1 Ebyomubiha 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi yeehaswa ohuba omutuki wa Yisiraeli neende Buyudaaya

¹ Abaisiraeli boosi bebuusa alala mani nibeecha eyiri Daudi mu Hebburoni nibamuboolera bati, “Efwe huli abeeho bao beene, ab'amabaanga kao keene.

² Mu ndaalo cha hale, Saulo niyali n'asisiiri omutuki weefwe, ewe niiwe owemirira abaandu ba Yisiraeli mu biita. Omwaami Nasaae wao yahusuubisa ati ewe niiwe ochia ohwiimirira abaandu bae haandi obe omwimirisi waabwe.”

³ Mani abeemirisi boosi aba Yisiraeli beecha eyiri Omutuki Daudi mu Hebburoni. Daudi naahola nabo endagaano mu moni w'Omwaami, mani nibamubaha amafuta, nibamwiihasa ohuba omutuki wa Yisiraeli, koti lu Omwaami yali n'asuubise naabitira mu Samueli.

⁴ Omutuki Daudi, alala neende Abaisiraeli boosi baachia mani nibaseeta esiko sya Yerusalemu. Endaalo echo esiko esyo syali nisilaangwa siti Yebbusi. Abayebbusi abali abeebulanwa beene esyaalo esyo, nibo abali nibasiisimenyeremo.

⁵ Abayebbusi baboolera Daudi bati, “Haba soochia ohwiingira mu siko esyo kata nabudiidi daawe.” Nae Daudi naawaamba esiko sya Siyooni, mani nisyeehola Yerusalemu.

⁶ Daudi yaboola ati, “Omusaacha onataangira ohwiita Omuyebbusi yeesi, niye ochia ohuba omuhoongo w'eye lino!” Yoabbu, yi ng'ina niye Seruya, yeecha niyeemirira ohuseeta ohwo, niyeehola omuhoongo w'eye.

⁷ Nae olwohuba Daudi yaheengao ohuchia ohumenya mu siko esyo, mani syalaangwa siti “Yerusalemu.”

⁸ Daudi yoombaha buyaaha esiko esyo, ohuchaakira abuundu waali niweechuswamo eloba olwohweliinda ali ebukwe w'esigulu. Yoabbu mani niyoombaha buyaaha ebituundu bidoong'ereyo eby'esiko esyo.

⁹ Daudi yemeeda-bwemeeda ohuba ow'amaani, olwohuba Omwaami w'Obunyala bwoosi yali nae.

Ab'amaye b'efuma ba Daudi

¹⁰ Luno nilwo olukalala lw'abamaye ba Daudi ab'efuma. Alala neende Abaisiraeli baandi, bamuhoonya ohuba omutuki, koti lu Omwaami yali niyasuubisa, haandi baliinda obwaami nibuli obw'amaani.

¹¹ Otaangira yali Yasobbeamu ow'enono ya Hakimooni, omwiimirisi w'abaliindi “Badatu.” Yalwaania abasaacha emia chidatu (300) neende efumo, mani naabeeta boosi mu biita ehabi lala.

¹² Oloondaho mu b'amaani “Badatu” niye Eliasaari omwaana wa Doodo, ow'enono ya Ahoohi.

¹³ Yali hu lwaande lwa Daudi n'alwaania Abafilisiti Pasidamimu. Yali mu mukuunda kw'amabere masuungu Abaisiraeli nibachaaka ohwiiruha nibatula mu biita.

¹⁴ Eliasaari alala neende abasaacha ba yali nabo nibeema akatikaati w'omukuunda okwo ohulwaania Abafilisiti. Omwaami yamuberesa ohuyiingira hw'amaani muno.

¹⁵ Ludaalo luundi, ab'amaye badatu hu bahuluundu amahumi kadatu abahunuufu, bachia abuundu yi Daudi yali naamenyere aambi neende Eng'uungu Adulaami, omukaanda kw'Abafilisiti nikwoombaahe ekaambi mu Hooho Refaimu.

¹⁶ Esiha esyo, Daudi yali hu sy'olukoba, nae omukaanda kw'Abafilisiti kwali nikwamenya mu Bbetilehemu.

¹⁷ Daudi yekoomba ohuba engo mani n'aboola ati, “Ndekoomba muno endi omuundu yeesi naaba naanyala ohundeeteraho amaachi k'ohung'wa ohutula mu sulo yiri aambi neende Bbetilehemu!”

