1 Abatuki 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Edooho lya Solomooni

¹ Haandi Solomooni yanyala omweene ohweeyoombahira edooho, mani lyaamuyirira emyaaka ehumi neende kidatu.

² Yoombaha enyuumba ohutula mu miseengese ky'esichaha sya Lebbanooni; obulambaafu bwalyo bwali emiita amahumi kane neende chine; nae obubaambali bwayo bwali emiita amahumi kabiri neende chibiri; nae obuleeyi yali emiita ehumi neende chidatu neende otutoonyese tubiri nihaandi yali niyoombahwa hu nyiriri chidatu ech'emisiiro ky'emiseengese, emiguulo ky'emiseengese nikyediirire hu misiiro ekyo.

³ Haandi yali niyafuunihwaho neende emiseengese kiindi aakulu w'ebiseenge byali hu misiiro amahumi kane-na-kitaanu, ehumi-na-kitaanu ekiri mu lunyiriri.

⁴ Hu buli sida sy'ohunyaande chibiri, yalichiingiyo enyiriri chibiri ech'amadirisa.

⁵ Enjiki neende amadirisa byalichiingi neende efureemu y'esoonda chidatu, nae enyiriri chidatu ech'amadirisa hu buli sida yatingalaanga mu lunyiriri lwaasye.

⁶ Enyuumba y'Enyiriri yali emiita amahumi kabiri neende chibiri obulambaafu, nae emiita ehumi-na-chidatu neende otutoonyese tutaanu obubaambali. Yaliho neende ahaseenge habwiiheho, ahasiirwa neende enyiriri.

⁷ Esiseenge sy'Esisaala Sy'obutuki, haandi esyali nisilaangwa mbwe Enyuumba Yoohukaya, yi Solomooni yaheengeraangamo emisaango, yali neende embaao enyerere ech'emiseengese ohutulira elalira hu bweeru ohwoolera elalira hu ndekeyi.

⁸ Obweyaango bwa Solomooni, mu lwaanyi lw'emukoongo w'Enyuumba Yoohukaya, bwali bwaholwa koti enyuumba chiindi chira. Haandi yoombahira omuhasi wae enyuumba chiindi chifwaana chityo, owali omuhaana w'omutuki wa Misiri.

⁹ Ebyoombahe bino byoosi alala neende esiina sihunuufu byaholwa mu makina manyirifu ohutulira elalira hu lwaalo ohwoolera elalira hu ndekeyi. Amakina kano kabaachirwaanga mu siroombe, mani kabaachwa mu sikero, enyaande chaako chomuukati neende echerwaanyi chali chahehetwa neende emisyameeno.

¹⁰ Olwaalo lwali lwaholwa mu mikina mihoongo muno, ekyabaachirwa mu siroombe, ekiindi ekyoola emiita chidatu neende otutoonyese tutaanu obulambaafu, nae ekiindi nikyoola emiita chine obulambaafu.

¹¹ Aakulu wako hwaliho amakina kaandi, akaheengwa mu sikero, haandi neende emiguulo ky'emiseengese.

¹² Olwaanyi lwomu dooho, olwaanyi lwomuukati bweene womu Nyuumba ya Nasaae, haandi neende esiseenge syohumulyaango okw'Enyuumba ya Nasaae yali neende ebida ebiriho emiguulo ky'emiseengese ekitaakerehaaneho hu buli makina kakerehaane kadatu.

Omulimo kwa Huramu

¹³ Omutuki Solomooni yeecha yalaanga omusaacha wuundi olaangwa mbwe Huramu, omubaachi owali niyamenya mu siko sya Tiire, owali owakesiya muno mu hwitaanya esibya silaangwa mbwe bburoosi.

¹⁴ Laatang'ene owali nataaliwo omulamu, yali otula mu Tiire, haandi yesi yali yakesiyala muno mu bwitaanyi bw'esibya sya bburoosi, ng'ina yali naatula mu nono ya Nafutaali. Huramu yali omubaasi muno haandi omumanyirifu muno mu bubaachi. Yakanya omulaanga kwa Solomooni ohuba ohuhulira omulimo kwoosi bburoosi kwoosi.

Emisiiro kya Bburoosi

¹⁵ Huramu yetaanya emisiiro kibiri ekya bburoosi buli kutula nga kuli emiita chitaanu-na-chidatu obuleeyi neende emiita chitaanu neende otutoonyese tudatu ohwebodoohania, mani naamala nakyeemesa mu mulyaango kw'Enyuumba ya Nasaae.

