1 Ebyomubiha 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi yetekehera ohuleeta Esanduuku ly'Endagaano

¹ Daudi niyeyoombahira enyuumba nyiingi mu Siko silaangwa esya Daudi, haandi naatekehera Esanduuku ly'Endagaano ya Nasaae obweyaango, mani n'alyoombahira eyeema lyayo.

² Daudi mani n'aboola ati, “Abaleefi boong'ene nibo abachia ohufukiirirwa ohukiingaanga Esanduuku ly'Endagaano, olwohuba abo nibo ba Omwaami yadoola ohulikiingaanga haandi ohumuhalaabaniraanga endaalo choosi pe.”

³ Mani Daudi naalaanga Abaisiraeli boosi ohwiicha Yerusalemu ohuyira Esanduuku ly'Endagaano y'Omwaami mu bweyaango bu yali niyalitekehera.

⁴ Daudi haandi yabuusa alala abeechuhulu ba Arooni neende Abaleefi.

⁵ Abaleefi batula mu nyuumba ya Kohati yatulayo, Wuriyeli ohwiimirira abaasye emia ndala neende amahumi kabiri (120).

⁶ Ohutula mu nyuumba ya Merari yatulayo, Asayia, ohwiimirira abaasye emia chibiri neende amahumi kabiri (220).

⁷ Ohutula mu nyuumba ya Gerisoni, yatulayo Yoeli, ohwiimirira abaasye emia ndala neende amahumi kadatu (130).

⁸ Ohutula mu nyuumba ya Elisafani, yatulayo Semaya, ohwiimirira abaasye emia chibiri (200).

⁹ Ohutula mu nyuumba ya Hebburoni, yatulayo Elieli, ohwiimirira abaasye amahumi kataanu-na-kadatu.

¹⁰ Ohutula mu nyuumba ya Wusiyeeli, yatulayo Aminadabbu, ohwiimirira abaasye emia ndala neende ehumi-na-babiri (112).

¹¹ Daudi mani naalaanga abalaamisi Sadoki neende Abbiataari alala neende Abaleefi basaasaba: Wurieli, Asaaya, Yoeli, Semaya, Elieli, neende Aminadabbu.

¹² Yaboolera Abaleefi ati, “Eng'we niing'we abeemirisi b'enono y'Abaleefi. Mani mwelabye alala neende Abaleefi baasyeeng'we, hu munyale ohuleeta Esanduuku ly'Endagaano y'Omwaami Nasaae wa Yisiraeli mu bweyaango bumalire ohulitekeherwa.

¹³ Olwohuba eng'we haba siniing'we abalikiinga hu habi lyataangira. Omwaami Nasaae weefwe sakira atusaandya mu tima neende obwaalaba, olwohutahola koti lu huhoyere ohuhola.”

¹⁴ Abalaamisi abo alala neende Abaleefi mani nibeelabya hu banyale ohukiinga Esanduuku ly'Endagaano ly'Omwaami Nasaae wa Yisiraeli.

¹⁵ Abaleefi bakiingira Esanduuku hu misiruunga hu mabeka kaabwe, koti lu Omwaami yali n'alagiire ohubitira mu Musa.

¹⁶ Daudi haandi yalagira abeemirisi b'Abaleefi ohutaao abasyaabwe beembi, beembe enyembo ch'esangaalo haandi bahuubbe obuhana neende nyaangili.

¹⁷ Ao mani Abaleefi nibadoola Hemani omwaana wa Yoeli; neende mulala hu bamwanaang'ina: Asafu omwaana wa Bberekia; neende abaana ba Merari, neende Etaani omwaana wa Kusaaya;

¹⁸ mulala hu bamwanaang'ina abomu nyuumba ya Merari. Mani nibataao bamwanaang'ina bano ohubahoonyaho: Sakaria, Yaasiyeeli, Semiramooti, Yehiyeeli, Wuni, Eliabbu, Bbenaya, Maseya, Matitia, Elifelehu, neende Mikinea, neende abaliindi b'ebiruwa bya Obbedi-Edomu neende Yeyeeli.

¹⁹ Daudi yalagira abahuluundu b'Abaleefi ohutaao abeembi basyaabwe beembe haandi boobbe obuhana neende nyaangili.

²⁰ Ao mani Abaleefi nibadoola: Sakaria, Asieli, Semiramooti, Yehiyeeli, Wuni, Eliabbu, Maaseya, neende Bbenaya, boosi bali ab'ohuubba obuhana ohuchiana neende Alamooti.

²¹ Nae Matitia, Elifeleehu, Mikinea, Obbedi-Edomu, Yeyeili, neende Asasia nibo abali abohweemberesa neende amaduungu ohuchia naange neende Seminiiti.

²² Kenania, omwiimirisi w'Abaleefi mu hweemba, owali n'ahoyeere ohweemba enyembo olwohuba oyo niye owali naachimanyire muno.

²³ Bbereki neende Alikaana nibo abali abaliindi b'ebiruwa by'Esanduuku ly'Endagaano elyo.

²⁴ Sebbania, Yosafaati, Netaneeli, Amasai, Sakaria, Bbenaya, neende Elieseeri, abalaamisi, nibo abali nibahoyeere ohuubbaannga eturumbete mu moni w'Esanduuku ly'Endagaano y'Omwaami. Obbedi-Edoomu neende Yehia bosi bali nibahoyere ohubechaanga abaliindi b'ebiruwa by'Esanduuku elyo.

Ohukeesa Esanduuku ly'Endagaano ohulyoosa Yerusalemu

²⁵ Omutuki Daudi, neende abeemirisi ba Yisiraeli, alala neende abeemeresi b'abanamaye baachia eyiri enyuumba ya Obbedi-Edomu ohubukula Esanduuku ly'Endagaano, mani bahola esidyaalo esihoongo muno.

²⁶ Bayaanayo eng'oombe surusi chitaanu-na-chibiri alala neende amakoondi kataanu-na-kabiri koosi, ohwomiisa koti Nasaae anyaliire Abaleefi ohukiinga Esanduuku ly'Endagaano.

²⁷ Daudi yali niyefwaalire eganjuula lyaholwa mu laasi nyweerefu muno. Haandi abeembi bosi neende Kenania omwiimirisi waabwe, neende Abaleefi boosi bali nibakiingire Esanduuku elyo. Daudi yesi yali niyefwaalire engubo yomu sibuno ey'elaasi.

²⁸ Mani batyo, Abaisiraeli boosi nibaleeta Esanduuku ly'Endagaano elyo ohwoola mu Yerusalemu nibahuumula neende amakono k'esangaalo, nibahubba eturumbete, enjika, alala neende nyaangili, haandi nibahuubba obuhana.

²⁹ Mani koti lu Esanduuku ly'Endagaano y'Omwaami lyali nilyoola mu Siko sya Daudi, Mikaali, omuhaana wa Saulo, yaleengesera erwaanyi mu dirisa mani naabona Omutuki Daudi naahina haandi naaduumakala neende esangaalo, mani naasinyiha muno mu mwooyo.