1 Abatuki 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Solomooni yoombaha Enyuumba ya Nasaae

¹ Emyaaka emia chine neende amahumi kataanu-na-kadatu (480) ohutula lu baandu ba Yisiraeli batula mu Misiri, mu mwaaka kwohune mu butuki bwa Solomooni mu Yisiraeli, mu mwoosi kw'ohubiri, omwoosi kwa Siifi, nimwo mu mutuki Solomooni yachaakira omulimo kw'ohwoombaha Enyuumba ya Nasaae.

² Mukati yali niyiri emiita amahumi kabiri neende chitaanu-na-chibiri obulambaafu, emiita chitaanu-na-chine obubaambali, neende emiita ehumi neende chidatu neende otutoonyese tutaanu buleeyi.

³ Esiseenge siri mu mulyaango syali emiita chine neende otutoonyese tutaanu ohwiiha aasi, neende emiita obubaambali, esyaaka neende esirimo alutaari.

⁴ Ebida by'Enyuumba ya Nasaae yino byalimo ameena, amanyerere erwaanyi, nae amabaambali mukati.

⁵ Hu bida by'erwaanyi, huundulo haandi neende emukoongo w'Enyuumba ya Nasaae yino engaasi y'egoroofa yoombahirwaho buli ngaasi nga yiri emiita chibiri neende otutoonyese tubiri ohuchia aakulu.

⁶ Buli siseenge mu buli goroofa syali emiita chibiri neende otutoonyese tubiri obubaambali, mu siseenge syaakati emiita chidatu neende ahatoonyese halala obubaambali. Esida sy'Enyuumba ya Nasaae hu buli goroofa syalichiingi esinyerere ohuhiraho hu goroofa yiri aasi wayo hu bulaanu ebiseenge bino binyale ohwiihala hu sida ataali ohudahisa emiguulo ohwoombahirwamo.

⁷ Amakina k'Enyuumba ya Nasaae yino yoombahirwa kali nikabaachirwa mu siroombe, hu yaabulao esiyoka syoosi esyaholwa neende enyuundo neende eyaywa, kata sa neende esiindu syehoonyerwa esy'esibya syoosi syaahaya ohuholwaho.

⁸ Omulyaango kwiingira mu goroofa eyaakama aasi bweene kwali hu lwaande lw'emwaalo lw'Enyuumba ya Nasaae, nikuliho engaasi yichia ena goroofa yohubiri neende eyohudatu.

⁹ Mani Omutuki Solomooni yeecha yaamaliirisa ohwoombaha Enyuumba ya Nasaae eyo. Yataamo esiikabula esirama neende obweeru esyaholwa mu miguulo ky'amaani neende embaao ch'emiseengese.

¹⁰ Mani esyoombahe sy'egoroofa chidatu sino, buli goroofa syalichiingi emiita chibiri otutoonyese tubiri obuleeyi, syoombahwa nisyegeeng'ere hu bida by'erwaanyi w'Enyuumba ya Nasaae eyo, nibyaambaniswa neende emiguulo ky'omuseengese.

¹¹ Omwaami yeecha yaboolera Solomooni ati,

¹² “Nikali mbwe ochia ohufunihiraanga amalako kaange koosi alala neende ebilagiro, ese njia ohuhuholera esyo si ndasuubisa Daudi lataao.

¹³ Njia ohumenyaanga mu Yisiraeli abaandu baange mu Nyuumba ya Nasaae yino yooli ohwoombaha, haandi siinjia ohubajwaang'aho kata nabudiidi.”

¹⁴ Mani Solomooni atyo n'amala ohwoombaha Enyuumba ya Nasaae eyo.

Ohunyirisa mukati w'Enyuumba ya Nasaae

¹⁵ Ebida byomuukati byabwiihwaho neende embaao ch'omuseengese ohutulira elalira hu bweeru ohwoolera elalira hu siindu sikabuhania esirama neende obweeru, nae obweeru bwali bwaholwa mu mbaao cha karatuusi.

¹⁶ Nae esiseenge sisibira mukati bweene, esilaangwa mbwe Abuundu Ahiramo Obwoolerefu, syoombahirwa enyuma bweene w'Enyuumba ya Nasaae. Syali emiita chitaanu-na-chine obulambaafu mani syaakabulwa neende embaao ch'emiseengese ohutulira elalira hu bweeru ohwoolera elalira hu sikabula obweeru neende esirama.

¹⁷ Esiseenge syali mu moni w'Abuundu Ahiramo Obwoolerefu syali emiita 18 obulambaafu.

¹⁸ Embaao ch'emiseengese enyerere echio chali chasaatwaho ebifwaanani by'amabbuka neende ebimuli; mukati mwoosi mwali mwabwiihwaho neende embaao ch'omuseengese, hu bulaanu amakina k'ebida kaahaya ohubonehana daawe.

