1 Abatuki 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae abonehera Solomooni haandi

¹ Luunyuma lw'Omutuki Solomooni ohumala ohwoombaha Enyuumba ya Nasaae, edooho, neende buli siindu siindi syoosi si yadaha ohwoombaha,

² Omwaami haandi yeecha yaamubonehera, koti lu yali ni yaholeraho mu Gibbeoni.

³ Mani Omwaami yaamuboolera ati, “Ese mbano mbuliire ohusaba hwao. Mani haandabye Enyuumba ya Nasaae yino yi woombahe ohuba abuundu yiinjia ohwiinamirwaangamo endaalo choosi pe. Njia ohusilambuulaanga, haandi neende ohusirindaanga ebiha byoosi.”

⁴ Nooba noochia ohuuhalaabaniraanga neende obweesikwa neende oluyaali, koti sa lu Daudi lataao yaholaanga, haandi nikali mbwe ochia ohwooseresaanga abweene amalako kaange haandi neende buli siindu syoosi sindahulagiraanga,

⁵ syeesi mba njia ohwooseresaanga esisuubise sindaholera Daudi lataao, koti lu ndamuboolera endi Yisiraeli sichia ohutukwaanga neende ab'olwiibulo lwae boong'ene.

⁶ Nae nikali mbwe ewe kata ab'olwiibulo lwao muchia ohulehera ohunondaanga, nimuchia ohuhaya ohwooseresaanga amalako neende ebilagiro bi ndahuberesa, mani mwachaaka ohwiinamiraanga banasaae baandi,

⁷ ese njia ohutusao Yisiraeli abaandu baange ohutula mu syaalo siimba nindababeresa. Haandi mba njia ohujwaang'a Enyuumba ya Nasaae yino yi malire ohulabya ohuba abuundu yihoyere ohwiinamirwaangamo. Abaandu bali buli abuundu woosi bachia ohunyala ohuchalaasa Yisiraeli mani bamale basidiire neende esijaaro.

⁸ Enyuumba ya Nasaae yino yichia ohuba esituuli sy'ebikoongolyo, haandi buli muundu ochia ohubitiraangao achia ohwesinduhaanga mani awumumala sa. Bachia ohwetebaanga bati, “Siina syeene esyakera Omwaami yaahola esiindu sino siti hu syaalo sino haandi neende hu Nyuumba ya Nasaae yino?”

⁹ Nae haandi abaandu baandi bachia ohukobolaangamo bati, “Siri mbwe abaandu bano bajwaang'a Omwaami Nasaae waabwe, owatusa bakuuka yaabwe mu Misiri. Bakaluuhania obuloonga bwaabwe baabuta hu banasaae baandi haandi nibamala nibabeenamiraanga. Mani esyo nisyo esyakera Omwaami yaabaleetaho amasira kano.”

Efukiirisania ya Solomooni neende Hiramu

¹⁰ Solomooni yamala emyaaka amahumi kabiri amalaamba niyoombaha Enyuumba ya Nasaae neende edooho lyae.

¹¹ Omutuki Hiramu owa Tiire yamuba emiseengese kyoosi alala neende emipaini kyoosi ekyali nikyeenyehana, haandi neende esaabbu yoosi yi yali naadaha hulw'emirimo kino kyoosi. Mani luunyuma lwakyo ohuwa, Omutuki Solomooni yaba Hiramu ebiko amahumi kabiri ebyali mu syaalo sya Galilaaya

¹² Hiramu mani yaachia ati anyale ohubibonaho, nae haba sibyamusangaasa daawe.

¹³ Mani yaboolera Solomooni ati, “Hane bino nibyo, ewe mwaana weefwe, nibyo sa ebiko bi wumbereese!” Mani hulw'esifune syeene sino, ebiko ebyo byoosi byalaangwa mbwe Kabbuuli.

¹⁴ Hiramu yali niyayirira Solomooni esaabbu eyoola ekiloguraamu elifu chine (4,000).

