1 Ebyomubiha 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endekeha y'obwimirisi bw'abanamaye neende ob'obutuki

¹ Luno nilwo olunyiriri lw'Abaisiraeli beemirisi b'amadaala neende enono alala neende abahoongo baabwe abahuliraanga emirimo kyomu bwaami obwo. Buli mwoosi kw'omwaaka kwoosi yalichiingiyo omukaanda kukabuhaane okw'abasaacha elifu amahumi kabiri neende chine (24,000) okwalichiingi nikuli hu mulimo kw'ohuhalaabanaanga ohwo, nikuli neende abakuhulira.

² Yasobbeamu omwaana wa Sabbudieli niye owalichiingi neende obunyala bw'omukaanda kutaangira okuhalaabana mu mwoosi kuchaaka. Omukaanda kwae kwalimo abasaacha elifu amahumi kabiri neende chine (24,000).

³ Yasobbeamu wuno yali omwiichuhulu wa Peresi, haandi yali omuhoongo w'abeemirisi boosi aba eye mu mwoosi kutaangira.

⁴ Dodai Omuahoohi yali mu bunyala bw'omukaanda kwomu mwoosi kwohubiri; haandi mu mukaanda kwae kuno, mwalimo abasaacha elifu amahumi kabiri neende chine (24,000). Mikiloti niye owali omuloondereraho mu buhoongo bw'amaye.

⁵ Omuhoongo wohudatu, ow'omukaanda kwa hadatu, yali niye Bbenaya, omwaana wa Yehoyada omulaamisi muhuluundu, niye owali omuhoongo w'eye ly'omwoosi kwohudatu. Ab'omukaanda kwae, mwosi mwalimo abasaacha elifu amahumi kabiri neende chine (24,000).

⁶ Bbenaya wuno yali omusaacha omuhunuufu muno mu mahumi kadatu haandi niye omuhoongo w'amahumi kadatu. Amisabbadi omwaana wae niye owali mu bunyala w'omukaanda kwae kuno.

⁷ Asaeli mwanaang'ina Yoabbu yali owahane, owomu mwoosi kwohune. Sebbadia omwaana wae niye owali amuloondaho mu buhoongo. Mu mukaanda kwae mwosi mwalimo abasaacha elifu amahumi kabiri neende chine (24,000).

⁸ Omuhoongo wohutaanu, ow'omwoosi kwohutaanu, yali Samihuuti, Omuyisirahi. Mu mukaanda kwae mwosi mwalimo abasaacha elifu amahumi kabiri neende chine (24,000).

⁹ Owohusaasaba, ow'omwoosi kwohusaasaba, yali Yira, omwaana wa Yikeesi wa Tokoa. Mu mukaanda kwae mwosi mwalimo abasaacha elifu amahumi kabiri neende chine (24,000).

¹⁰ Owohutaanu-na-chibiri, ow'omwoosi kwohutaanu-na-chibiri, yali Helesi Omupelooni, otula hu basyaani ba Efuraimu. Mu mukaanda kwae, mwosi mwalimo abasaacha elifu amahumi kabiri neende chine (24,000).

¹¹ Owohutaanu-na-chidatu, ow'omwoosi kwohutaanu-na-chidatu, yali Sibbekai Omuhuusa, otula mu Abaseera. Mu mukaanda kwae mwalimo abasaacha elifu amahumi kabiri neende chine (24,000).

¹² Owohutaanu-na-chine, ow'omwoosi kwohutaanu-na-chine, yali Abbieseeri wa Anatooti, Omubbenjamini. Mu mukaanda kwae mwoosi mwalimo abasaacha elifu amahumi kabiri neende chine (24,000).

¹³ Omuhoongo w'omwoosi kw'ehumi, yali Maharai wa Netofa, otula mu Seera. Mu mukaanda kwae mwoosi mwalimo abasaacha elifu amahumi kabiri neende chine (24,000).

¹⁴ Omuhoongo w'ehumi neende mulala, ow'omwoosi kw'ehumi neende mulala, yali Bbenaya wa Piratoni, haandi otula mu Efuraimu. Mu mukaanda kwae mwoosi mwalimo abasaacha elifu amahumi kabiri neende chine (24,000).

¹⁵ Omuhoongo w'ehumi neende chibiri, ow'omwoosi kw'ehumi neende chibiri yali Helidai wa Netofa, ow'enono ya Otiniyeeli. Mu mukaanda kwae mwoosi mwalimo abasaacha elifu amahumi kabiri neende chine (24,000).

