng'we abahalaabani, wulireenge abaami beeng'we haandi yekeseenge oluyaali lwiichufu eyitaali abo ababaholera ebilai haandi babaasaho boong'ene, nae kata eyiri abaalaba bosi.

¹⁹ Olwohuba aliwo obuhoonyi eyiri omuundu wesimiirisira obuchuuni bw'ohusaanda olwohuba akalusa ebibaaso byae eyiri Nasaae.

²⁰ Nae ngaanga siina yi munyoola nimweesimiirisira ohuhuywa hubahoyera nimuholere esibi? Ohutusaho nimweesimiirisira ohusaanda kata nimumalire ohuhola ebiindu bilai, ao nilwo lu Nasaae aba achia ohubaberesa ehabi.

²¹ Nasaae yabalaangira sino, olwohuba Kristo yesi yabasaandira mani yaabalehera esyohuboneraho, ati munyale ohuloonda mu makulu kae.

²² Ebyandiiko byoolerefu biboola biti, “Haba siyaholaho esyonoono syoosi, haandi abulao obubacha bwatulaho muhanwa mwae.”

²³ Nibamunyeka, siyakalusamo yesi naanyeka; niyasaandisibwa, haba siyatiisa-tiisaho omuundu yeesi, ohutusaho yata esuubi lyae mu Nasaae, oheenga emisaango mu buluungifu.

²⁴ Omweene yakiinga ebyonoono byeefwe mu mubiri kwae hu musalabba, hu hunyale ohuba abafwa eyiri esyonoono, nae hube abalamu eyiri obuluungifu. Ohweema hu bikoonjo byae mwanyoola ohuwonisibwa.

²⁵ Olwohuba mwali nimuli koti amakoondi kakota, nae bulaanu mwakaluha eyiri Omwaayi haandi Omuliindi w'obulamu bweeng'we.