¹⁶ Haandi yahola ebifuuniho bibiri ebya bburoosi, buli situla nga siri emiita chibiri neende otutoonyese tubiri obuleeyi ohugeeng'wa aakulu w'emisiiro.

¹⁷ Aakulu wa buli siiro yali niyasaatwa neende enduha y'enyolo chibiri echibiting'aanemo,

¹⁸ haandi enyiriri chibiri echa pomeguranaate.

¹⁹ Ebifuuniho byalichiingi neende emera koti ebimuli by'omumwaalo, eby'emiita ndala neende otutoonyese tutaanu-na-tudatu obuleeyi.

²⁰ Mani byali byageeng'wa hu situundu syehuyungirisa esyali aakulu w'emera yeminyororo. Yaliyo pomeguranaate emia chibiri (200) mu nyiriri chibiri ohwebodoohania buli sifuuniho.

²¹ Huramu yata emisiiro kibiri kino mu moni w'omulyaango kw'Enyuumba ya Nasaae, okwali hu lwaande lw'emwaalo kwalaangwa mbwe Yachiini, nae okwali emukulu kwalaangwa mbwe Bboasi.

²² Ebifuuniho byali nibifwaana koti ebimuli byomumwaalo byalichiingi aakulu w'emisiiro. Mani omulimo okwohumisiiro kwaweera ao.

Epipa lya Bburoosi

²³ Huramu yeecha yaahola epipa lyeebodoohania elyali elya bburoosi, emiita chibiri neende otutoonyese tubiri ohwiiha aasi, emiita chine neende otutoonyese tune ohuhalakania akatikaati, haandi emiita ehumi-na-chidatu neende otutoonyese tubiri ohwebodoohania.

²⁴ Ohwebodoohania erwaanyi w'olunikaanika lw'epipa yaliyo enyiriri chibiri emisisiitale kya bburoosi, ekyabaandirwaho alala neende omubiri mulala okw'epipa lyoosi.

²⁵ Epipa lino lyali lyeehala hu mikoongo ky'esurusi cha bburoosi ehumi-na-chibiri echatingalaanga erwaanyi, buli chidatu nichewuunjire ebuleka bulala.

²⁶ Omubiri kw'epipa kwoosi kwali emilimiita amahumi kataanu-na-kabiri neende chitaanu obukinu. Olunikaanika lwalyo lwafwaanana neende olw'esikoombe, nilwefuumbira erwaanyi koti amasaafu k'esimuli sy'omumwaalo. Epipa lino lyali nilinyala ohukiinga elita elifu amahumi kane (40,000) amalaamba.

Ebigaari bya Bburoosi

²⁷ Huramu haandi yahola ebigaari bya bburoosi ehumi; buli situla syalichiingi esy'emiita ndala neende otutoonyese tutaanu-na-tudatu obulambaafu, emiita ndala neende otutoonyese tutaanu-na-tudatu obubaambali, haandi emiita ndala neende otutoonyese tudatu (1.3) obuleeyi.

²⁸ Byali byaholwa mu bibbaati byaakanilira enyaande choosi, ebyeengiswa mu fureemu,

²⁹ neende ebifwaanani by'edalang'i, esurusi neende abakerubbi nibiri hu nyaande echio; nae hu fureemu, aakulu neende mu lwaalo w'edalang'i neende esurusi, yaliyo ebifwaanani ebyehuyuungirisa.

³⁰ Buli sigaari syalichiingi neende emipiira neende omusiruunga kwambaania emikuruduumu ebya bburoosi. Hu soonda chine hwalichiingiho ebiteka ekaraayi ebya bburoosi; ebiteka bino byalichiingiho ebifwaanani ebyehuyungirisa.

³¹ Yaliyo efureemu yehuyungirisa aakulu w'ekarayi. Yasiraanga aakulu eseetimiita amahumi kane neende chitaanu ohutula aakulu ohwoola hu sigaari, haandi eseetimiita ehumi-na-chitaanu neende chidatu 18 ohwiingira mu bweene omwo.

³² Emikuruduumu kyalichiingi eseetimiita amahumi kasaasaba neende chisaasaba obuleeyi; kyalichiingi mu lwaalo w'enyaande, nae emisiruunga kyalichiingi eky'esibya silala neende ebigaari.

³³ Emikuruduumu kyafwaananaanga neende eky'ebigaari by'efaraasi; emisiruunga kyakyo, enikaanika, ewaaya, neende ebyooto, byoosi byalichiingi ebya bburoosi.

³⁴ Yalichiingiyo ebisiira bine aasi w'esoonda cha buli sigaari, ebyalichiingi ebyomubiri mulala neende esigaari.