Abali bahulira enono cha Yisiraeli

¹⁶ Luno nilwo olunyiriri lw'abaandu bali nibahulira enono cha Yisiraeli: Eyali naahulira Abarubbeeni, yali Elieseeri omwaana wa Sikiri. Sefatia, omwaana wa Maaka, niye owali naahulira Abasimioni.

¹⁷ Hasabbia omwaana wa Kemueli, niye owali naahulira Abaleefi. Sadoki niye owali naahulira ab'enono ya Arooni.

¹⁸ Elihu, mwanaang'ina Daudi, niye owali naahulira enono ya Yuda. Omuri omwaana wa Mikaeli, niye owali naahulira enono ya Yisakari.

¹⁹ Yisimaya omwaana wa Obbadia, niye owali naahulira enono ya Sebbulooni. Yeremooti omwaana wa Asiriyeeli, niye owali naahulira enono ya Nafutaali.

²⁰ Hosea omwaana wa Asasia, niye owali naahulira Abaefuraimu. Yoeli omwaana wa Pedaya, niye owali naahulira esituundu silala syohubiri esy'enono ya Manaase.

²¹ Yido omwaana wa Sakaria, yahulira esituundu silala syohubiri siindi esy'enono ya Manaase. Yaasiyeeli omwaana wa Abbuneeri niye owali naahulira enono ya Bbenjamini.

²² Asareeli omwaana wa Yerohaamu niye owali naahulira enono ya Daani. Abo nibo abali abeemirisi b'enono cha Yisiraeli.

²³ Omutuki Daudi haba siyabala abaandu abalichiingi aasi w'emyaaka amahumi kabiri daawe, ohweema hu sisuubise sy'Omwaami esyohuyira abaandu ba Yisiraeli koti lu bahabe ababitiirifu koti eng'ining'ini chiri aakulu mu bireesi.

²⁴ Yoabbu, yi ng'ina yali Seruya, mani naachaaka ohubala abaandu, nae haba siyanyala ohubamalayo boosi. Ohubala hw'abaandu huno hwakera yasaandya Abaisiraeli muno, haandi bw'abaandu babalwa haba sibwandiikwa mu sy'ebiha by'Omutuki Daudi daawe.

Abeemereraanga emyaandu kyomu bwaami

²⁵ Owaliindaanga emyaandu ky'omutuki, yali Asimafeesi omwaana wa Adieli. Nae owaliindaanga emyaandu kyomu syaalo, obwomu biko, obwomu ngoongo, neende obwomu minara, yali Yonatani omwaana wa Wusia.

²⁶ Nae owahuliraanga abo abaholaanga emirimo kyomu mikuunda koti ohulima, yali Esiri omwaana wa Kelubbu.

²⁷ Owahuliraanga emikuunda ky'emisabbiibbu yali Simei wa Rama. Sabbudi wa Sifumu, niye owaliindaanga ebyaamo binokwa ohutwa mu sinyuhiro sy'efini.

²⁸ Bbalihanani wa Gederi, niye owaliindaanga emisaala miseituuni neende emisaala misikamoore ekiri mu Sefela. Yoasi niye owahuliraanga ebibiihiro by'amafuta.

²⁹ Ebyaayo byayirwaanga mu Sarooni, Sitirai wa Saroni owabiliindaanga. Safati omwaana wa Adilai, niye owaliindaanga ebyaayo byali mu mahooho.

³⁰ Obbili Omuisimaeli niye owaliindaanga engamia. Nae Yehideyiya wa Meronooti, niye owaliindaanga esuhiri. Yasiisi Omuhagiri niye owaliindaanga amakoondi neende embusi.

³¹ Bano boosi bali abaliindi b'obuyiinda bw'Omutuki Daudi.

Abakeraki ba Daudi

³² Yonatani, laata muyere wa Daudi, yali omukeraki mukesi muno haandi omusaacha otegeera muno haandi omanyire amalako. Yonatani wuno alala neende Yehiyeeli omwaana wa Hakimooni nibo abalichiingi mu bunyala bw'ohuliinda abaana b'omutuki.

³³ Ahitofeeli niye owalichiingi omukeraki w'omutuki. Husaai Omwariiki niye owali omwiicha w'omutuki haandi omukeraki wae.

³⁴ Mani luunyuma lw'ohufwa hwa Ahitofeeli, Abbiataari alala neende Yehoyada omwaana wa Bbenaya nibo abakobolao koti abakeraki. Yoabbu niye owali omuhoongo w'eye ly'omutuki.