1 Ebyomubiha 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ab'enono ya Bbenjamini abataangira ohuba abaloondi ba Daudi

¹ Daudi yali amenyere Sikilaagi, yi yeeruhira ohweeyiba hu Omutuki Saulo. Abaandu baangi beecha yi yali ohumweyambaaniaho, bano bali abaandu bamanyirifu haandi ab'amaye beesikwa.

² Bali ab'enono ya Bbenjamini, yi Saulo yesi yali naatulamo. Bali nibanyala ohulasa obusaale neende ohulasa amakina k'esimulo bulai nibehoonyera omuhono muluungi kata neende omuhono mukaada.

³ Omuhoongo waabwe yali Ahieseeri, oloondaho yali Yoasi, boombi bali abaana ba Semaa wa Gibbeya. Ab'amaye bano nibo: Yesieli neende Peleeti abaana ba Asumafeeti; Bberaka, neende Yehu wa Anatooti,

⁴ Yisumaya wa Gibbeoni, owali ow'amaye omanyihaane haandi mulala hu beemirisi ba “Amahumi Kadatu.” Yeremia, Yahasieli, Yohanani, Yosabbaadi wa Gedera,

⁵ Elusaayi, Yerimooti, Bbealia, Semaria, Sefatia Omuharifi;

⁶ Elikana, Yisia, Asareeli, Yoweseeri, neende Yasobeyamu, ab'enono ya Koora.

⁷ Yoweela neende Sebbadia, abaana ba Yerohaamu wa Gedoori.

Abaloondi ba Daudi ohutula hu nono ya Gaadi

⁸ Kano niko ameeta k'abasaacha bali bamanyihana haandi abali neende obumanyirifu mu maye ohutula mu nono ya Gaadi abeyambaania hu balwaani ba Daudi niyaba naali mu lukoba lwomusiparara. Bali ab'amaye bamanyirifu mu hulwaana ebiita, abamanyire ohulwaania engabo neende amafumo, abatingaala n'obwaalaba koti edalang'i haandi abayulayulanu koti emboongo yohu lugulu. Nibo bano koti lu baloondehana:

⁹ Eseri, Obbadia, Eliabbu,

¹⁰ Misimana, Yeremia,

¹¹ Atai, Elieli,

¹² Yohanani, Elisabbadi,

¹³ Yeremia n'ali oweehumi, Makibbanai.

¹⁴ Abaandi hu basaacha bano abalichiingi abahoongo b'eye ly'abaandu elifu ndala, nae abaandi balichiingi abahoongo b'eye diidi ly'abaandu emia ndala.

¹⁵ Mani mu mwoosi kutaangira kw'omwaaka mulala, esiha si Mwaalo kwa Yorodaani kwali nikufuuchire amaachi kakwo, baambuha omwaalo okwo, mani nibeerusa basalaania abaandu balichiingi nibamenya mu hooho, ebukwe neende emuumbo w'omwaalo okwo.

Abaloondi ba Daudi ohutula mu nono ya Bbenjamini neende mu nono ya Yuda

¹⁶ Ao mani abaandi hu bomu nono ya Bbenjamini neende eya Yuda beecha mu lukoba yi Daudi yali.

¹⁷ Daudi yatulayo ohubabukaanira mani n'aboola ati, “Nikali mbwe muli ohwiicha koti abeecha ohuhoonyaho, mbasaangaliire ano. Mutweyambaanieho! Nae nikali mbwe muli ohudaha ohundyaamo olukwe eyiri abasuku baange, kata neende nimbeere nitaabaholaho esiindu syoosi esibanyaala, Nasaae wa bakuuka yeefwe niye omanyire, mani omweene niye ochia ohubasaandya.”

¹⁸ Mani Mwooyo wa Nasaae yeecha yaniina mulala hu baandu beene abo, olaangwa Amasai, luunyuma oweecha yaaba omuhoongo wa “Amahumi Kadatu”, bala mani yahuumula lukali ati, “Ewe Daudi, omwaana wa Yese, efwe huli abao beene! Ehabi yibe eyiri ewe neende eyiri abo boosi abahuhoonya! Nasaae ali hu lwaande lwao.” Daudi yeemao yabasangaalira, yaabahola ohuba abahoongo mu ye lyae.

Abaloondi ba Daudi ohutula mu nono ya Manaase

¹⁹ Abanamaye baandi ohutula mu nono ya Manaase bosi baheengao ohuchia hu lwaande lwa Daudi niyali naali ohuhuumba naali alala neende Abafilisiti nibachia ohulwaania Omutuki Saulo. Mubwadyeeri bweene haba siyahoonyaho Abafilisiti daawe, olwohuba abatuki baabwe bali nibatya muno bati anyala ohuchia yaabalyaamo olukwe eyiri Saulo omwaami wae muhale, mani baanguya ohumukobosa mu Sikilaagi.

²⁰ Bano nibo abali abanamaye ohutula mu nono ya Manaase abatula baachia hu lwaande lwa Daudi niyali naakobola: Adina, Yosabbadi, Yediayeli, Mikaeli, Yosabbadi, Elihu, neende Siletai. Mu nono ya Manaase balimo neende emikaanda kihulirwa eky'abasaacha elifu ndala buli kutula.