³⁵ Yalichiingiyo esiboya esya eseetimiita amahumi kabiri neende chibiri ohwehuyuungirisa aakulu wa buli sigaari; ebisiira byasyo neende enyaande byalichiingi eby'omubiri mulala neende esigaari syeene.

³⁶ Ebisiira neende enyaange byoosi byalichiingi nibyasaatwa neende ebifwaanani by'abakerubbi, edalang'i, neende emisaala ky'enaasi, buli yalichiingi obweyaango bu binyala ohuyeramo, neende ebifwaanani byehuyuungirisa nibibyebodoohanie.

³⁷ Yino mani niyo engeri yi bigaari bino byaholerwamo; byoosi byafwaananaanga sa, nibyaakanilira obuhoongo, haandi nibifwaana sa emera.

³⁸ Huramu haandi yaahola ekaraayi ehumi, buli yitula ey'esigaari silala. Buli karaayi yalichiingi emiita ndala neende otutoonyese tutaanu-na-tudatu (emiita ndala neende otutoonyese tutaanu-na-tudatu) ohuhalakania, mani yali niyinyala ohukiinga elita emia chitaanu-na-chidatu (800).

³⁹ Yageeng'a ebigaari bitaanu hu lwaande lw'emwaalo lw'Enyuumba ya Nasaae, nae ebiindi bitaanu bidoong'ereyo, hu lwaande lw'emukulu; yata epipa hu soonda y'olwaande lw'emwaalo y'ebukwe.

Ebinyirisa Enyuumba ya Nasaae mu bwiimbikiti

⁴⁰ Huramu haandi yahola neende endamu, ebitiiyo haandi neende ekaraayi. Mani Huramu yaanyala ohumala omulimo ku yaholera Omutuki Solomooni hu nyuumba y'Omwaami eyo,

⁴¹ emisiiro kibiri, ebbakuli chibiri ech'ebifuuniho byalichiingi aakulu w'emisiiro, haandi neende ebiindi bifuuniha hu bbakuli chibiri chira echebifuuniha ebyali aakulu w'emisiiro;

⁴² neende epomeguranaate emia chine (400) eby'ebiyambaania bibiri bira, enyiriri chibiri ech'epomeguranaate hu buli syongaania, ohufuuniha hu bbakuli chibiri chira, haandi neende ebibbaati ehumi ebiba hu byeemero;

⁴³ ebyeemero ehumi, neende ebibbaati ehumi ebiba hu byeemero ohwo;

⁴⁴ haandi neende enyaanja ndala, haandi neende elaawu ehumi-na-chibiri mu lwaalo lw'enyaanja.

⁴⁵ Nae bulaanu endamu, ebitiiyo, neende ekaraayi, ebiindu bino byoosi nibiri mu nyuumba y'Omwaami, bi Huramu yaholera Omutuki Solomooni, byali ebitula mu bburoosi enjubbe.

⁴⁶ Omutuki wuno yadaha syoosi siholerwe akatikaati wa Sukooti neende Saretaani, mu Hooho lya Yorodaani.

⁴⁷ Solomooni haba siyakera ebiindu bya bburoosi bino byoosi ohukerwa daawe, olwohuba ebiindu bino byoosi byali ebisaabi, mani obusito bwabyo haba sibwamanyihana daawe.

⁴⁸ Haandi Solomooni yadaha ebiindu byomunyuumba eby'esaabbu biholerwe Enyuumba ya Nasaae alutaari, emeesa y'emigaati kiyaaniirwe Nasaae,

⁴⁹ ebiteeni by'amataara ehumi ebyeema mu moni w'Abuunda Ahiramo Obwoolerefu, bitaanu hu lwaande lw'emwaalo, nae bitaanu biindi nabyo emukulu; ebimuli, amataara, neende magalo;

⁵⁰ ebikoombe, ebileengero by'amataara, ebbakuli, endiisi ch'obubbaani, neende ebihalaangiro bikiinga amaanda kaaduha; neende epata ch'enjiki ch'Abuundu Ahiramo Obwoolerefu, neende ech'enjiki ch'erwaanyi ech'Enyuumba ya Nasaae. Ebiindu byehoonyerwa bino byoosi byali byaholwa mu saabbu.

⁵¹ Omutuki Solomooni niyamala emirimo kyoosi ekidiira hu Nyuumba ya Nasaae, yata mu biseenge by'ebiihiro by'Enyuumba ya Nasaae ebiindu byoosi bi Daudi laatang'ene yali niyayaana eyiri Omwaami, efeesa, esaabbu, alala neende ebiindu byehoonyerwa biindi.