1 Ebyomubiha 19 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi ayiingira Abaamooni neende Abasiria

¹ Luunyuma ebyo nibiweere, Omutuki Nahasi ow'Abaamooni naafwa, omwaana wae Hanuni niyeehaswa ohuba omutuki.

² Omutuki Daudi mani n'aboola ati, “Njia ohukwiira Hanuni omwaana wa Nahasi esisa, olwohuba laatang'ene yangwiiraanga esisa.” Mani Daudi n'atuma bawamwaanda ohuchia ohumulemya omwooyo. Mani niboola ewa Hanuni mu syaalo sy'Abaamooni ohulemya omwooyo.

³ Nae abeemirisi b'Abaamooni nibaboolera omutuki Hanuni bati, “Ewe obaasa oti mubwadyeeri bweene Daudi ahutumiire abasaacha bano ohwiicha ohuhulemya omwooyo, oba yeesa mu laatao oluyaali? Haba sinisyo daawe! Abatumire ano ohuhemeresa neende ohulambuula esyaalo sino koti lu siri, hu anyale ohwiicha asiyiingire.”

⁴ Hanuni mani naakwa hu bawamwaanda ba Daudi, naababekaho endefu chaabwe, haandi naaheengaheengamo engubo chaabwe akatikaati ohwoola hu biruudi, naabalehuula nibeweerao;

⁵ mani nibeweerao. Nae bawamwaanda abo badiirwa esoni nyiingi muno byaabahaya ohukobola engo waabwe. Daudi niyawulira esyali nisibakwiireho, yabatumira abaandu ohubabukaanira. Omutuki yaboola ati bahole nibadoong'a Yeriko ohwoola lu ndefu chaabwe chahabe nichimalire ohuhula, hu bamale bakobole.

⁶ Omutuki Hanuni alala neende Abaamooni nibamanya bati esyo sinyoleese Omutuki Daudi, mani niyehola omusuku waabwe, batuunga ekiloguraamu elifu amahumi kadatu neende chine (34,000) ak'efeesa ohupaangisa ebigaari neende abeerusi b'efaraasi ohutula Mesopotamia, Aramumaaka, neende Sobba.

⁷ Mani nibapaangisa ebigaari elifu amahumi kadatu neende bibiri (32,000) neende omutuki wa Maaka alala neende ab'amaye bae. Abo beecha niboombaha ekaambi yaabwe niyitingaalire Medeba. Abaamooni bebuusa ohutula mu biko byaabwe mani nibeetekehera ohulwaana.

⁸ Daudi niyasiwulira, yatuma Yoabbu neende eye lyoosi ely'abasaacha b'amaani.

⁹ Abaamooni beecha mani nibachaaka ohwetekehera ebiita hu mulyaango kw'esiko syaabwe sihuluundu. Abatuki bali nibeechere badoong'a boong'ene erwaanyi mu ngoongo.

¹⁰ Yoabbu niyabona ati abasuku bae bali nibamuseeta nibamutulira mu moni wae, neende emukoongo wae, yadoolamo abalwaani bahiramo obulai mu Yisiraeli mani naabata abuundu aliingalaane neende Abasiria.

¹¹ Abalwaani baandi badoong'ereo boosi, yabadiisa Abbisai mwanaang'ina, bosi nibeetekeha ohuseeta Abaamooni.

¹² Yoabbu yaboolera Abbisai ati, “Niwiichuhana Abasiria baahira amaani, wiichaanga wahoonga. Nae Abaamooni nibahuhira amaani, njia ohwiicha huhoonye.

¹³ Guma omwooyo mani obe omwomiifu. Leha hulwaane sisaacha eyiri abaandu beefwe neende ebiko bya Nasaae weefwe. Leha Omwaami ahole koti lu asiima.”

¹⁴ Yoabbu neende abasaacha bae mani nibaseeta Abasiria, Abasiria nibabeeruha.

¹⁵ Abaamooni nibabona bati Abasiria beruuhe, bosi mani nibeeruha Abbisai, byaabwe. Ao Yoabbu mani naakobolayo Yerusalemu.

¹⁶ Nae Abasiria nibabona bati Abaisiraeli babayingiire, batuma bawamwaanda mani nibaleeta abalwaani ohutula mu byaalo bya Siria ebiri ebukwe w'Omwaalo kwa Ewufuraate, neende Sobbaki, omuhoongo w'eye ly'Omutuki Hadadeseri wa Sobba.

¹⁷ Daudi niyawulira atyo, yesi yabuusa alala eye lya Yisiraeli lyoosi, nibaambuha Omwaalo kwa Yorodaani, n'aboolaho, niyetekeha ohulwaania Abasiria. Daudi mani naalwaania muno Abasiria.

¹⁸ Abasiria nibeeruha Abaisiraeli. Daudi niyeeta mu Abasiria abasaacha elifu chitaanu-na-chibiri (7,000) aboohu bigaari, elifu amahumi kane (40,000), aboohu makulu. Haandi niyeeteramo Sobbaki, omuhoongo w'eye lyaabwe.

¹⁹ Abahalaabani ba Hadadeseri nibabona bati Abaisiraeli babayingiire, bahola endagaano y'omuleembe neende Daudi, mani nibeehola abahalaabani bae. Mani Abasiria nibahaya ohuhoonya Abaamooni ehabi liindi daawe.