1 Petero 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ese Petero omutume wa Yesu Kristo. Nyandiikira eng'we abalobole ba Nasaae bulaanu abali mu Poto Galatia, Kapadokia, Asia, neende Bbitinia, yi mweruha mwasasaanira.

² Mwadoolwa neende esichiiririrwa si Nasaae Seefwe mweene yamanyira elalira ati, Mwooyo Mwoolerefu abahole mube aboolerefu, hu munyale ohuwulira Yesu Kristo mani aboose neende amabaanga kae. Lehe embabaasi neende omuleembe bibe ebyeeng'we mu bwiichufu.

Esuubi elamu

³ Lehe hweebase Nasaae haandi Laatang'ene Omwaami weefwe, Yesu Kristo. Ohweema hu sisa syae sibitiirifu, yakera hwebulwa mu bulamu buyaaha, niyasyuuhisa Yesu Kristo ohutula mu bafu. Mani yaatuberesa esuubi lamu mu myooyo kyeefwe,

⁴ ely'ohunyoola ebilai bitaakama, bi Nasaae yabiihira abaandu bae. Yababiihira Muukulu, yi bitanyala hubola, oba ohunyaasiha oba ohufwiiririra.

⁵ Hulw'ohufukiirira hweeng'we Nasaae abaliinda neende obunyala bwae, haandi achia ohubawonia hu ludaalo lw'enjakamo, lu yatekeha ohubaonisiryaho.

⁶ Sangaale hulw'emboosi yino, kata neende mu siha sino mumalire ohunyoola ohusaandisibwaho neende ohwelalihiriraho ebiha bidiidi hulw'ebiteemo biingi ebyabakwaaho.

⁷ Ohusaandisibwa huno hweecha neende esichiiririrwa esy'ohuteema efukiirira yeeng'we. Kata esaabbu yinyaasiha yosi yiteemwa neende omuliro. Sakira efukiirira yeeng'we eyiri neende engaanga nyiingi ohuhira esaabbu, yosi yihoyere ohuteemwa, huyinyale ohubonehana niyiri enyomiifu yadyeeri. Ao mani niwo yi Nasaae achia ohubafumia neende ohubaberesa oluyaali neende esitiibwa hu Ludaalo lu Yesu Kristo yaheyekesereho alafu.

⁸ Yesu oyo mwamuheera kata neende nimusisiiri ohumubonaho; mumufukiirira, kata neende amwahaba nimutaamubona bulaanu. Mani ndi neende esangaalo liingi litaboolehana,

⁹ olwohuba bulaanu munyoola ohuwonisibwa hw'obulamu bweeng'we ohutula mu humufukiiriramo.

¹⁰ Ohuwonisibwa huno nihwo hu banabbi balomalomaho nibeekesa embabaasi chi Nasaae yali achia ohubaberesa, nibamalire ohukoonyeresa neende ohuteeberesa bulai muno.

¹¹ Bakoonyeresa muno nibadaha ohumanya liina bweene lu Ludaalo luno lwahoolereho, haandi koti lu lwaheechere. Olwohuba Mwooyo wa Kristo obalimo yali yeekesa ohusaanda hu Kristo yali achia ohugumira, neende oluyaali lwahatulemo.

¹² Nasaae yeekesa abanabbi bano ati haba sibehalaabanira abeene, nae bahalaabanira eng'we nibalomaloma hu bwadyeeri bu muwulira bulaanu. Bawamwaanda b'Emboosi Ndai abalomaloma neende obunyala bwa Mwooyo Mwoolerefu owatumwa ohutula Muukulu, nibo ababeekesa obwadyeeri buno. Buno nibwo obwadyeeri bu bamalaika bosi badaha ohumanya amahuluundu kaabwo.

Abakristo balaangwa ohuba neende obulamu bwoolerefu

¹³ Sakira lehe ebibaaso byeeng'we bibe ebyeetekefu ohuhola. Mube mwaaywe, haandi mute esuubi lyeeng'we lyoosi hu mbabaasi chi muchia ohunyoola hu ludaalo lu Yesu Kristo achia ohweyekesera elalira.

¹⁴ Koti abaana bawulira Nasaae, mutafukiirira obwekoombi buhale bu mwali nimuli nabwo nimusisiiri ohumanya Nasaae otuka obulamu bweeng'we.

¹⁵ Ohutusaho, mube aboolerefu mu buli siindu syoosi si muhola, koti lu Nasaae yabalaanga mube aboolerefu.

¹⁶ Olwohuba ebyandiiko byoolerefu biboola biti, “Muhoyere ohuba aboolerefu, olwohuba syesi ndi omwoolerefu.”

¹⁷ Ngandi mulangaanga Nasaae muti Seefwe nimulaama, haandi niye oheengera omusaango buli baandu boosi mu ngeri nasilala. Sakira, mwehoonyere obulamu bweeng'we bwomu syaalo muno koti abakeni nimuberesa Nasaae oluyaali.

¹⁸ Olwohuba mumanyire esyatuungwa ohubanunula ohutula mu bulamu butaalimo obuhoonyi bu mwanyoola ohutula hu bakuuka yeeng'we. Haandi esiindu sibabakula esyo, haba sinisyo esiindu sinyaasiha sa koti esaabbu oba efeesa,

¹⁹ nae niko amabaanga ka Kristo akabanunula, niye oli koti ekoondi yeere elitaaliho obubi bwoosi, oba embala yoosi.

²⁰ Nasaae yamudoola esyaalo nisisisiiri ohuloongwa, haandi yeekeseebwe mu ndaalo chimaliiriha chino hulw'obulai bweeng'we.

²¹ Ohubitira mu Kristo, mufukiirira Nasaae wamusyuuhisa ohutula mu bafu, mani yaamuberesa oluyaali, haandi okera efukiirira yeeng'we neende esuubi lyeeng'we byaaba nibyomiirira hu Nasaae.

²² Nae koti bulaanu muli abanyirifu booswa hulw'ohuwulira obwadyeeri, haandi eng'we muli neende obuheeri bulamu eyiri abafukiiriri basyeeng'we, mani muheeranire elalira neende emyooyo kyeeng'we kyoosi.

²³ Olwohuba bulaanu mweebulwa ehabi lyohubiri, ataali ohweema hu lumwo lufwa, nae ohweema hu lumwo lutafwa, ohweema hu Mboosi ya Nasaae mulamu, haandi oyiindira endaalo choosi.

²⁴ Olwohuba ebyandiiko byoolerefu biboola biti, “Abaandu boosi bali koti obunyaasi, haandi oluyaali lwaabwe luli koti esimuli syomu siino. Obunyaasi buniaala, ebimuli bibuluunguha.

²⁵ Nae Emboosi y'Omwaami, yidoong'awo sa endaalo choosi.” Emboosi yino niyo Emboosi Ndai eyabayaalirwa.