1 Ebyomubiha 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abeechuhulu ba Yuda

¹ Bano nibo balala hu beechuhulu ba Yuda: Peresi, Hesirooni, karimi, Huuri neende Sobbali.

² Sobbali yeebula Reyaaya, Reyaaya yeebula Yahati, Yahati nae yeebula Ahumai neende Lahadi, bakuukaang'ene abaandu bali nibamenya mu Soora.

³ Etamu yeebula abaana basyaani badatu: Yesireeli, Yisima, neende Yidubbaasi. Etamu yali neende omwaana muhaana mulala, olaangwa eliita lya bamboocho yaabwe mbwe Haselelipooni.

⁴ Penueli niye owachaakisa esiko sya Gedoori, nae Eseri niye owachaakisa Huusa. Huuri omwaana waamberi wa Kalebbu, ng'ina niye Efuraati. Abeechuhulu bae nibo abachaakisa esiko sya Bbetilehemu.

⁵ Asuuri, owachaakisa esiko sya Tekoa, yali neende abahasi babiri, Hela neende Naara.

⁶ Naara yamwiibulira abaana basyaani bane: Ahusaamu, Hefeeri, Temeni, neende Hahasutaari.

⁷ Asuuri neende Hela beebula abaana basyaani badatu: Seereti, Yisuhaari, neende Etinaani.

⁸ Koosi niye laatang'ene Anubbi neende Sobbebba, haandi niye kukaang'ene enono chitula hu Aharuheeli omwaana wa Harumu.

⁹ Yaluwo omusaacha olaangwa mbwe Yabbesi olwohuba ng'ina yalumwa muno naamwiibula.

¹⁰ Nae Yabbesi yalaama muno eyiri Nasaae wa Yisiraeli ati, “Mberese ehabi, ewe Nasaae, mani wuumberese eloba liingi. Bechaanga naange haandi wuniinde esiindu sibi syoosi sihaye ohungwiisaho amachuuni.” Nasaae yamuwulira mani naamuberesa bi yamusaba.

Engalala chiindi ch'olwiibulo

¹¹ Kalebbu, owali mwanaang'ina Suha, yali neende omwaana musyaani mulala, Mehiri. Mehiri yeebula Esutooni, Esutooni

¹² yeebula abaana basyaani badatu: Bbeturaafa, Paseya, neende Tehina. Tehina niye owachaakisa esiko sya Nahasi. Abeechuhulu b'abasaacha bano bali nibamenya Reka.

¹³ Kenaasi yali neende abaana basyaani babiri: Otinieli neende Seraya. Otinieli yesi yali neende abaana basyaani babiri: Hataati neende Meonotai.

¹⁴ Meonotai niye laatang'ene Ofura. Seraya niye laatang'ene Yoabbu, owachaakisa Ehooho ly'Abetaanyi, olwohuba bali nibamenyamo bali abetaanyi b'amakesi muno.

¹⁵ Kalebbu omwaana wa Yefune yali neende abaana basyaani badatu: Yiru, Ela, neende Naamu. Ela niye laatang'ene Kenaasi.

¹⁶ Yehaleleeli yali neende abaana bane: Siifu, Siifa, Tiria, neende Asareeli.

¹⁷ Abaana basyaani ba Esira nibo: Yeteeri, Mereedi, Eferi, neende Yalooni. Meredi yadeehya Bbitia, omwaana w'omutuki wa Misiri, mani nibeebula omwaana muhaana mulala Miriamu, neende abaana babiri Samai neende Yisubba. Yisubba niye owachaakisa esiko sya Esitemoa.

¹⁸ Meredi haandi yali neende omuhasi otula mu Buyudaaya, mani niyeebula nae abaana basyaani badatu: Yereedi owachaakisa esiko sya Gedoori, Hebberi owachaakisa esiko sya Sooko, neende Yekutieli owachaakisa esiko sya Sanoa.

¹⁹ Hodia yadeehya mboochoong'ene Nahamu. Abeechuhulu baabwe nibo abachaakisa enono ya Garimu, eyamenyaanga mu siko sya Keila, neende enono ya Maakati, eyamenyaanga mu siko sya Esitemoa.

²⁰ Simoni yali neende abaana basyaani beene: Amunooni, Rina, Bbenihanani, neende Tilooni. Yisi yali neende abaana basyaani babiri: Soheti neende Bbenisoheti.