¹⁹ Enyuma bweene w'Enyuumba ya Nasaae boombahayo esiseenge syomuukati bweene, yi Sanduuku ly'Endagaano y'Omwaami lyali lichia ohuteebwa.

²⁰ Esiseenge syomuukati bweene sino syali emiita chitaanu-na-chine obulambaafu, emiita chitaanu-na-chine obubaambali, neende emiita chitaanu-na-chine obuleeyi, syoosi nga syabwiihwaho neende esaabbu enjweenufu. Alutaari nayo yali niyabwiihwaho embaao nyerere ech'emiseengese.

²¹ Mukati bweene ow'Enyuumba ya Nasaae, mwosi mwali nimwabwiihwaho neende esaabbu, haandi enyolo ch'esaabbu chali nichateebwa yichihalakaniamo omulyaango kw'esiseenge syomuukati bweene, esyali syosi nisyafuunihwa neende esaabbu.

²² Mukati w'Enyuumba ya Nasaae mwosi mwali nimwafuunihwa neende esaabbu, kata neende alutaari yeene eyali Abuundu Ahiramo Obwoolerefu.

²³ Abakerubbi babiri bali baholwa mu mbaao ch'omuseituuni mani bageeng'wa Abuundu Ahiramo Obwoolerefu, buli otula yali emiita chine neende otutoonyese tune obuleeyi (4.4).

²⁴ Emiita chibiri neende otutoonyese tubiri nibwo obwali obulambaafu bwa buli lubaya olw'omukerubbi, haandi emiita chitaanu nibwo obwali obulambaafu bw'omukerubbi wuundi wula; ohutula hu busoonjo bwa buli lubaya ohwoola hu busoonjo bw'olubaya luundi byali byoola emiita chine neende otutoonyese tune.

²⁵ Omukerubbi wuundi wula yesi yali yoola emiita chine neende otutoonyese tune; abakerubbi bano boombi bali baakana obuhoongo haandi nga bafwaanana emera.

²⁶ Obuleeyi obw'omukerubbi mulala bwali emiita chine neende otutoonyese tune, haandi obw'owuundi wula bwosi bwali butyo.

²⁷ Byageeng'wa nibitekehaane mukati w'Abuundu Ahiramo Obwoolerefu, hu bulaanu embaya chibiri chibambuuhe chabyo, chi anyala ohugeng'aniraho akatikaati w'esiseenge, mani haandi embaya chiindi chibiri chira chaanyala ohwegeeng'a hu bida.

²⁸ Abakerubbi babiri abo bosi bali nibabwiihwaho esaabbu.

²⁹ Ebida by'esiseenge sihuluundu, haandi neende eby'esiseenge syomukati bweene byali byasaatwaho neende ebifwaanani bibaache eby'abakerubbi, emisaala minaasi, haandi neende ebimuli.

³⁰ Kata neende obweeru bwosi bwali bwafuunihwaho neende esaabbu.

³¹ Okwiiki kwa namahwaana, okwaholwa mu mbaao ch'omuseituuni kwateebwao mu mulyaango kw'Abuundu Ahiramo Obwoolerefu; aakulu w'olwiiki olwo hwaliho esiindu sifuduumbe esiri neende obusoonjo aakulu.

³² Enjiki chino chali nichasaatwaho ebifwaanani bibaache eby'abakerubbi babiri-babiri, emisaala miseituuni, haandi neende ebimuli. Enjiki, abakerubbi, haandi neende emisaala minaasi, byoosi byali nibyafuunihwaho neende esaabbu.

³³ Hulwoomulyaangiro kwiingira mu siseenge sihuluundu, efureemu y'esoonda chidatu ey'embaao ch'omuseituuni yali yaholwa.

³⁴ Haandi yaliyo enjiki fuumba chibiri echaholwa mu mbaao ch'omukaratuusi

³⁵ haandi nichasaatwaho ebifwaanani by'abakerubbi, emiseengese, alala neende ebimuli, byoosi ebyali nibyabwiihwaho bulai bweene neende esaabbu.

³⁶ Haandi olwaanyi lwomuukati bweene lwali lwoombahwa mu moni w'Enyuumba ya Nasaae, nilwabodoohanwa neende ebida ebyaliho emiguulo ky'emiseengese kitakerehaaneho daawe, hu buli makina kakerehaane hadatu-hadatu.

³⁷ Olwaalo lw'Enyuumba ya Nasaae lweecha lwaaholwa mu mwoosi kw'ohubiri, omwoosi kwa Siifi, mu mwaaka kwohune okw'obutuki bwa Solomooni.

³⁸ Bulaanu mu mwoosi kw'omunaane, omwoosi kwa Bbuuli, mu mwaaka kwa kitaanu-na-kibiri eky'obutuki bwa Solomooni, Enyuumba ya Nasaae yino yamaliiriswa bulai bweene, koti sa lu byali byatekehwa. Byali bimalire ohuyirira Solomooni emyaaka kitaanu-na-kibiri emilaamba ohuyoombaha.