1 Ebyomubiha 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiita bi Daudi yayiingira

¹ Luunyuma w'ebyo, Omutuki Daudi yaseeta Abafilisiti ehabi liindi mani naabayiingira. Yatusa mu bunyala baabwe siko Gaati, alala neende engoongo chali nichisyebodoohaanie.

² Daudi yayiingira esyaalo sya Moabbu, mani Abamoabbu nibeehola abahalaabani bae, nibachaaka ohutooyaanga omusolo.

³ Daudi haandi yaseeta Hadadeseri omutuki wa Sobba, esiri aambi neende Hamati, olwohuba Hadadeseri oyo yali naachiire ohwomiisa obutuki bwae mu situundu sisibiraane neende Omwaalo kwa Ewufuraate.

⁴ Daudi yamuwaambaho ebigaari elifu ndala (1,000), abalwaani bohu faraasi elifu chitaanu-na-chibiri (7,000), neende abalwaani bohu makulu elifu amahumi kabiri (20,000). Daudi yatema-tema efaraasi chihwehweesa ebigaari choosi, nae naaleha efaraasi chinyala ohuhwesahweesa ebigaari emia (100).

⁵ Abasiria ba Damasiko nibeechia ohuhoonya Hadadeseri omutuki wa Sobba, Daudi yabeetamo abasaacha elifu amahumi kabiri neende chibiri (22,000).

⁶ Daudi ninyoombaha amakaambi mu syaalo syaabwe, mani bosi nibeehola abahalaabani bae, nibatooyaanga omusolo. Omwaami yahola Daudi yayiingiraanga buli yi yachiraanga.

⁷ Daudi yawaamba engabo ch'esaabbu echali nichikingwaanga neende abahoongo ba Hadadeseri, mani naachiyira mu Yerusalemu.

⁸ Haandi yayaaya obuungi bw'emigasa muno ohutula mu Tibbuhaati neende mu Kuuni, ebiko bihunuufu bi Hadadeseri yatukaanga. (Luunyuma Solomooni yehoonyeraanga emigasa kino ohuholamo amataangi, emiguulo, alala neende ebyehoonyerwa by'omugasa ebyomu nyuumba ya Nasaae.)

⁹ Toou omutuki wa Hamati niyawulira ati Daudi ayiingira eye lya Hadadeseri omutuki wa Sobba lyoosi,

¹⁰ yatuma omwaana wa Hadoramu eyiri Omutuki Daudi ohumuheesa neende ohumuwuluusa ohuyiingira Hadadeseri; olwohuba Hadadeseri oyo yali naalwaaniaanga Tou muno. Hadoraamu yayirira Daudi ebiyaanwa bya buli ngeri ebyaholwa mu saabbu, efeesa, neende mu mugasa.

¹¹ Ebyo, Omutuki Daudi yabiyaanira Omwaami, alala neende efeesa neende esaabbu bi yali niyayaaya ohutula mu byaalo biindi bi yali niyayiingira koti: Edomu, Moabbu, Abaamooni, Filisiti, neende Amaleki.

¹² Abbisai, omwaana w'omuhasi olaangwa Seruya, mani niyeetera mu Hooho y'omuunyu Abeedomu elifu ehumi neende chitaanu-na-chidatu (18,000).

¹³ Abbisai yoombaha ekaambi chohu lwaana mu Edomu mwoosi, Omwaami naahola Daudi ohuyiingira ebiita buli yoosi yi yachichaanga.

¹⁴ Daudi mani naatuka Yisiraeli yoosi, naabona ati abaandu boosi bayirwa bulai haandi ataali obutehubbira daawe.

¹⁵ Yoabbu omwaana wa Seruya niye owali omuhoongo w'eye elyo; Yehosafati omwaana wa Ahiluudi niye eyawandiikaanga ebyo byoosi ebyakwiichaangao.

¹⁶ Sadoki omwaana wa Ahituubbu, neende Ahimeleki omwaana wa Abbiataari nibo abali abalaamisi; Safisa niye owali omwandiiki womu siina;

¹⁷ Bbenaya omwaana wa Yehoyada niye owali ohulira abaliindi ba Daudi Abakereeti neende Abapeleeti. Nae abaana ba Daudi nibo abalichiingi abahoongo balichiingi aambi muno neende omutuki mu humuhalaabanira.