Abeechuhulu ba Sela

²¹ Sela yali mulala hu basyaani ba Yuda. Abeechuhulu bae nimwo omuli Eri, owachaakisa esiko sya Leka; Laada, owachaakisa esiko sya Maresa; eyali enono y'abanabi b'engubo ch'elaasi, abamenyaanga mu siko sya Bbeti Asibbea

²² Yokiimu neende abaandu bamenya mu siko sya Kosebba; neende Yoasi neende Sarafi, boombi badeehya abahasi bomu Moabbu mani nibamenya mu Bbetilehemu. (Emiduunga kino mihale muno)

²³ Bano balichiingi abaloongi b'endamu abahalaabaniraanga omutuki haandi bamenyaanga mu biko bya Netaimu neende Gedera.

Abeechuhulu ba Simeoni

²⁴ Simeoni yali neende abaana bataanu: Nemueli Yamini, Yaribbu, Seera, neende Sauli.

²⁵ Sauli yeebula Saluumu, Saluumu niyeebula Mibbisamu, Mibbisamu niyeebula Misima.

²⁶ Misima yeebula Hamueli, Hamueli niyeebula Sakuri, Sakuri niyeebula Simei.

²⁷ Simei yali neende abaana basyaani ehumi neende basaasaba haandi neende abaana bahaana basaasaba, nae abeeho bae haba sibeebula abaana baangi daawe. Nae enono ya Simeoni haba siyeengiya koti enono Yuda lu yeengiya daawe.

²⁸ Ohwoola mu biha by'Omutuki Daudi, abeechuhulu ba Simeoni bamenyaanga mu biko bino: Bberisebba, Molada, Hasarusuali,

²⁹ Bbiliha, Esemu, Tolaadi,

³⁰ Bbetueli, Horuma, Sikilaagi,

³¹ Bbeti Marukabboti, Hasarisusimu, Bbetibbiiri, neende Saraimu.

³² Haandi bamenya mu biko biindi bitaanu bino: Etamu, Ayini, Rimoni, Tokeni, neende Asani.

³³ Haandi bamenya neende mu ngoongo chiindi echali nichibebodoohaane, ohwoola emwaalo w'emumbo koti mu siko sya Bbalaati. Buno nibwo obwandiike bu babiha obudiira hu njibulo chaabwe haandi neende hu bituundu bi bamenyaangamo.

³⁴ Bano nibo abalichiingi abeemeresi b'enono chaabwe: Mesobbabbu, Yamuleeki, Yosa omwaana wa Amasia,

³⁵ Yoeli, Yehu (Yehu omwaana wa Yosibbia, Yosibba omwaana wa Seraya, Seraya omwaana wa Asieli),

³⁶ Elionai, Yakobba, Yesohaya, Asayia, Adieli, Yesimiyeli, Bbenaya,

³⁷ Siisa omwaana wa Siifi, haandi omwiichuhulu wa Alooni. Alooni yali omwaana wa Yedaya, haandi omwiichuhulu wa Simuri, Simuri yali omwaana wa Semaya.

³⁸ Bano abatumbuulwe ameeta kaabwe kano balichiingi abaami mu nono chaabwe, mani madaala kaabwe kemeeda ohwiingiya muno.

³⁹ Olwiibulo lwaabwe lweengiya mani nibasalaana nibachiira emuumbo, ohwoola aambi neende Geraari mani nibayiraanga amakoondi kaabwe hu lwaande lw'ebukwe lw'ehooho yi siko esyo syali.

⁴⁰ Banyoola ebyaayiro bulai neende eloba lai lirimo obunyaasi bukinu muno eyomu sipaapi sikwalaafu esyali esiyenjeefu haandi esibulamo obudinyu. Abaandu bali nibamenya omwo hale balichiingi Abahaami.

⁴¹ Mu biha by'Omutuki Hesekia owa Buyudaaya, abasaacha b'ameeta kali enyuma ako baachia Geraari mani nibasihirisa amayeema neende ebikaali eby'abaandu bali nibamenya eyo. Beerusamo abaandu bawaamo mani abeene nibamenyerayo elalira, olwohuba eyo yaliyo olwaayiro lw'amakoondi kaabwe luhoongo.

⁴² Abaandu baandi emia chitaanu (500) abomu nono ya Simeoni mani nibachiira ebukwe ohwoola Edomu. Beemirirwa neende abaana ba Yisi bano: Pelatia, Neria, Refaya, neende Wusieli.

⁴³ Nibamenyere eyo, beeta Abamaleki bali badoong'ereo, mani nibamenyayo ohwoola buti.