1 Ebyomubiha 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani nibayira Esanduuku ly'Endagaano nibalita akati mu yeema li Daudi yali niyalitekehera. Mani nibayaana eyiri Nasaae ebiyaanwa bisaambwa, neende ebiyaanwa bileeta omuleembe.

² Daudi niyamala ohuyaanayo ebiyaanwa bisaambwa neende ebiyaanwa bileeta omuleembe, yaberesa abaandu abo ehabi mu liita ly'Omwaami.

³ Haandi yakabula buli musaacha neende buli muhasi mu Yisiraeli, omugaati neende esipaande sy'enyama, neende esitole sy'emisabbiibbu myoomu kiswaakirwe.

⁴ Daudi naadoola abaandi hu Abaleefi abo ohuhalaabaniraanga mu moni w'Esanduuku ly'Endagaano y'Omwaami, ohwiimiriraanga ohwiinamira, ohweebasaanga neende ohufumiaanga Omwaami, Nasaae wa Yisiraeli.

⁵ Asafu niye owadoolwa ohuba omwiimirisi, abamuloondereraho bali: Sakaria, Yeyeeli, Semiramooti, Yehiyeeli, Matitia, Eliabbu, Bbenaya, Obbedi-Edomu, neende Yeyeeli boosi bali ab'ohubbaanga obuhana sa. Asafu yali owohubbaanga nyaangili.

⁶ Nae abalaamisi babiri bano, Bbenaya neende Yahasieli, nibo abahubbaanga eturumbete buli ludaalo mu moni w'Esanduuku ly'Endagaano ya Nasaae.

⁷ Hu ludaalo olwo nilwo lu Daudi yadooleraho Asafu neende abaasye, naabalagira ohweemberaanga Omwaami neende ohumweebasa.

Olweembo lw'ohufumia

⁸ Mweebase Omwaami, laangirire obuhunuufu bwae;

⁹ Mweembe nimufumia Omwaami; tuumbuleenge ebiindu biwukisa bi yahola.

¹⁰ Sangaaleenge muti huli abae; lehe abo boosi abamwiinamiraanga beehoye!

¹¹ Mweesikeenge Omwaami neende amaani kae, mumweesikeenge butoli-toli.

¹² Yichuliseenge emirimo kiwukisa ki yahola, ebiwuukisa bi yakwiisao, eheenga y'emisaango yi yaheengao.

¹³ Aaa eng'we abeechuhulu ba Abburahamu omuhalaabani wae, eng'we abaana ba Yakobbo, eng'we abadoole bae!

¹⁴ Omwaami niye Nasaae weefwe; eheenga y'emisaango yae yiri mu syaalo syoosi.

¹⁵ Mwiichulise endagaano ya Nasaae, yi yahola ey'endaalo choosi,

¹⁶ endagaano yi yahola neende Abburahamu, esisuubise si yahola neende Yisaka.

¹⁷ Omwaami yahola endagaano neende Yakobbo, endagaano yitaakama eyiri Yisiraeli,

¹⁸ n'aboola ati, “Njia ohubaberesa esyaalo sya Kanani, syahabe esyeeng'we syeene.”

¹⁹ Abaandu ba Nasaae mwali nimusisiiri abadiidi muno mu buungi, haandi mwali abayikaani mu syaalo sya Kanani.

²⁰ Mwang'aabanaanga nimutula mu syaalo silala nimuchia mu siindi, nimutulaanga mu bwaami bulala haandi nimwiingira mu buundi.

²¹ Nae Nasaae siyakanyaho omuundu yeesi ohubasaandya daawe. Ohubaabina, Nasaae yalabula abatuki baabwe ati;

²² “Mutadiiraanga hu bahalaabani baange badoole daawe; haandi mutaholaanga esyonoono syoosi hu banabbi baange daawe.”

²³ Mweembere Omwaami, eng'we esyaalo syoosi! Laangirireenge buli ludaalo koti yatuwonia.

²⁴ Laangirireenge oluyaali lwae eyiri ebyaalo byoosi, abaandu boosi bamanye ebiholwa bihunuufu bi yahola.

