1 Ebyomubiha 29 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiyaanwa by'ohwoombaha Enyuumba ya Nasaae

¹ Omutuki Daudi yaboolera abali nibebuusire ao ati: “Omwaana waange Solomooni niye Nasaae yeedoolere, nae asisiiri omwaana muyere haandi abula obumanyirifu bumala daawe. Nae omulimo muhoongo muno, olwohuba lino haba si dooho ly'abaandu daawe, nae Nyuumba y'Omwaami Nasaae.

² Sakira ndeemereho koti lu nyala ohutekeha ebiindu byoosi eby'ohwoombahira Enyuumba ya Nasaae waange: esaabbu, efeesa, ebikomo, ebyuuma, embaao, amakina k'engaanga, amakina k'ohuchooraho, amakina k'ohwaala omusiingi, neende amakina kaandi ak'engaanga haandi akamilamilana amaangi muno ak'embia choosi.

³ Haandi ohumeedaho hu ebyo bi tekeheere Enyuumba Njolerefu, ndusire esaabbu neende efeesa ohutula hu myaandu kyaange kyeene, hulw'ohudaha hu ndi nahwo hu Nyuumba ya Nasaae.

⁴ Haandi ndusire etaani emia ndala neende ehumi-na-chitaanu (115) ech'esaabbu njwenufu ey'e Ofiri, etaani emia chibiri neende amahumi kasaasaba-na-chitaanu (265) ech'efeesa njweenufu, ey'ohusaata ebida by'Enyuumba ya Nasaae,

⁵ neende ohwitanyamo ebiindu byoosi eby'esaabbu neende eby'efeesa, Abetaanyi bi betaanya. Mani bulaanu, wiina wuundi owetusireyo omweene ohubaaho neende bi ayaanira Omwaami?”

⁶ Mani abeemirisi ba buli nono, abahoongo ba buli nono, abeemeresi b'amaye b'elifu-elifu neende ab'emia-emia, alala neende abaliindi b'emyaandu ky'obwaami nibeyaanayo ohutusaanga abeene nibeedahiire.

⁷ Olw'omulimo kw'ohwoombaha Enyuumba ya Nasaae, bayaana etaani emia ndala neende amahumi kataanu-na-kane (190) ech'esaabbu, etaani emia chidatu neende amahumi kataanu-na-kadatu (380) ech'efeesa, etaani emia chisaasaba neende amahumi kataanu-na-kabiri-na-chitaanu (675) ech'omugasa, etaani elifu chidatu neende emia chitaanu-na-chibiri neende amahumi kataanu (3,750) ech'ebichuma.

⁸ Abo boosi abalichiingi neende amakina k'engaanga y'aakulu, bosi bakayaanaanga mu sibiihiro sy'Enyuumba ya Nasaae, esyaliindwaanga neende Yehiyeeli omuleefi ow'enono Gerisoni.

⁹ Abaandu mani nibasangaala, olwohuba abeemirisi baabwe bayaanayo eyiri Omwaami neende omwooyo mulai, abeene nibeedahira. Omutuki Daudi yesi yasangaala muno.

Daudi afumia Nasaae

¹⁰ Ao Omutuki Daudi mani naakinia Omwaami mu moni w'abaandu bebuusire alala abo, n'aboola ati, “Ewe Omwaami Nasaae wa Yakobbo kuuka yeefwe, ofumisibwe endaalo choosi pe.

¹¹ Ewe Omwaami, niiwe omweene buhunuufu, obunyala, oluyaali, ohuyiingira, neende ohukinisibwa. Olwohuba ebyo byoosi ebiri muukulu neende hu syaalo byao nibyo. Ewe Omwaami, obutuki bwao nibwo, haandi niiwe ohulira ebiindu byoosi.

¹² Obuyiinda neende emyaandu byoosi bitula yooli. Niiwe ow'amaani haandi ow'obunyala; haandi niiwe oberesa abaandu boosi obuhunuufu neende amaani.

¹³ Mani bulaanu, ewe Nasaae weefwe, hu huubbira otyo muno, haandi hufumia eliita lyao ly'oluyaali.

¹⁴ “Nae ese alala neende abaandu baange, sibulao esiindu syoosi si hunyala ohuhuberesa, olwohuba buli siindu syoosi si huli nasyo, niiwe otuberesa, haandi ohutusa hu byao, nihwo huhutusire ohuhuyaanira.

¹⁵ Ewe Omwaami, omanyire oti, obulamu buno hububitamo bubita koti abakeni haandi bawalukeenda, koti bakuuka yeefwe boosi lu bali. Endaalo cheefwe chohu syaalo chihamyuuhao koti esiihina, haba si bw'endaalo choosi daawe.