Ebiindu biindi bi Solomooni yooseresa

¹⁵ Mani Omutuki Solomooni yali niyehoonyera abahalaabani bayiike sa ohwoomba ha Enyuumba ya Nasaae, haandi neende edooho, ohwiichusamo eloba lyali hu lwaande lw'ebukwe w'esiko esyo, ohunyala ohwoomba esida sy'esiko esyo. Haandi yali niyehoonyera elyeene elyo ohwoombaha ebiko bilaangwa mbwe, Hasoori, Megido, neende Geseri.

¹⁶ (Omutuki wa Misiri yali niyaseetaho Geseri mani niyanyala ohusiyaamba, haandi neende ohwiita abamenyi basyo neende ohusaamba esiko esyo syoosi. Yali yasiberesa omuhaana wae koti esiyaanwa sy'obugole bwae koti lu yali n'adeehera Solomooni,

¹⁷ mani Solomooni niye owali nasyoombaha.) Mani Solomooni niyehoonyera abahalaabani bayiike yeecha yaanyala ohwoombaha buyaaha, Bbeeti Horooni Esy'emwaalo,

¹⁸ Bbalati, Tamari ebyali mu sichiimi sya Yuda,

¹⁹ ebiko byali nibyabiihwamo ebiindu byae by'ohwehoonyera, ebiko byali ebirimo efaraasi chae, haandi neende ebigaari bilwaanirwaho, haandi neende buli siindu siindi syoosi si yali naadaha ohwoombahira Yerusalemu, mu Lebbanooni, neende buli abuundu woosi mu bwaami bwae.

²⁰ Abaandu boosi abali nibadoong'ao hu Abaamoori, Abahiiti, Abaperisi, Abahiifi, neende Abaebbusi, abataali abanaluyia b'Abaisiraeli,

²¹ abeechuhulu baabwe abadoong'ao mu syaalo omwo, b'abaandu b'Abaisiraeli batanyala ohusihirisira elalira, nibo ba Solomooni yali niyaholamo omukaanda kw'bawaambe bayiike, nilwo lu basisiiri ohwoola buti.

²² Solomooni haba siyaholaangaho Abaisiraeli ohuba abawaambe daawe; bano baholaanga sa koti abalwaani bae, abahunuufu, abahoongo, abahoongo b'ebigaari bilwaani, haandi neende abasaacha balwaani b'efaraasi.

²³ Yaliyo abahoongo emia chitaanu neende amahumi kataanu (550) abali nibahulira abahalaabani bayiike bano, abali abahalaabani bayiike abaholaanga emirimo kya Solomooni ekikabuhaane eky'ohwoombaha.

²⁴ Solomooni yeechusamo eloba hu lwaande lw'ebukwe lw'esiko esyo, n'aloonda hu muhasi wae, owali omuhaana w'omutuki wa Misiri, haandi owali niyamala ohuwuuya ohutula mu Siko sya Daudi, niyachia mu dooho li Solomooni yali niyamwoombahira.

²⁵ Amahabi kadatu amalaamba buli mwaaka, Solomooni wuno yayanaangayo ebiyaanwa bisaambwa byaawa, haandi neende eby'ohukobola alala, hu alutaari yi yoombahira Omwaami. Haandi yaniooheseraanga Omwaami obubbaani. Mani atyo yeecha yaamala ohwoombaha Enyuumba ya Nasaae.

²⁶ Omutuki Solomooni wuno, haandi yaanyala ohwoombaha esidiiyiha sy'emeeri echali mu Esionigebberi, esiri aambi neende Eloti, hu lwaasi lwa Galufu.

²⁷ Omutuki Hiramu wuno yesi yanyala ohutuma abasaacha bamanyirifu muno ohutula mu ye lyae ohwiicha ohuhalaabanira alala neende abasaacha ba Solomooni.

²⁸ Banyala ohusyaabala ohwoola lu boola mu syaalo sya Ofiri, mani nibanyala ohuleetera Solomooni esaabbu yihira ekiloguraamu elifu ehumi-na-chine (14,000).