1 Ebyomubiha 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amakerako ka Daudi kadiira hu hwoombaha Enyuumba ya Nasaae

¹ Omutuki Daudi yalaanga abahoongo bomu Yisiraeli boosi, abahoongo b'enono, abahoongo b'ebituundu bihalaabanira omutuki, abeemeresi b'elifu-elifu, abeemeresi b'emia-emia, abaliindi b'obuyiinda bwoosi neende ebyaayo by'omutuki neende abaana bae, alala neende abahoongo bomu dooho, abasaacha bahunuufu, neende abanamaye bamanyirifu, boosi ohwebuusira mu Yerusalemu.

² Daudi yasiingira yeema mu moni waabwe, yachaaka ohubaboolera ati; “Eng'we basyaange haandi abaandu baange, tekeerese. Ndadaha muno ohwoombahira Esanduuku ly'Endagaano y'Omwaami enyuumba yi linabecheenge endaalo choosi, yibe abuundu yi Omwaami Nasaae weefwe anawuluusireengeho amakulu kae. Haandi ndali nimalire ohuhola endekeha y'ohwoombaha Enyuumba ya Nasaae ohumwiisamo oluyaali.

³ Nae Nasaae mweene yamboolera ati, ‘Haba soochia hunyoombahira Enyuumba daawe, olwohuba oli omusaacha mulwaani w'ebiita haandi weedisa amabaanga maangi muno.’

⁴ Omwaami Nasaae wa Yisiraeli, niye owandoola, alala neende abeechuhulu baange ohutukaanga Yisiraeli yino endaalo choosi pe. Yadoola enono ya Yuda ohutukaanga, haandi mu nyuumba ya Yuda omwo, nimwo mu yadoola edaala lya laata yaange. Mani ohutula mu daala elyo lyoosi, yasiima ohuuhola omutuki w'esyaalo sya Yisiraeli syoosi.

⁵ Haandi mu baana basyaani baange boosi (olwohuba Omwaami yamberesa abaana basyaani abaangi), yadoolamo Solomooni ohutuka Yisiraeli endaalo choosi, obutuki bu Omwaami mweene yataao.

⁶ “Omwaami yamboolera ati, ‘Solomooni omwaana wao niye ochia ohunyoombahira Enyuumba neende olwaanyi lwaange lwoosi, olwohuba ndamudoola abe omwaana waange, naange mbe laatang'ene.

⁷ Njia ohuhola obwaami bwae buyiindire endaalo choosi, yemeede ohufunihira amalako kaange neende ebilagiro byaange, koti lu ali ohuhola buti.’

⁸ “Mani sakira bulaanu, eng'we abaandu baange, mu moni wa Yisiraeli yoosi, abaandu b'Omwaami, mbaboolera haandi Nasaae weefwe naawulira endi, muliindeenge haandi mufunihireenge amalako koosi aka Omwaami Nasaae weefwe. Ao mani muchia ohudoong'a nimuli abeene syaalo silai sino, musirehere abaana beeng'we neende abeechuhulu beeng'we endaalo choosi pe.”

⁹ Yaboolera Solomooni ati, “Nae ewe Solomooni mwaana waange, manya Nasaae wa laatao, haandi omuhalaabanire neende omwooyo kwao kwoosi haandi niwedahira; olwohuba Omwaami amanyire ebibaaso by'abaandu haandi ategeera boosi bi beekoomba. N'onamukoonyeenge, achia ohuhweyokesaanga, nae n'onamwebabeenge, achia ohuhusukuna endaalo choosi pe.

¹⁰ Mani simanye koti lu Omwaami ahudoolere woombahe Enyuumba ya Nasaae. Ba omwomiifu mani osihole.”

¹¹ Daudi mani naaberesa Solomooni omwaana wae esifwaanani sy'Enyuumba ya Nasaae koti lu yahabe, ebibiihiro byaayo, ebiseenge byomu goroofa, ebiseenge byomuukati neende Abuundu Ahiramo Obwoolerefu yi byonoono bileherwaanga.

¹² Haandi yamuberesa endekeha choosi ech'ebiindu byoosi bi yali nabyo mu bibaaso ebidiira hu lwaanyi lwoosi, ebiseenge bichebodoohaanie, ey'ebyaaki bibiihwamo ebiindu byehoonyerwa mu Nyuumba ya Nasaae, alala neende ebiyaanwa biba nibibereeswe Omwaami.

¹³ Daudi haandi yamuberesa endekeha yoosi ey'ohutekehera abalaamisi neende Abaleefi, neende ey'omulimo kwoosi okw'ohuhalaabanira mu Nyuumba y'Omwaami; neende ey'ebiindu ebyehoonyerwa mu Nyuumba y'Omwaami.

¹⁴ Yamweekesa obuungi bw'efeesa yihoyere ohwehoonyera mu hwitaanyaanga ebiindu byoosi eby'efeesa neende ebya saabbu ebyehoonyerwa hu buli mulimo.

¹⁵ Yamweekesa obusito bw'esaabbu eyihoyerwa hu buli siteeni sy'etaara ly'esaabbu neende obw'amataara lyasyo. Obusito bw'esiteeni sy'efeesa neende obw'amataara kasyo, ohuchianakana koti lu binehoonyerweenge hu mulimo kwasyo.

¹⁶ Yamuberesa obusito bw'esaabbu y'ohwitanyamo emeesa yohutechaangaho emigaati kiyaanirwa Nasaae neende obusito bw'efeesa bw'ohwitaanyamo emeesa ch'efeesa.

¹⁷ Yameedaho omumweekesa obusito bw'esaabbu enyweerefu ey'ohwitaanyamo ewuma, ebbakuli neende ebikoombe, haandi n'omeedereho obusito bw'esaabbu neende obw'efeesa ohwitanyamo ebbakuli ch'esaabbu neende ech'efeesa.

¹⁸ Yamweekesa koti obuchweenufu bw'esaabbu eyihoyera ohwehoonyerwa mu hwoombaha alutaari yi bubbaani buhoyere ohuniooheserwaho, neende ey'ohwoombaha esigaari sy'abakerubbi, ebibaambula embaya chabo chafuuniha Esanduuku ly'Endagaano y'Omwaami.

¹⁹ Omutuki Daudi yaboolera Solomooni omwaana wae ati, “Ebyo boosi biri mu tekeha eyandiikwa niyiloondehana neende engeraka yi Omwaami mweene yandagira ohwooseresa.”

²⁰ Omutuki Daudi mani naaboolera Solomooni omwaana wae ati, “Guma omwooyo, obe omumaliirifu, mani ohole omulimo okwo. Otatichaanga daawe, haandi esiindu syoosi sitahukayiraanga daawe; olwohuba Omwaami Nasaae, Nasaae yi halaabanira, ali naawe. Haba saachia huhujwaang'a daawe, ohwoola lu wahamaliirise omulimo kwoosi okuhoyere ohuholwa hu Nyuumba yae.

²¹ Abalaamisi boosi neende Abaleefi bamalire ohukabwa emirimo ky'ohuholaanga mu Nyuumba ya Nasaae. Abahalaabani abali neende obumanyirifu mu buli siindu bosi bali abeetekefu ohuhuhoonya; haandi abaandu boosi neende abeemirisi baabwe banaawulireenge bi obalagira.”