1 Ebyomubiha 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Daudi niyayiindira mani yakofula muno, yahola omwaana wae Solomooni ohuba omutuki wa Yisiraeli.

Omulimo kw'Abaleefi

² Omutuki Daudi yabuusa alala abeemirisi ba Yisiraeli, abalaamisi, alala neende Abaleefi.

³ Abasaacha Abaleefi boosi bali ab'emyaaka amahumi kadatu n'ohuhirao, babala buli muundu, mani niboola elifu amahumi kadatu neende chitaanu-na-chidatu (38,000).

⁴ Hu abo, elifu amahumi kabiri-na-chine (24,000), omutuki omulimo kwomu Nyuumba y'Omwaami. Elifu chisaasaba (6,000), omutuki yababeresa omulimo kw'obwaami neende okw'obukayi.

⁵ Elifu chine (4,000), yababeresa omulimo kw'ohuliinda ebiruwa, haandi abaandi elifu chine (4,000) yaababeresa omulimo kw'ohufumianga Omwaami nibehoonyera ebihubba enyembo nibehoonyera ebihubba bi mutuki yataao ohuhola omulimo kw'ohufumia okwo.

⁶ Daudi yakabulamo Abaleefi mu mikaanda kidatu, ohuloondakana neende enono chaabwe chino: Abaana ba Leefi bali: Gerisoni, Kohati, neende Merari.

⁷ Gerisoni yali neende abaana basyaani babiri bano: Ladani neende Simei.

⁸ Ladani yali na baana basyaani badatu bano: Yehiyeeli, Setaamu, neende Yoeli,

⁹ abalichiingi abeemirisi b'enono chatula mu Ladani. (Simei yali neende abaana badatu bano: Selomooti, Hasiyeeli, neende Harani.)

¹⁰ Abaana basyaani ba Simei bali: Yahaati, Siina, Yewusi, neende Bberia. Bane bano boosi bali abaana ba Simei.

¹¹ Yahaati niye owaali omuhuluundu, Sisa niye owali owohubiri. Yewusi neende Bberia haba sibali neende abaana basyaani baangi daawe, sakira babalwa koti abaana b'enyuumba ndala.

¹² Kohati yali neende abaana basyaani bane: Amuraamu, Yisihaari, Hebburoni, neende Wusiyeeli.

¹³ Abaana ba Amuraamu nibo: Arooni neende Musa. (Arooni neende abeechuhulu bae bakabulwa endulo ohuliindaanga ebiindu byoolerefu, ohuniooheseraanga Omwaami obubbaani, ohumuhalaabaniraanga, neende ohuberesaanga abaandu ehabi mu liita lyae, endaalo choosi pe.

¹⁴ Nae abaana ba Musa, omuundu wa Nasaae, bosi bayirirwa alala mu mukaanda kw'Abaleefi.)

¹⁵ Musa yali neende abaana basyaani babiri boong'ene, Gerisoni neende Elieseeri.

¹⁶ Omuhuluundu hu baana ba Gerisoni yali Sebbueli.

¹⁷ Elieseeri yesi yali neende omwaana musyaani mulala yeeng'enge, Rehabbia, nae Rehabbiya yali neende abaana abaangi muno.

¹⁸ Omwaana musyaani wohubiri wa Kohati niye Yisihaari, owali neende omwaana musyaani mulala yeeng'ene, Selomiiti, owali omwiimirisi w'enono eyo.

¹⁹ Omwaana musyaani wohudatu wa Kohati niye Hebburoni, owali neende abaana bane: Yeria, Amaria, Yahasieli, neende Yekameyamu.

²⁰ Omusyaani wohune wa Kohati niye Wusieli, owali neende abaana babiri boong'ene, Miika neende Yisia.

²¹ Merari yali neende abaana basyaani babiri: Mahili neende Musi. Mahili yali neende abaana basyaani babiri: Eliasaari neende Kisi.

²² Eliasaari yafwa n'atebuuleho omwaana musyaani kata mulala, ohutusaho yali neende abaana bahaana boong'ene. Mani abahaana bae badeehera bamboocho yaabwe, abaana ba Kisi, laata yaabwe muyere.

²³ Musi, yali neende abaana basyaani badatu: Mahili, Ederi, neende Yeremooti.

²⁴ Bano nibo abali abeechuhulu ba Leefi, ohuloondakana neende enyuumba cha bakuuka yaabwe, omuli abasaacha boosa emyaaka amahumi kabiri n'ohuhirao, ababalwa buli otulayo, mani nibaandiikwa ameeta kaabwe. Abo nibo abaholaanga omulimo kw'ohuhalaabaniraanga mu Nyuumba y'Omwaami.

²⁵ Daudi mani n'aboola ati, “Omwaami, Nasaae wa Yisiraeli, abereese abaandu bae omuleembe; haandi achia ohumenyaanga mu Yerusalemu endaalo choosi pe.

²⁶ Mani sakira, Abaleefi haba sibanakiingeenge Eyeema ly'Ohubaao hw'Omwaami neende ebiindi binehoonyerweengemo.”

²⁷ Ohweema hu bikerako bimaliirihayo ebya Daudi, Abaleefi boosi balichiingi neende emyaaka amahumi kabiri n'ohuhirao, nibo abandiikwaanga ohuhalaabaniraanga Omwaami mu Nyuumba ya Nasaae.

²⁸ Babechaanga neende omulimo kw'ohuhoonyaanga abalaamisi ab'enono ya Arooni mu biindu boosi ebidiira hu huhalaabanira Omwaami mu Nyuumba ya Nasaae koti: ohuliindaanga bulai olwaanyi neende ebida byahwo, ohulabyaanga mu ngeri y'esinadiini ebiindu byoolerefu byoosi, neende omulimo kwoosi okudiira hu huhalaabanira mu Nyuumba ya Nasaae.

²⁹ Haandi bali neende omulimo kw'ohubonaanga ebidiira hu mugaati kuyaanwa eyiri Nasaae, obusye buchuungirwe bulai obw'emere y'emwo, emigaati kitaali emibbaahe, ebiyaanwa bihubbwe, obusye busaasaanisiibwe neende amafuta k'enaasi; neende ohupiima obuhoongo neende obusito bw'ebiyaanwa byomu Nyuumba ya Nasaae.

³⁰ Bali ab'ohubechaangao ohweebasa neende ohukinia Omwaami buli chuli neende engoloobe,

³¹ neende ohuyaaniraanga Omwaami ebiyaanwa byoosi ebisaambwa nibiri ebilaamba hu ludaalo lwa Sabbaato, hu Sidyaalo sy'Omwoosi Muyaaha, neende ebidyaalo biindi eby'Endaalo huluundu chataao. Ebilagiro ebyo byaholwa nibyeekesa bulai bweene obuungi bw'Abaleefi abali nibabeereswa omulimo kw'ohwiinamiraanga Omwaami esiha syoosi.

³² Bali nibabeereswa omulimo kw'ohuliindaanga Eyeema ly'Ohubaao hw'Omwaami neende Abuundu Woolerefu, nibahoonya abasyaabwe ab'enono ya Arooni ohuhalaabaniraanga Omwaami mu Nyuumba ya Nasaae.