1 Ebyomubiha 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esanduuku ly'Endagaano lituswa Kiriati Yearimu

¹ Omutuki Daudi yeteeba hu bahoongo boosi abeemirisi b'emikaanda ekya buli abasaacha elifu ndala (1,000) neende emikaanda ekya buli abasaacha emia ndala (100).

² Yalaangirira eyiri abaandu boosi aba Yisiraeli ati, “Nikali mbwe muli neende esyo si musiima, haandi nikali mbwe nihwo ohudaha hw'Omwaami Nasaae weefwe, lehe hutume bawamwaanda eyiri abaandu beefwe badoong'ereyo boosi, haandi neende eyiri abalaamisi alala neende Abaleefi boosi abali mu biko byaabwe, bababoolere ohwiicha ohwebuusira ano alala naafwe fweesi.

³ Ao mani huba huchia ohweenda Esanduuku ly'Endagaano ya Nasaae, elyali nilyalehwa endaalo chi Saulo yalichiingi naali omutuki.”

⁴ Abaandu boosi basaangaalira esibaaso esyo mani baafukiirisania nasyo.

⁵ Daudi yabuusa alala abaandu ba Yisiraeli boosi ohutula mu nyaande choosi ech'esyaalo esyo, ohutulira elalira hu lwaaho lwa Misiri emwaalo, ohwoolera elalira hu Hamati Paasi esiri emukulu, hu banyale ohuleeta Esanduuku ly'Endagaano elyo ohulitusa mu Kiriati Yearimu ohulileeta mu Yerusalemu.

⁶ Daudi alala neende abaandu boosi bachia nae eyiri esiko sya Bbala, esyeekesa, Kiriati Yearimu, mu situundu sy'esyaalo sya Buyudaaya, ohutusayo Esanduuku ly'Endagaano ya Nasaae elyo, eliriho eliita ly'Omwaami nilyeehaswa aakulu hu bakerubbi.

⁷ Batusa mu daala lya Abbinadabbu Esanduuku ly'Endagaano mani nibalita hu sigaari esiyaaha. Wusa neende Ahio nibo abali nibafuka esigaari esyo,

⁸ Daudi nae alala neende abaandu boosi abadoong'ereyo bali nibahina amahina neende amaani kaabwe koosi, ohwiisa oluyaali mu Nasaae. Abeene beembaanga enyembo haandi niboobba amaduungu, obuhana, eng'oma, nyaangili, neende eturumbete.

⁹ Nibali mbwe huboola hu lwaanyi lw'ohuhubbakirwaho lwa Kidoni, endaawu chali nichihweesa esigaari esyo cheegumula, mani Wusa yeeyeneeresa yaadiira hu Sanduuku ly'Endagaano elyo.

¹⁰ Esiha syeene esyo, Omwaami yanyoolerera Wusa muno mani yaamwiitirao hulw'ohwegeeng'a hu Sanduuku elyo. Yafwiira abweene ao mu moni wa Nasaae mweene,

¹¹ mani abuundu bweene ao yaalaangwa ati Peresi Wusa ohwoola buti. Daudi yanyoolera muno olwohuba Omwaami yali naasaandiisye Wusa mu tima lyae.

¹² Daudi yeemao yaatya Nasaae muno, mani n'aboola ati, “Bulaanu ese ndanyala endye ohuyira Esanduuku ly'Endagaano ewaange bulaanu buti?”

¹³ Daudi sakira yahaya ohuchiana nalyo, mani yaachia mu Yerusalemu. Daudi yeemao yaaleha Esanduuku ly'Endagaano elyomu nyuumba y'omusaacha wuundi olaangwa ati Obbedi-Edomu, owali omwiibulanwa womu siko sihuluundu sya Gaati.

¹⁴ Esanduuku ly'Endagaano lyaba mu nyuumba y'Obbedi Edomu ohumala embaka y'emyoosi kidatu, mani Omwaami naaberesa edaala lya Obbedi-Edomu ehabi, alala neende buli siindu syoosi si yali nasyo.