²¹ Bahoonya Daudi ohulwaania emikaanda ch'abaandu bayayaanga ebiindu, olwohuba boosi bali nibali abanamaye bahunuufu. Luunyuma, babechaanga abahoongo mu ye lya Yisiraeli.

²² Aambi buli ludaalo, abasaacha bayaaha beyambanianga hu maye ka Daudi, mani eye lyae lyaba ehoongo muno.

Emikaanda ky'abamaye ba Daudi

²³ Buno nibwo obuungi bw'emikaanda ky'amaye ekyeecha eyiri Daudi naali mu Hebburoni, ohwekobosera obwaami bwa Saulo ohuloondehana neende emboosi y'Omwaami koti lu yali.

²⁴ Abasaacha ohutula mu nono ya Yuda abakiingaanga engabo neende amafumo bali elifu chisaasaba neende emia chitaanu-na-chidatu (6,800) abetekeehe ohulwaana.

²⁵ Abomu nono ya Simeoni, abasaacha balwaani bahunuufu muno, abali neende obuluwo bw'ebiita, bali elifu chitaanu-na-chibiri neende emia ndala (7,100).

²⁶ Ohutula mu nono ya Leefi, bali elifu chine neende emia chisaasaba (4,600).

²⁷ Omulaangira Yehoyada, otula mu nyuumba ya Arooni, haandi neende abaandi elifu chidatu neende emia chitaanu-na-chibiri (3,700).

²⁸ Sadoki, omusaacha muraaga oweechula esinani, alala neende abasaacha baandi amahumi kabiri na babiri abeemeresi ohutula mu daala lya simwaane lyeene.

²⁹ Ohutula mu nono ya Bbenjamini, abali abanaluyia ba Saulo, bali elifu chidatu (3,000), olwohuba mu biha ebyo abahira obuungi mu b'enono eyo bali basyomiriire ohwiisa oluyaali mu b'enyuumba ya Saulo.

³⁰ Ohutula mu nono ya Efuraimu bali elifu amahumi kabiri neende emia chitaanu-na-chidatu (20,800), abasaacha bahunuufu ab'esinani, abasaacha abamanyihana muno mu madaala ka basaabwe.

³¹ Ohutula mu situundu sy'enono ya Manaase, bali elifu ehumi neende chitaanu-na-chidatu, (18,000) abadoolwaanga maloondehania beeche banyale ohwiihasa Daudi abe Omutuki.

³² Ohutula mu nono ya Yisakari, abasaacha bali neende obumanyirifu bw'ohumanya embeera y'obwiire, neende ohumanya ebiindu bi Yisiraeli yihoyere ohuhola, abaami emia chibiri (200), alala neende ab'enono chaabwe boosi abalichiingi mu bunyala bwaabwe.

³³ Ohutula mu nono ya Sebbuluuni, bali elifu amahumi kataanu (50,000), abalwaani bajiing'u, abefwaalira elalira ohwetekehera ohulwaana eye, alala neende ebilwaaniso by'ebiita, ohuhoonya Daudi neende omwooyo mulala.

³⁴ Ohutula mu nono ya Nafutaali, bali abahoongo b'amaye elifu ndala (1,000), abali neende abanamaye elifu amahumi kadatu neende chitaanu-na-chibiri (37,000), abali neende engabo neende amafumo.

³⁵ Ohutula mu nono ya Abadaani, bali abasaacha elifu amahumi kabiri neende chitaanu-na-chidatu neende emia chisaasaba (28,600) abeetekefu ohulwaana eye.

³⁶ Ohutula mu nono ya Aseri bali abalwaani bajiing'u elifu amahumi kane (40,000) abeetekefu ohulwaana ebiita.

³⁷ Ohutula mu nono ya Rubbeeni neende Gaadi neende esituundu sy'enono ya Manaase ohutula engereha wa Yorodaani, bali elifu emia ndala neende amahumi kabiri (120,000), abasaacha abafwaalire ebilwaaniso byoosi ebyehoonyerwa mu biita.

³⁸ Abanamaye bano boosi, abali abeetekefu ohulwaana ebiita, baachia mu Hebburoni, nibamalire ohuheengao ohwiihasa Daudi ohuba omutuki wa Yisiraeli yoosi. Abaandu boosi aba Yisiraeli bali neende echoomo lala, haandi nibali neende esichiiririrwa silala.

³⁹ Bachia bamala endaalo chidatu nibali ebweene eyo alala neende Daudi, nibalya haandi nibang'wa ebyo byoosi ebyali nibitekeehwe neende abeeho baabwe.

⁴⁰ Ohutulira elalira eyale mu nono ch'emukulu echia Yisakari, Sebbuluuni, neende Nafutaali, abaandu boosi bechaanga nibaleeta esuhiri njere, engamia, esuhiri njere, neende endaawu choosi nichikiingire ebyohulya koti: obusye, enduli, ochiooga, efiini, alala neende amafuta k'enaasi. Haandi baleetaanga eng'oombe, neende amakoondi eby'ohwiita biriibwe sa. Bino byali esilolero sy'esangaalo liingi li bali nibawulira mu syaalo syoosi.