²⁵ Olwohuba Omwaami muhunuufu niye, haandi ahoyere ohufumisibwa muno. Ahoyere ohwiisibwamo oluyaali, ohuhirira elalira banasaae baandi boosi.

²⁶ Banasaae boosi ab'ebyaalo biindi biloongaloongwe sa, nae Omwaami niye owaloonga ekulu.

²⁷ Oluyaali neende obunyala byamwebodoohania, amaani neende esangaalo biri mu Enyuumba yae.

²⁸ Mufumie Omwaami, abaandu mweesi abali hu syaalo. Mufumie oluyaali lwae neende amaani kae.

²⁹ Eliita ly'oluyaali lya Nasaae, lifumisibwe; leete ebiyaanwa, mani mwiiche wiingire mu Nyuumba yae. Mwiinamire Omwaami koti lu sihoyere.

³⁰ Teengerehe nimuli mu moni wae, eng'we abomu syaalo syoosi! Esyaalo syomiiswa mu bweyaango bwasyo, haandi sisinyala ohudenganisibwa daawe.

³¹ Leha ekulu lisangaale, haandi esyaalo syehoye! Boolereenge ebyaalo byoosi muti: “Omwaami niye otuka.”

³² Leha enyaanja yiwuume. Emikuunda kyeehoye, neende ebikirimo byoosi.

³³ Emisaala kiri mu bichaha kichia ohweemba neende esangaalo mu moni w'Omwaami, olwohuba yeecha ohuheengera esyaalo omusaango.

³⁴ Mweebase Omwaami, olwohuba mulai niye; obuheeri bwae bw'endaalo choosi.

³⁵ Mumuboolere muti: “Tuwonie, Ewe Nasaae Omuwonia weefwe. Otubuuse alala; otutuse mu byaalo biindi, hunyale ohuhweebasaanga neende ohufumia eliita lyao lyoolerefu.

³⁶ Mufumie Omwaami, Nasaae wa Yisiraeli! Mumufumie bulaanu neende endaalo choosi pe!” Ao abaandu boosi nibaboola bati, “Amiina!” Mani nibafumia Omwaami.

Ohwiinamira Nasaae mu Yerusalemu neende Gibbeoni

³⁷ Omutuki Daudi yalehayo Asafu neende Abaleefi baandi bala, mu bunyala butawaao obw'ohwiinamiraanga Nasaae mu moni w'Esanduuku ly'Endagaano koti lu sihoyerwa buli ludaalo.

³⁸ Yalehayo Obbedi-Edomu omwaana wa Yedutuuni yesi neende abasaacha baandi amahumi kasaasaba neende bataanu-na-badatu, ab'enono yae ohubahoonyaanga. Hoosa neende Obbedi-Edomu nibo abali neende obunyala bw'ohuliindaanga ebiruwa.

³⁹ Sadoki omulaamisi alala neende abalaamisi baasye baandi, nibo abali neende obunyala hw'ohwiinamiraanga Omwaami abuundu wohwiinamiraangamo Nasaae owali Gibbeoni.

⁴⁰ Buli chuli neende buli ngoloobe balichiingi nibahoyere ohusaambaanga ebiyaanwa ebilaamba hu alutaari ohuloondehana neende ebyo byoosi ebyali nibyandiikwa mu Malako k'Omwaami, ka yaberesa Abaisiraeli.

⁴¹ Alala nabo, yalehayo Hemani neende Yedutuuni haandi neende abaandu baandi abali nibadoolwa bulai ohweembaanga nibafumia Omwaami hulw'obuheeri bwae bw'endaalo choosi.

⁴² Hemani neende Yedutuuni haandi nibo abali neende obunyala bw'ohuliindaanga eturumbete neende nyaangili alala neende ebihubba biindi byoosi ebyobbwaanga enyembo ch'ohufumia nicheembwaanga. Abanaluyia ba Yudtuuni nibo abali neende obunyala bw'ohuliindaanga ebiruwa.

⁴³ Mani buli muundu yeesi yeemao mani yaakobola engo wae, nae Daudi yachia engo ohumalaho ebiha biindi neende abomu daala lyae.