¹⁸ Ab'amaye b'amaani badatu bala benyiira mani nibabita mu kaambi y'Abafilisiti, nibadaya amaachi ohutula mu sulo eyo, mani nibakaleetera Daudi. Nae naahaya ohukang'wa daawe; ohutusaho, yakachuha aasi ohuba koti esiyaanwa eyiri Omwaami,

¹⁹ mani n'aboola ati, “Ese haba sinyala ohung'wa amaachi kano daawe! Sichia ohuba koti ndahang'wa amabaanga k'abasaacha bano abali nibeweereyo obulamu bwaabwe ohukadaya!” Mani naahayira elalira ohung'waho hu maachi kano. Bino nibyo ebyali ebiholwa by'esinani eby'abasaacha b'amaye badatu bi bahola.

²⁰ Abbisai mwanaang'ina Yoabbu yali omwiimirisi w'Abamanyihaane Amahumi Kadatu. Abbisai yabukula efumo mani naalwaania abasaacha emia chidatu (300), naabeeta boosi, mani naamanyihana muno mu “Amahumi Kadatu.”

²¹ Abbisai niye owali naahiramo ohumanyihana mu “Amahumi Kadatu” mani naaba omwiimirisi waabwe, nae haba siyali niyamanyihana koti “Badatu bala”.

²² Bbenaya omwaana wa Yehoyada ohutula Kabbuseeli yesi yali omunamaye owamanyihana; yahola ebiindu ebiingi muno eby'esinani. Yeeta Abamoabbu babiri ab'amaani muno. Ludaalo luundi yeengira mu buko hu ludaalo lw'omunyiti muno mani niyeeta edalang'i.

²³ Haandi yeeta Omumisiri, owali omusaacha muleeyi muno ohira emiita chibiri, owali naalwaania okufumo okuhoongo muno. Bbenaya yamuseeta naali neende endabuhi, naasihula okufumo okwo ohutula mu mahono k'Omumisiri oyo, mani naamwiitira okufumo kweene okwo.

²⁴ Ebyo nibyo obiholwa by'esinani bi Bbenaya, mulala hu “Amahumi Kadatu” yahola.

²⁵ Yali ow'oluyaali mu “Amahumi Kadatu”, nae haba siyali naahira obumanyirifu koti “Badatu bala”. Daudi yamuhola ohuba omuhuluundu w'abaliindi bae.

²⁶ Abasaacha baandi ab'amaani mu bomu ye lyae nibo bano: Asaheeli mwanaang'ina Yoabbu, Elihanaani omwaana wa Doodo wa Bbetilehemu,

²⁷ Samooti wa Harodi, Helesi wa Peleti,

²⁸ Yira omwaana wa Yikesi wa Tekoa, Abbieseeri wa Anatooti,

²⁹ Sibbekai wa Husa, Yilai wa Ahoohi,

³⁰ Maharai wa Netofa, Heledi omwaana wa Bbaana wa Netofa,

³¹ Yitai omwaana wa Ribbai wa Gibbeya esya Bbenjamini, Bbenaya wa Piratoni,

³² Hurai wa mu bihooho biri aambi neende Gaasi, Abbieli wa Aribba,

³³ Asumafeeti wa Bbaharumu, Eliahibba wa Saalibbooni,

³⁴ Haseemu wa Gisooni, Yonatani omwaana wa Sagi Omuharaari,

³⁵ Ahiamu omwaana wa Sakari wa Harari, Elifaali omwaana wa Wuuri,

³⁶ Hefeeri Omukeraati, Ahija wa Pelooni,

³⁷ Hesiro wa Karimeeli, Naarai omwaana wa Esibbai,

³⁸ Yoeli mwanaang'ina Natani, Mibiha omwaana wa Hagiri,

³⁹ Seleki Omwaamooni, Nahurai wa Bberooti, owakiingaanga ebilwaaniso bya Yoabbu, omwaana wa Seruya,

⁴⁰ Yira wa Yituri, Garebbu Omuyitiri,

⁴¹ Wuria Omuhiiti, Sabbadi omwaana wa Ahulayi,

⁴² Adina omwaana wa Siisa Omurubbeeni, owali omwiimirisi ow'Abarubbeeni, alala neende omukaanda kw'abaliindi amahumi kadatu.

⁴³ Hanani omwaana wa Maaka, neende Yosafaati Omumitini.

⁴⁴ Wusia Omwaasitera, Sama neende Yeyieli abaana ba Hotamu omwaroweeri.

⁴⁵ Yediyaeli omwaana wa Simiri, neende Yoha mwanaang'ina, Omutiiti.

⁴⁶ Elieli Omuhafiiti, neende Yeribbai, neende Yosafia, abaana ba Elinaamu, neende Yitima wa Moabbu.

⁴⁷ Elieli, neende Obbedi, neende Yasieli Omumesobbiti.