¹⁶ Ewe Omwaami, Nasaae weefwe, ebiindu bino byoosi bi hutekeehe ohuhwoombahira Enyuumba ohwiisa oluyaali mu liita lyao lyoolerefu, niiwe owabituberesa haandi byao nibyo.

¹⁷ Haandi manyire, ewe Nasaae waange endi, otemaanga omwooyo kw'omuundu, haandi osangaaliraanga omuundu oloondakana neende obuluungifu. Mani mubwadyeeri bweene, haandi neende mu buluungifu bw'omwooyo kwaange, nyaanireyo ebiindu bino byoosi nindeedahira omweene, haandi bulaanu mbone abaandu bao abali ano koti lu bayaanireyo y'oli nibedahiire haandi nibasangaalire.

¹⁸ Ewe Omwaami Nasaae wa bakuuka yeefwe Abburahamu, Yisaka neende Yakobbo, liindaanga buli ludaalo embaasa yifwaana yityo mu baandu bao, haandi liindaanga emyooyo kyaabwe nikihwomiriireho.

¹⁹ Beresa Solomooni omwaana waange omwooyo kweyaanayo elalira ohudiiraanga amalako kao, neende ohuwuliraanga buli siindu sy'olagira, haandi neende ohwoombaha Enyuumba yi ndekeheere ebiindu.”

²⁰ Daudi mani naalagira abaandu boosi ati “Fumie Omwaami Nasaae weeng'we!” Mani abaandu boosi abali nibebuusire ao nibafumia Omwaami, Nasaae wa bakuuka yaabwe. Baguunama aasi mani nibeesa mu Omwaami oluyaali, haandi neende mu omutuki.

²¹ Mani nibayaanayo ebiyaanwa eyiri Omwaami, haandi nibabiberesa abaandu ohubilya. Hu ludaalo luloondaho, bayaanira Omwaami ebiyaanwa bisaambwa nibiri ebilaamba: bayaanayo esurusi chiindi elifu ndala (1,000), amakoondi elifu ndala (1,000), amakoondi madoto elifu ndala (1,000). Haandi nibayaana ebiyaanwa by'ohung'wa ebichiiraho, neende ebiyaanwa biindi ebiingi muno ebyayaanwa hulw'esyaalo sya Yisiraeli syoosi.

²² Baliira haandi bang'weera mu moni w'Omwaami, mani nibasangaala muno hu ludaalo olwo. Haandi ehabi lyohubiri, bemeeda ohulaangirira Solomooni omwaana w'omutuki Daudi ohuba omutuki waabwe, nibamubaha amafuta mu liita ly'Omwaami ohuba omutuki waabwe, haandi nibabaha Sadoki amafuta ohuba omulaamisi waabwe.

²³ Solomooni mani niyeehaswa hu sisaala esy'obutuki sy'Omwaami ohusihira Daudi laatang'ene. Ebiindu byoosi byachiira Solomooni bulai, haandi esyaalo sya Yisiraeli syoosi syamwiisamo oluyaali.

²⁴ Abahoongo boosi, abanamaye boosi, neende abaana ba Daudi baandi boosi, bawuliraanga omutuki Solomooni.

²⁵ Omwaami yakera esyaalo sya Yisiraeli ohwiisa mu Solomooni oluyaali lw'obutuki, olutabechaangaho hu mutuki yeesi owataangira mu Yisiraeli.

Eby'obutuki bwa Daudi mu bwiimbitiki

²⁶ Daudi omwaana wa Yese yatuka Yisiraeli yoosi

²⁷ embaka y'emyaaka amahumi kane. Yatukira mu Hebburoni ohumala emyaaka kitaanu-na-kibiri, nae naali mu Yerusalemu yatuka embaka y'emyaaka amahumi kadatu-na-kidatu.

²⁸ Daudi yafwa naayindiire muno, naakofuule, naali neende obuyiinda haandi naali neende oluyaali luungi muno. Solomooni omwaana wae mani naakobola mu makulu kae koti omutuki.

²⁹ Ebidiira hu biindu bi mutuki Daudi yahola ohutulira elalira mu njaako ohwoola hu njakamo, byandiikwa mu byandiiko by'abanabbi badatu, Samueli, Natani neende Gaadi.

³⁰ Ebyandiiko ebyo byeekesa obutuki bwae bwoosi koti lu bwali, obunyala bu yali nabwo, neende ebiindu byoosi ebyamukwaaho, neende ebyakwa hu Yisiraeli, neende hu bwaami bwoosi obw'ebyaalo bi syebodoohaanie.